Psalms 55
55
1အို ဘုရားရှင်၊ အကျွန်ုပ်၏ ဆုတောင်းသံကို နားထောင်တော်မူပါ။ အကျွန်ုပ် အသနားခံတောင်းလျှောက်သည်ကိုလည်း လျစ်လျူရှုတော်မမူပါနှင့်။ 2အကျွန်ုပ်ကို အာရုံစိုက်နားထောင်၍ အကျွန်ုပ်ကို ထူးတော်မူပါ။ အကျွန်ုပ်သည် အကျွန်ုပ်၏စိတ်ဒုက္ခကြောင့် စိုးရိမ်ပူပန်မှုများဖြင့် အားအင်ကုန်ခန်းလျက်ရှိပါ၏။ 3ရန်သူ၏အသံနှင့် ယုတမာကောက်ကျစ်သောသူ၏ ဖိစီးမှုကြောင့် စိတ်ရှုပ်ထွေးနေရပါ၏။ အကြောင်းမူကား သူတို့သည် အကျွန်ုပ်အပေါ်ကို ဆင်းရဲဒုက္ခကျရောက်စေ၍ အကျွန်ုပ်အား အမျက်ထွက်လျက် အငြိုးထားကြပါ။ 4အကျွန်ုပ်၏စိတ်နှလုံးသည် အကျွန်ုပ်အထဲ၌ တုန်လှုပ်လျက်နေပါ၏။ သေခြင်းနှင့်ဆိုင်သော ကြောက်ရွံ့ထိတ်လန့်ဖွယ်ရာများသည် အကျွန်ုပ်အပေါ်သို့ ကျရောက်လာပါ၏။ 5ကြောက်ရွံ့ခြင်းနှင့် ထိတ်လန့်တုန်လှုပ်ခြင်းသည် အကျွန်ုပ်၏အပေါ်သို့ကျရောက်၍ ကြောက်ရွံ့စိတ်သည်လည်း အကျွန်ုပ်အား လွှမ်းမိုးလျက်ရှိပါ၏။ 6ထိုအခါ အကျွန်ုပ်က "အကျွန်ုပ်ထံတွင် ချိုးငှက်ကဲ့သို့အတောင်ရှိခဲ့လျှင် အကျွန်ုပ်သည် ပျံသန်းသွား၍ နားနေပေလိမ့်မည်။ 7ကြည့်ရှုလော့။ အကျွန်ုပ်သည် ဝေးရာသိုပြေး၍ တောကန္တာ၌နေပေလိမ့်မည်။ 8လေပြင်းဘေးမှလည်းကောင်း၊ မုန်တိုင်းဘေးမှလည်းကောင်း လွတ်မြောက်ရာသို့ အကျွန်ုပ်သည် အလျင်အမြန်သွားပေလိမ့်မည်" ဟု ဆို၏။ 9အို ဘုရားရှင်၊ သူတို့၏စကားကို ရှုပ်ထွေးကွဲပြားစေတော်မူပါ။ အကြောင်းမူကား အကျွန်ုပ်သည် မြို့ထဲ၌ ရက်စက်ကြမ်းကြုတ်မှု၊ ခိုက်ရန်ဖြစ်ပွားမှုကို တွေ့မြင်ရပါ၏။ 10သူတို့သည် ထိုမြို့၏ မြို့ရိုးပေါ်မှ နေ့ညမပြတ် လှည့်ပတ်နေကြပါ၏။ အပြစ်ဒုစရိုက်နှင့် အခက်အခဲပြဿနာသည်လည်း ထိုမြို့ထဲရှိပါ၏။ 11ယုတ်မာစဉ်းလဲမှုသည် ထိုမြို့ထဲ၌ရှိ၍ ဖိနှိပ်ခြယ်လှယ်ခြင်းနှင့် လိမ်လည်လှည့်ဖြားခြင်းသည် ထိုမြို့၏လမ်းမပေါ်မှ မည်သည့်အခါမျှ ထွက်ခွာလိမ့်မည်မဟုတ်ပါ။ 12အမှန်စင်စစ် အကျွန်ုပ်အားကဲ့ရဲ့ပြစ်တင်သောသူသည် ရန်သူမဟုတ်။ ဟုတ်လျှင် အကျွန်ုပ်ခံနိုင်ခဲ့ပေလိမ့်မည်။ အကျွန်ုပ်၏တစ်ဖက်၌ မိမိကိုယ်မိမိ ချီးမြှောက်သောသူသည် အကျွန်ုပ်အား မုန်းတီးသောသူမဟုတ်။ ဟုတ်လျှင် သူမမြင်အောင် အကျွန်ုပ်သည် ပုန်းရှောင်ခဲ့ပေလိမ့်မည်။ 