Psalms 56
56
1အို ဘုရားရှင်၊ အကျွန်ုပ်ကို သနားတော်မူပါ။ အကြောင်းမူကား လူတို့သည် အကျွန်ုပ်ကိုနင်းချေ၍ တစ်နေ့လုံး တိုက်ခိုက်ညှဉ်းဆဲကြပါ၏။ 2အကျွန်ုပ်၏ရန်သူတို့သည် အကျွန်ုပ်အား တစ်နေလုံး နင်းချေကြပါ၏။ အမှန်စင်စစ် များစွာသောသူတို့သည် ထောင်လွှားသောစိတ်ဖြင့် အကျွန်ုပ်ကို တိုက်ခိုက်ကြပါ၏ဂ။ 3အကျွန်ုပ်သည် ကြောက်ရွံ့သောအခါ ကိုယ်တော်ကို ယုံကြည်ကိုးစားပါ၏။ 4ဘုရားရှင်ကိုအမှီပြု၍ နှုတ်ကပတ်တော်ကို အကျွန်ုပ်ချီးမွမ်းမည်ဖြစ်၏။ အကျွန်ုပ်သည် ဘုရားရှင်ကို ယုံကြည်ကိုးစားသည်ဖြစ်၍ ကြောက်ရွံ့မည်မဟုတ်။ လူသည် အကျွန်ုပ်အား မည်သို့ပြုနိုင်မည်နည်း။ 5အကျွန်ုပ်၏ရန်သူများသည် အကျွန်ုပ်အား တစ်နေ့လုံး စော်ကားပြောဆိုကြ၏။ အကျွန်ုပ် အကျိုးနည်းစေရန်နည်းလမ်းကို အစဉ်အမြဲ ရှာကြံလျက်နေကြ၏။ 6သူတို့သည် အကျွန်ုပ်၏ အသက်ကိုသတ်ရန် စောင့်မျှော်နေကြသည်နှင့်အညီ ပူးပေါင်းကြံစည်လျက်၊ ချောင်းမြောင်းလျက် အကျွန်ုပ်၏ခြေလှမ်းများကို စောင့်ကြည့်နေကြ၏။ 7သူတို့သည် ထိုအပြစ်ဒုစရိုက်များမှ လွတ်မြောက်ကြမည်လော။ အို ဘုရားရှင်၊ အမျက်တော်အားဖြင့် ထိုလူမျိုးတို့ကို နိမ့်ကျစေတော်မူပါ။ 8အကျွန်ုပ်၏ လှည့်လည်သွားလာနေရခြင်းကို ကိုယ်တော်သည် မှတ်တမ်းတင်တော်မူပြီ။ အကျွန်ုပ်၏ မျက်ရည်တို့အား ကိုယ်တော်၏သားရေဘူးထဲ၌ ထည့်ထားတော်မူပါ။ ထိုအရာတို့သည် ကိုယ်တော်၏မှတ်တမ်းထဲတွင် ရှိကြသည်မဟုတ်လော။ 9သို့ဖြစ်၍ ကိုယ်တော်အား အကျွန်ုပ်ခေါ်သောနေ့၌ အကျွန်ုပ်၏ရန်သူတို့သည် နောက်ပြန်ဆုတ်ကြလိမ့်မည်။ ဤအမှုအားဖြင့် ဘုရားရှင်သည် အကျွန်ုပ်ဘက်၌ ရှိတော်မူသည်ကို အကျွန်ုပ်သိ၏။ 10အကျွန်ုပ်တို့၏အရှင်ဖြစ်တော်မူသော ဘုရားရှင်အားဖြင့် နှုတ်ကပတ်တော်ကို အကျွန်ုပ်ချီးမွမ်းမည်။ 11အကျွန်ုပ်သည် ဘုရားရှင်ကို ယုံကြည်ကိုးစားသည်ဖြစ်၍ ကြောက်ရွံ့မည်မဟုတ်။ လူသည် အကျွန်ုပ်အား မည်သို့ပြုနိုင်မည်နည်း။ 12အို ဘုရားရှင်၊ ကိုယ်တော့်ထံပြုထားသော ကတိသစ္စာများသည် အကျွန်ုပ်၌ရှိပါ၏။ အကျွန်ုပ်သည် ကိုယ်တော်အား ကျေးဇူးတော်ချီးမွမ်းခြင်းဖြင့် ထိုအရာတို့အား ပြည်စုံစေပါမည်။ 13အကြောင်းမူကား ကိုယ်တော်သည် အကျွန်ုပ်အား သေခြင်းမှ ကယ်တင်တော်မူပြီး။ အကျွန်ုပ်သည် ဘုရားရှင်၏ရှေ့တော်၌ အသက်၏အလင်းထဲတွင် လျှောက်လှမ်းနိုင်ရန် အကျွန်ုပ်၏ခြေထောက်အား ခလုတ်တိုက်ခြင်းမှ ကင်းဝေးစေတော်မူသည် မဟုတ်လော။
Currently Selected:
Psalms 56: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
