Psalms 38
38
1အို ဘုရားရှင်၊ ကိုယ်တော်၏အမျက်တော်ဖြင့် အကျွန်ုပ်ကို ဆုံးမတော်မမူပါနှင့်။ ကိုယ်တော်၏အမျက်ဒေါသဖြင့် အကျွန်ုပ်ကိုဆုံးမပဲ့ပြင်တော်မမူပါနှင့်။ 2ကိုယ်တော်သည် အကျွန်ုပ်အား မြားဖြင့်ပစ်၍ ဒဏ်ရရှိစေတော်မူပါပြီ။ ကိုယ်တော်၏လက်တော်သည် အကျွန်ုပ်ကိုဖိထားလျက် ရှိပါ၏။ 3ကိုယ်တော်၏ အမျက်တော်ကြောင့် အကျွန်ုပ်၏ကိုယ်ခန္ဓာ၌ အနာရကင်းသောနေရာမရှိပါ။ အကျွန်ုပ်၏အပြစ်များကြောင့် အကျွန်ုပ်၏အရိုးတို့သည် သန်စွမ်းခြင်းမရှိပါ။ 4အကြောင်းမူကား အကျွန်ုပ်၏အပြစ်ဒုစရိုက်များသည် အကျွန်ုပ်၏ဦးခေါင်းကို လွှမ်းမိုးသည်အထိများပြား၍ ဝန်ထုပ်ကြီးကဲ့သို့ အကျွန်ုပ်အတွက် လေးလံလွန်းပါ၏။ 5အကျွန်ုပ်၏မိုက်မဲမှုကြောင့် အကျွန်ုပ်၏ဒဏ်ရာများသည် ပုပ်စော်နံ၍ ရိရွဲနေကြပါ၏။ 6အကျွန်ုပ်သည် ခေါင်းကိုငုံ့လျက် လွန်စွာနှိမ့်ချပြီး တစ်နေ့လုံးဝမ်းနည်းပူဆွေးကာ သွားလာနေရပါ၏။ 7အကြောင်းမူကား အကျွန်ုပ်၏ခါးတစ်ခုလုံးသည် နာကျင်လျက် အကျွန်ုပ်ခန္ဓာကိုယ်၌ အနာတရကင်းသောနေရာမရှိပါ။ 8အကျွန်ုပ်သည် အားလျော့လျက် လုံးလုံးကြေမွနေရပါ၏။ အကျွန်ုပ်သည် စိတ်နှလုံးပူဆွေးသဖြင့် အော်ဟစ်နေ၏။ 9အို ဘုရားရှင်၊ ကိုယ်တော်သည် အကျွန်ုပ်လိုအင်ဆန္ဒကို သိတော်မူပါ၏။ အကျွန်ုပ်၏ညည်းတွားခြင်းသည် ကိုယ်တော့်ထံမှ ကွယ်ဝှက်၍မနေပါ 10အကျွန်ုပ်၏နှလုံးသည် ပြင်းထန်စွာခုန်၍ အကျွန်ုပ်၏ခွန်အားသည် အကျွန်ုပ်အားစွန့်ခွာသွားပြီဖြစ်၏။ အကျွန်ုပ်၏ မျက်စိအလင်းသည်လည်း အကျွန်ုပ်ထံတွင် မရှိတော့ပါ။ 11ကျွန်ုပ်၏မိတ်ဆွေများနှင့် အပေါင်းအဖော်များသည် အကျွန်ုပ်၏အနာများကြောင့် အကျွန်ုပ်ကို ရှောင်ဖယ်ကြပါ၏။ အကျွန်ုပ်၏ဆွေမျိုးသားခြင်းများသည်လည်း အဝေးတွင်ရပ်နေကြပါ။ 12အကျွန်ုပ်၏အသက်ကို ရန်ရှာကြသောသူတို့သည် အကျွန်ုပ်အား ထောင်ချောက်ဆင်၍ ဖမ်းဆီးကြပါ၏။ အကျွန်ုပ်အား ဒုက္ခရောက်ရန် ရှာကြံနေကြသူတို့သည် ပျက်စီးခြင်းအကြောင်းများကို