2 Kórintiól 6
6
1Añára Allar sáañti ham-goróya ísafe tuáñra re aros gorír, tuáñra Allar ze rahámot faiyó, híyan ore befózul óito no diyó. 2Kiyólla-hoilé Íba ye fórmar de,
“Kobul gorá zah de októt Añí tor hotá fúinni,
aar nejat or din ot Añí toré modot goijjí.”#6:2 Yesáyah 49:8
Fúno, yala óilde kobul gorá zah de októ, aijja óilde nejat or din.
3Añára honókiyo re ṭokkor na hábai, zeéne añárar hédmotdarir bodnam no. 4Bólke añára Allar háadem de híyan hárr kessút zahér gorí, hoitó sailé, bicí sobór ot, duk-mosibot ot, mockil ot, ferecanit, 5fiṛa hát, ziyól haṛat, hánggamat, meénnot ot, urgúmat, waáccat, 6pak-sáf ot, giyan ot, bordac ot, meérbanit, Pak-Ruht, háṭi muhábbot ot, 7sóiyi kalam loi, Allar kudurut loi, den át ot edde ban át ot forhésgarir átiyar ókkol lói, 8izzot edde beizzot ówa lói, aar bodnam edde taarif faa loi. Añára sóiyi de óile yo maincé añára re dúkabaz ṭáare; 9añára re beggúne siníle yo no siné fán goré; añára morigiyígoi fán de óile yo, háleke añára zinda. Maincé añára re sáñza déh, montor aijjó zane mari nó fele. 10Añára ferecanit así fán de óile yo añára hámica kúcit así; añára re saité gorif, háleke añára boóut zon ore tuangor banair; añára ttu kessú nái fán, montor añára ttu hárr kessú asé.
11Ó Kórintiól, añára tuáñrar hañse kúlamela góri hotá hoiyí, aar tuáñra lla añárar dil ebbe kúlahala. 12Añára tuáñra lla añárar dil bon gorí raikkí de no, tuáñra éna tuáñrar dil añára ttu bon gorí raikkó. 13Ehón añí tuáñra re añr fuain ísafe hoóir, bodolat mazé tuáñra yó añára lla tuáñrar dil kúlido.
Zinda Allar gór
14Gairimandár ókkol or fúañti ek zuañl ot no óiyo. Kiyólla-hoilé forhésgari lói bedini loi kii bazá asé? Andár lói foór lói kii hátil asé? 15Mosih ttu Belial#6:15 Híyan óilde Yohúdi ye Cóitan olla estemal goré de ekkán nam loi kii bonot asé? Imandár ottu gairimandár lói kii bazá asé? 16Allar gór ot máze muttir kii zaga asé? Kiyólla-hoilé zinda Allar gór toh añára éna; zendilla Alla ye fórmaye, ki hoilé,
“Añí ítarar bútore tákiyum
edde ítarar bútore solafíra goríyum.
Añí ítarar Alla óiyum,
aar ítara Añr bonda óibo.”#6:16 Imami-ham 26:12; Yarmíyah 32:38; Yehézkel 37:27
17Hétolla bouli Mabude fórmar de,
“Tuáñra ítarar bútottu neeliaiyó,
ítara ttu aladá óizogoi.
Honó nafak jiníc no dóijjo,
tói Añí tuáñra re kobul goijjúm.#6:17 Yesáyah 52:11; Yehézkel 20:34,41
18Añí tuáñrar Baf óiyum,
aar tuáñra Añr futzíyain óiba,
hoóir hárr Kudurutwala Kúda ye.”#6:18 2 Sémuel 7:14; 7:8
Currently Selected:
2 Kórintiól 6: RST
Highlight
Share
Copy
Want to have your highlights saved across all your devices? Sign up or sign in
The copyright is jointly and equally held by:
Copyright © 2024 The Word for the World International
Copyright © 2024 Rohingya East Asia Translation
