Ephesians 2
2
1သင်တို့မူကားသေလူများဖြစ်ခဲ့ကြသည်။ အဘယ်ကြောင့်ဆိုသော် သင်တို့သည်ဘုရားရှင်အားမနာခံဘဲ အပြစ်တရားများကျူးလွန်ခဲ့ကြသောကြောင့်ဖြစ်သည်။ 2ထိုအချိန်ကသင်တို့သည် ဤလောကရှိလူတို့၏လမ်းစဉ်များကိုလျှောက်လှမ်းခဲ့ကြပြီး ကောင်းကင်ရှိဝိညာဉ်တန်ခိုးများကိုအုပ်စိုးသော အုပ်ချုပ်သူများကိုနာခံသူများဖြစ်ခဲ့ကြသည်။ ဘုရားသခင်၏အမိန့်တော်ကိုမနာခံသူ တို့သည် ယခုအခါ၌ထိုသူ၏စိုးမိုးအုပ် ချုပ်ခြင်းကိုခံလျက်နေကြရသည်။ 3အကျွန်ုပ်တို့သည်လည်း တစ်ချိန်ကထိုသူတို့ကဲ့သို့ပင်ပြုမူနေထိုင်ခဲ့ကြသည်။ အကျွန်ုပ်တို့သည် အကျွန်ုပ်တို့၏ အကျွန်ုပ်တို့၏ကိုယ်ခန္ဓာအလိုနှင့် စိတ်၏တပ်မက်မှုအတိုင်းပြုမူနေထိုင်ခဲ့ကြသည်။ သို့ဖြစ်၍ အကျွန်ုပ်တို့သည် သဘာဝအားဖြင့် အခြားသူတို့ကဲ့သို့ပင် ဘုရားရှင်၏ အမျက်တော်ကို ခံထိုက်သူများဖြစ်ကြသည်။ 4သို့သော် ဂရုဏာတော်နှင့်ပြည့်စုံတော်သော ဘုရားရှင်သည် အကျွန်ုပ်တို့ကို အလွန်ချစ်တော်မူသဖြင့် 5အပြစ်များကြောင့် သေဆုံးလျက်ရှိကြသော အကျွန်ုပ်တို့ကို ယေရှုခရစ်တော်နှင့်အတူအသက်ရှင်စေတော်မူပြီ ဖြစ်သည်။ သင်တို့ ကယ်တင်ခြင်းခံရသည်မှာ ဘုရားရှင်၏ ကျေးဇူးတော်ကြောင့်သာဖြစ်သည်။ 6ကိုယ်တော်ယေရှုခရစ်တော်အားဖြင့် ကျွန်ုပ်တို့ကိုရှင်ပြန်ထမြောက်စေပြီး နိဗ္ဗာန်ရွှေမြို့တော်၌ ကိုယ်တော်နှင့်အတူစံမြန်းခွင့်ကိုပေးတော်မူသည်။ 7ဤသို့ပြုတော်မူခြင်းမှာခရစ်တော်ယေရှုအားဖြင့် အကျွန်ုပ်တို့အားမေတ္တာပြတော်မူရာ၌ကိုယ်တော်၏ ကျေးဇူးတော်သည်သာမန်ထက်လွန်ကဲသည်ကို နောင်ကာလအစဉ်အဆက်လူတို့သိမြင်နိုင်ကြစေရန်ပင်ဖြစ်သည်။ 8အဘယ်ကြောင့်ဆိုသော် သင်တို့သည် ကျေးဇူးတော်ကြောင့် ယုံကြည်ခြင်းအားဖြင့် ကယ်တင်ခြင်းခံရကြသည်။ ၎င်းသည် သင်တို့ကိုယ်တိုင်ပြုသောကုသိုလ်ကြောင့်မဟုတ်ဘဲ ဘုရားရှင်ပေးတော်မူသောလက်ဆောင်ဖြစ်သည်။ 9မိမိပြုသောကုသိုလ်ကြောင့်ကယ်တင်ခြင်းခံရသည်မဟုတ်။ ထို့ကြောင့် မည်သူမျှကြွားဝါစရာအကြောင်းမရှိ။ 10အကျွန်ုပ်တို့သည်ယေရှုခရစ်တော်နှင့်တစ်လုံးတစ်ဝတည်းဖြစ်လျက်ဘုရားရှင်စီမံထားတော်မူသောအကျင့်ကောင်းများကိုကျင့်ကြံစေရန် ဘုရားရှင်သည် အကျွန်ုပ်တို့အားဖန်ဆင်းတော်မူပေသည်။ 11သင်တို့သည် လူမျိုးခြားများအဖြစ် မွေးဖွားလာကြပြီး ဂျူးလူမျိုးတို့သည် သင်တို့ကို အရေဖျားလှီးမင်္ဂလာမပြုလုပ်သောသူများဟု ခေါ်ကြသည်။ ထိုသူတို့သည် မိမိကိုယ်ကိုယ် အရေဖျားလှီးမင်္ဂလာကို ခံယူထားသောသူများဟုခေါ်ကြသည်။ ထိုသူတို့၏ အရေဖျားလှီးခြင်းသည် ကိုယ်ခန္ဓာပေါ်တွင် လူ့လက်ဖြင့် ပြုလုပ်သောအရာသာဖြစ်သည်။ 12တစ်ချိန်က သင်တို့သည် ယေရှုခရစ်တော်နှင့် ကင်းကွာခဲ့ကြ၍ အစ္စရေးလူမျိုးများတွင် ပါဝင်ခွင့်မရ၊ ကတိတော်နှင့်ဆိုင်သော ပဋိညာဉ်များကိုသက်ဆိုင်ခွင့်မရှိ၊ မျှော်လင့်ချက်မရှိ၊ ဤလောကတွင် ဘုရားရှင်ကို မသိဘဲနေခဲ့ကြသည်ကို သတိရကြလော့။ 13သို့ရာတွင်ယခုအခါ၌သင်တို့သည်ယေရှုခရစ်တော်နှင့် တစ်လုံးတစ်ဝတည်းဖြစ်ကြပြီဖြစ်သဖြင့် ယခင်ကဝေးကွာလျက်နေခဲ့ကြသောသင်တို့သည် ယေရှုခရစ်တော်အသေခံတော်မူခြင်းကြောင့် အပါးတော်သို့ရောက်ကြရလေပြီ။ 14အဘယ်ကြောင့်ဆိုသော် ယေရှုခရစ်တော်သည် ဂျူးလူမျိုးနှင့် လူမျိုးခြားတို့ကို လူမျိုးတစ်မျိုးတည်းဖြစ်စေ တော်မူလျက် အကျွန်ုပ်အားသင့်မြတ်ငြိမ်းချမ်းခြင်းကိုယူဆောင်လာပေးသည်။ ကိုယ်တော်သည်မိမိ၏ ကိုယ်ခန္ဓာတော်အားဖြင့် အကျွန်ုပ်တို့ကို ရန်သူများအဖြစ်ပိုင်းခြားထားသောတံတိုင်းကိုဖြိုချတော်မူခဲ့ပြီဖြစ်သည်။ 15ကိုယ်တော်သည် ယုဒပညတ်ကျမ်းများ ၊စည်းမျဥ်းဥပဒေများကို ပယ်ဖျက်တော်မူပြီး လူမျိုးစုနှစ်စုအား တစ်စုတည်းဖြစ်စေလျက် လူမျိုးအသစ်ကိုဖြစ်ပေါ်စေတော်မူလေသည်။ ဤနည်းဖြင့် အချင်းချင်း သင့်မြတ်လျက်ငြိမ်းချမ်းစေတော်မူသည်။ 16ယေရှုခရစ်တော်သည်လက်ဝါးကပ်တိုင်ပေါ်တွင် အသေခံတော်မူခြင်းဖြင့်ရန်ငြိုးကိုအဆုံးသတ်ပြီး လက်ဝါးကပ်တိုင်အားဖြင့် အကျွန်ုပ်တို့လူမျိုးနှစ်မျိုးစလုံးကို တစ်မျိုးတည်းဖြစ်စေလျက် ဘုရားရှင်ထံသို့ ပြန်လည်ပို့ဆောင်တော်မူသည်။ 17သို့ဖြစ်၍ဘုရားရှင်နှင့်ဝေးကွာလျက်နေခဲ့သောသင်တို့လူမျိုးခြားများအားလည်းကောင်း၊ ဘုရားရှင်နှင့်နီးခဲ့သူဂျူးလူမျိုးများအားလည်းကောင်း ယေရှုခရစ်တော်သည်ကြွလာတော်မူ၍ ငြိမ်းချမ်းခြင်းနှင့်ဆိုင် သည့်သတင်းကောင်းကိုဟောပြောတော်မူသည်။ 18ထိုသို့ဖြင့် အကျွန်ုပ်တို့နှစ်မျိုးစလုံးသည် ယေရှုခရစ်တော်ပြုခဲ့သောအမှုအားဖြင့် တစ်ပါးတည်းသော ဉာဏ်အလင်းတော်မှတစ်ဆင့် အဖဘုရားရှင်ထံသို့ဝင်ရောက်ခွင့်ရကြပြီဖြစ်သည်။ 19ထို့ကြောင့် သင်တို့သည်လူမျိုးခြားများနှင့်သူစိမ်းများမဟုတ်တော့ဘဲ ဘုရားရှင်၏လူများ၊ ဘုရားရှင်၏အိမ်သူ အိမ်သားများဖြစ်ကြပြီဖြစ်သည်။ 20သင်တို့သည် သာဝကများနှင့် ပရောဖက်များချထားခဲ့သောအုတ်မြစ်ပေါ်တွင်တည်ဆောက်ခြင်းခံရသော အဆောင်အအုံများကဲ့သို့ဖြစ်ပြီး ထိုအဆောက်အအုံများ၏အရေးကြီးဆုံးသောထောင့်ချုပ်ကျောက်သည်ကား ယေရှုခရစ်တော်ပင်ဖြစ်သည်။ 21ထိုထောင့်ချုပ်ကျောက်အားဖြင့် အဆောက်အအုံတစ်ခုလုံးသည်အံဝင်ခွင်ကျဆက်စပ်လျက် ကြီးပွားတိုးတတ်စေသဖြင့် ၎င်းသည်ဘုရားရှင်၏သန့်ရှင်းသောဗိမာန်တော်ဖြစ်လာလေသည်။ 22သင်တို့သည် ဉာဏ်အလင်းတော်အားဖြင့် ဘုရားရှင်ကိန်းဝပ်တော်မူရာနေရာအဖြစ်သို့ ယေရှုခရစ်တော်နှင့် အတူတည်ဆောက်ခြင်းခံကြရပြီဖြစ်သည်။
Currently Selected:
Ephesians 2: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