ပြောဆို၍ လိမ်လည်လှည့်ဖြားမှုများကို တစ်နေ့လုံးကြံစည်နေကြပါ၏။ 13သို့သော် အကျွန်ုပ်သည် နားမကြားသူကဲ့သို့ မည်သည့်အရာကိုမျှမကြားပေ။ မိမိ၏နှုတ်ကိုမဖွင့်သော ဆွံ့အသူကဲ့သို့ မည်သည့်အရာကိုမျှ မပြောနိုင်ပါ။ 14အမှန်စင်စစ် အကျွန်ုပ်သည် မကြားရသောသူကဲ့သို့လည်းကောင်း၊ မိမိ၏နှုတ်၌ ပြန်ပြောစရာစကားမရှိသောသူကဲ့သို့လည်းကောင်း ဖြစ်နေပါ၏။ 15အကြောင်းမူကား အို ဘုရားရှင်၊ ကိုယ်တော်ကို အကျွန်ုပ်မျှော်လင့်ကိုးစားပါ၏။ အကျွန်ုပ်၏အရှင်ဖြစ်တော်မူသော ဘုရားရှင်၊ ကိုယ်တော်သည် အကျွန်ုပ်ခေါ်သည်ကို ထူးတော်မူမည်ဖြစ်ပါ၏။ 16သို့ဖြစ်၍ "အကျွန်ုပ်ခြေချော်ကျသောအခါ သူတို့သည် အကျွန်ုပ်၏အကြောင်းကြောင့် ဝမ်းမြောက်ခြင်း၊ အကျွန်ုပ်ကြောင့် သူတို့ကိုယ်သူတို့ ချီးမြှောက်ခြင်း မရှိကြပါစေနှင့်" ဟု အကျွန်ုပ်လျှောက်တင်ပါ၏။ 17အကြောင်းမူကား အကျွန်ုပ်သည် လဲကျလုမတတ်ဖြစ်နေပါ၏။ အကျွန်ုပ်၏ နာကျင်မှုဒုက္ခဝေဒနာသည်လည်း အကျွန်ုပ်၏ရှေ့၌ အစဉ်ရှိနေပါ၏။ 18အမှန်စင်စစ် အကျွန်ုပ်သည် အကျွန်ုပ်၏အပြစ်ဒုစရိုက်ကြောင့် ဒုက္ခရောက်လျက်ရှိကြောင်းကို ဖော်ပြဝန်ခံပါ၏။ ထိုအပြစ်များကြောင့်လည်း စိုးရိမ်ပူပန်ရပါ၏။ 19များစွာသောသူတို့သည် အကြောင်းပြချက်မရှိဘဲ အကျွန်ုပ်၏ရန်သူများဖြစ်လာကြပါ၏။ အကျွန်ုပ်အား အကြောင်းမဲ့ မုန်းတီးကြသူတို့သည်လည်း များစွာရှိပါ၏။ 20အကျွန်ုပ်သည် ကောင်းမြတ်သောအရာကို လက်ကိုင်ပြုသောကြောင့် အကောင်းအား အဆိုးဖြင့်တုံ့ပြန်ကြသောသူတို့သည် အကျွန်ုပ်ကို ပြစ်တင်စွပ်စွဲကြပါ၏။ 21အို ဘုရားရှင်၊ အကျွန်ုပ်ကို စွန့်ပစ်တော်မမူပါနှင့်။ အို အကျွန်ုပ်၏ဘုရားရှင်၊ အကျွန်ုပ်နှင့် ဝေးဝေးနေတော်မမူပါနှင့်။ 22အကျွန်ုပ်ကို ကယ်တင်တော်မူသောဘုရားရှင်၊ အကျွန်ုပ်အား ကူညီမစရန် အလျင်အမြန်ကြွလာတော်မူပါ။
Currently Selected:
Psalms 38: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
