Romans 10
10
1ညီအစ်ကိုတို့၊ ကျွန်ုပ်သည် မိမိ၏လူမျိုးများ ကယ်တင်ခြင်းခံရစေရန် စိတ်နှလုံးအကြွင်းမဲ့ဖြင့် လိုလားတောင့်တလျက် ဘုရားရှင်ထံတော်သို့ ဆုတောင်းပါ၏။ 2သူတို့သည် ဘုရားရှင်အား အလွန်ကြည်ညိုသူများဖြစ်ကြောင်းကို ငါသည်အာမခံနိုင်၏။ သို့သော် သူတို့၏ ကြည်ညိုမှုနည်းလမ်းသည် မှန်သောအသိဉာဏ်အပေါ်၌ မူတည်ခြင်း မရှိပေ။ 3သူတို့သည် ဘုရားရှင်နှင့် မှန်ကန်စွာဆက်သွယ်နိုင်မည့် နည်းလမ်းကိုမသိကြသဖြင့် ထိုလမ်းစဉ်အား မလိုက်ဘဲ မိမိတို့ကိုယ်တိုင်တီထွင်သည့် လမ်းစဉ်ကို လိုက်ကြပေသည်။ 4ခရစ်တော်သည် ပညတ်တရားအား အဆုံးသတ်စေတော်မူပြီဖြစ်ရာ ယုံကြည်သူအပေါင်းတို့သည် ဘုရားရှင်နှင့် မှန်ကန်စွာဆက်သွယ်မှုကို ရရှိကြပြီဖြစ်၏။ 5ပညတ်တရားအား စောင့်ထိန်းခြင်းအားဖြင့် ဘုရားရှင်နှင့် မှန်ကန်စွာ ဆက်သွယ်ခြင်းအကြောင်းနှင့်ပတ်သတ်၍ မောရှေက "ပညတ်တရားအား စောင့်ထိန်းသူသည် အသက်ရှင်လိမ့်မည်ဖြစ်၏" ဟုဖော်ပြခဲ့၏။ 6သို့ရာတွင် ယုံကြည်ခြင်းနည်းလမ်းအရ ဘုရားရှင်၏ရှေ့တော်၌ ဖြောင့်မတ်သည်ဟု သတ်မှတ်ခံရခြင်းက “‘ခရစ်တော်အား ဤလောကသို့ ခေါ်ဆောင်ရန် ရွှေမြို့တော်သို့ မည်သူသည် တက်လှမ်းမည်နည်း’ ဟူ၍ သင်၏စိတ်ထဲ၌ ပြောဆိုခြင်းမပြုနှင့်။ 7သို့မဟုတ် ‘ခရစ်တော်အား သေခြင်းမှ အသက်ပြန်ရှင်စေတော်မူရန် တွင်းနက်ကြီးထဲသို့ မည်သူသည် ဆင်းမည်နည်း’ ဟူ၍ မပြောဆိုနှင့်” ဟုဆိုထား၏။ 8ကျမ်းစာတော်က ဆိုလိုသည်မှာ နှုတ်ကပတ်တော်တရားဆိုသည်မှာ သင်တို့အား ငါဟောပြော ကြေညာထားသည့် ဘုရားရှင်အား ယုံကြည်ခြင်းနှင့်သက်ဆိုင်သော တရားတော်ပင်ဖြစ်သည်။ 9သင်တို့က အရှင်ယေရှုသည် အရှင်သခင်ဖြစ်တော်မူကြောင်းကို နှုတ်ဖြင့်ဝန်ခံ၍ ဘုရားရှင်သည် ထိုအရှင်အား သေခြင်းမှ အသက်ပြန်ရှင်စေတော်မူကြောင်းကို စိတ်နှလုံးထဲ၌ ယုံကြည်ကြလျှင် ဘုရားရှင်သည် သင်တို့ကို ကယ်တင်တော်မူလိမ့်မည်။။ 10အဘယ်ကြောင့်ဆိုသော် ကျွန်ုပ်တို့သည် ယုံကြည်ခြင်းအားဖြင့် ဘုရားရှင်နှင့် မှန်ကန်စွာ ဆက်သွယ်ခွင့်ရ၍ နှုတ်ဖြင့်ဝန်ခံခြင်းအားဖြင့် ကယ်တင်ခြင်းကိုခံရသောကြောင့်ဖြစ်၏။ 11ကျမ်းစာတော်က "မည်သူမဆို ကိုယ်တော်အား ယုံကြည်လျှင် စိတ်ပျက်ရလိမ့်မည် မဟုတ်" ဟု ဆိုထားလေသည်။ 12အစ္စရေးလူမျိုး၊ လူမျိုးခြားဟူ၍ ခွဲခြားခြင်း မရှိတော့သဖြင့် လူတိုင်းပါဝင်ကြရ၏။ ဘုရားရှင်သည် လူတိုင်း၏ အရှင်သခင်ဖြစ်တော်မူ၍ ကိုယ်တော်အား ဆုတောင်းသမျှသော လူတို့အား