13သို့သော် ထိုသူသည် အကျွန်ုပ်ကဲ့သို့ လူသားတစ်ဦးဖြစ်ပြီး အကျွန်ုပ်၏အပေါင်းအဖော်၊ အကျွန်ုပ်၏အသိမိတ်ဆွေဖြစ်သော သင်ပင်ဖြစ်ပါ။ 14အကျွန်ုပ်တို့သည် အချင်းချင်းရင်းနှီးစွာဖြင့် ဆွေးနွေးတိုင်ပင်ကြပြီး ဘုရားရှင်၏အိမ်တော်သို့ လူအစုအဝေးနှင့်တကွ သွားခဲ့ကြ၏။ 15သေခြင်းသည် သူတို့အား ရုတ်တရက် ဖမ်းဆီးပါစေ။ သူတို့သည် မရဏနိုင်ငံသို့ အရှင်လတ်လတ်သွားကြရပါစေ။ အကြောင်းမူကား သူတို့တည်းခိုနေထိုင်ရာ နေရာသည် သူတို့၏အလယ်၌ရှိကြ၏။ 16အကျွန်ုပ်သည် ဘုရားရှင်ကိုခေါ်၍ ဘုရားရှင်သည် အကျွန်ုပ်အား ကယ်တင်တော်မူ၏။ 17အကျွန်ုပ်၏ ညည်းတွားမြည်တမ်းသံများသည် နံနက်ချိန်၊ မွန်းတည့်ချိန်၊ ညအချိန်တို့၌ ကိုယ်တော်ထံသို့ရောက်သဖြင့် ကိုယ်တော်သည် ကြားတော်မူလိမ့်မည်။ 18များစွာသောသူတို့သည် အကျွန်ုပ်အား ဆန့်ကျင်ကြသော်လည်း ကိုယ်တော်သည် အကျွန်ုပ်ရင်ဆိုင်နေရသောစစ်ပွဲထဲမှ အကျွန်ုပ်အား ဘေးကင်းလုံခြုံစွာ ရွေးနုတ်ကယ်တင်တော်မူ၏။ 19ရှေးကာလအစဉ်အဆက်ကပင် စိုးစံတော်မူသော ဘုရားရှင်သည် အကျွန်ုပ်၏ ဆုတောင်းသံကိုကြား၍ သူတို့ကို နှိမ့်ချတော်မူလိမ့်မည်။ သူတို့သည် မည်သည့်အခါမျှ ပြောင်းလဲခြင်းလည်းမရှိကြ။ ဘုရားရှင်ကို ကြောက်ရွံ့ခြင်းလည်းမရှိကြ။ 20ထိုသို့သောသူသည် သူ၏မိတ်ဆွေများအား ကိုယ်ထိလက်ရောက်ကျူးလွန်၍ သူ၏ပဋိညာဉ်ကိုလည်း ချိုးဖောက်ခဲ့၏ 21သူ၏နှုတ်သည် ထောပတ်ကဲ့သို့ နူးညံ့စွာပြောဆိုသော်လည်း သူ၏စိတ်နှလုံးအတွင်း၌ စစ်ပွဲရှိ၏။ သူ၏စကားတို့သည် ဆီထက်ချောမွတ်သော်လည်း ဆွဲထုတ်ထားသောဓားများသာဖြစ်၏။ 22သင်၏ဝန်ထုပ်ဝန်ပိုးအား ဘုရားရှင်ထံ၌ ချထားလော့။ ထိုသို့ပြုလျှင် ကိုယ်တော်သည် သင့်အား ကူညီမစတော်မူလိမ့်မည်။ ကိုယ်တော်သည် ဖြောင့်မတ်သူကို မည်သည့်အခါမျှ တုန်လှုပ်စေတော်မူမည်မဟုတ်။ 23သို့သော် အို ဘုရားရှင်၊ ကိုယ်တော်သည် ထိုသူတို့အား သင်္ချိုင်းတွင်းထဲသို့ ဆင်းစေတော်မူ၏။ သတ်ဖြတ်ကြသောသူများနှင့် လိမ်လည်လှည့်ဖြားကြသောသူတို့သည် သူတို့၏နေ့ရက်ကာလ၏ ထက်ဝက်မျှပင် အသက်ရှင်ရမည်မဟုတ်။ အကျွန်ုပ်မူကား ကိုယ်တော်ကို ယုံကြည်ကိုးစားပါမည်။
Currently Selected:
Psalms 55: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