ကြွယ်ဝစွာ ကောင်းချီးပေးတော်မူ၏။ 13ကျမ်းစာတော်က "ထာဝရဘုရားအား ဆုတောင်းသူဟူသမျှတို့သည် ကယ်တင်ခြင်းကို ခံရလိမ့်မည်" ဟု ဖော်ပြသည့်အတိုင်းပင်ဖြစ်၏။ 14သို့ရာတွင် ထိုသူတို့သည် ကိုယ်တော်အား ယုံကြည်မှုမရှိကြလျှင် ကိုယ်တော်ထံသို့ မည်ကဲ့သို့ ဆုတောင်းနိုင် ကြမည်နည်း။ နှုတ်ကပတ်တရားတော်အား ကြားနာနိုင်ခြင်းမရှိလျှင် မည်ကဲ့သို့ ယုံကြည်နိုင်ကြမည်နည်း။ နှုတ်ကပတ်တရားတို့ကို ဟောပြောကြေညာမည့်သူမရှိလျှင် မည်ကဲ့သို့ကြားနိုင်ကြမည်နည်း။ 15ဟောပြောကြေညာသူများအား စေလွှတ်ခြင်းမရှိလျှင် မည်ကဲ့သို့ နှုတ်ကပတ်တရားတော်အား ဟောပြောကြေညာနိုင်မည်နည်း။ ကျမ်းစာတော်တွင် ဖော်ပြပါရှိသည့်အတိုင်း "သတင်းကောင်းအား ယူဆောင်လာသူတို့၏ ခြေတို့သည် လွန်စွာတင့်တယ်လှပေ၏" 16သို့ရာတွင် ထိုသတင်းကောင်းကို လူတိုင်းက မယုံကြပေ။ ဟေရှာယကိုယ်တိုင်က "အို ထာဝရဘုရားရှင်၊ အကျွန်ုပ်တို့ ကြေညာသောသတင်းကို မည်သူယုံကြည်ပါသနည်း" ဟုဆိုထားလေသည်။ 17သို့ဖြစ်၍ နှုတ်ကပတ်တရားတော်ကို ကြားနာခြင်းကြောင့် ယုံကြည်ကြ၏။ ခရစ်တော်အကြောင်း ဟောပြောခြင်းကြောင့် နှုတ်ကပတ်တရားတော်ကို ကြားနာကြရ၏။ 18သို့ရာတွင် လူတို့သည် ထိုနှုတ်ကပတ်တရားတော်ကို ကြားနာခွင့်မရကြသလောဟု ကျွန်ုပ်မေးလို၏။ သူတို့သည် ကြားနာခွင့်ကို အမှန်ပင်ရကြ၏။ ကျမ်းစာတော်က၊ "နှုတ်ကပတ်တရားတော်ကို ဟောပြောသူတို့၏ အသံသည် ကမ္ဘာမြေတစ်ဝန်းလုံးတွင် ပျံ့နှံ့သွား၏။ သူတို့၏ တရားစကားများသည် ကမ္ဘာမြေအစွန်ဆုံးထိတိုင်အောင် ရောက်ရှိလေပြီ" ဟုဆိုသည့်အတိုင်းပင်ဖြစ်သည်။ 19တဖန် ငါမေးဦးမည်။ အစ္စရေးလူမျိုးများသည် ထိုအမှုအရာကို နားလည်သိရှိခြင်း မရှိကြသလော။ မောရှေက၊ "ငါသည် မရေရာသောလူမျိုးကို အသုံးပြုသဖြင့် ငါ၏လူမျိုးတော်အား မနာလိုစိတ်ရှိစေမည်။ မိုက်မဲသော လူမျိုးအားဖြင့် ငါ၏လူမျိုးတော်အား အမျက်ထွက်စေမည်" ဟုဦးစွာပထမဖြေကြား၏။ 20ဟေရှာယက၊ "ငါ့အား မရှာကြသောသူတို့သည် ငါ့ကိုတွေ့ရှိကြ၏။ ငါ၏အကြောင်းကို မစုံစမ်းမမေးမြန်းသောသူတို့သည် ငါ့အားဖူးမြင်ရကြ၏။" ဟုပို၍ပင်ပြတ်သားစွာ ဆိုထား၏။ 21သို့ရာတွင် အစ္စရေးလူမျိုးများနှင့်ပတ်သက်၍မူကား "ငါ့အား ဆန့်ကျင်ပုန်ကန်၍ ငါ၏စကားကို မနာခံသော လူမျိုးအား ငါသည် တစ်နေကုန်လက်ကမ်း၍ ကြိုဆိုလျက်ရှိ၏" ဟုဟေရှာဟက ဆိုထား၏။
Currently Selected:
Romans 10: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
