Ephesians 1
1
1ဘုရားရှင်၏အလိုတော်အားဖြင့်ယေရှုခရစ်တော်၏သာဝကဖြစ်သော အကျွန်ုပ်ပေါလုသည် ဧဖက်မြို့တွင် နေထိုင်ကြသော ယေရှုခရစ်တော်အပေါ်သစ္စာရှိကြသည့် ဘုရားရှင်၏သားသမီးများထံသို့ စားရေးသားလိုက်ပါ သည်။ 2ကျွန်ုပ်တို့၏အဖဘုရားရှင်နှင့် ယေရှုခရစ်တော်ထံမှကျေးဇူးတော်နှင့်ငြိမ်းချမ်းခြင်းများကို သင်တို့ခံစားရရှိပါစေ။ 3အကျွန်ုပ်တို့၏အရှင်ယေရှုခရစ်တော်၏ အဖဘုရားရှင်အားချီးမွမ်းကြလော့။ အဘယ်ကြောင့်ဆိုသော် ဘုရားရှင်သည်ရွှေမြို့တော်နှင့်ဆိုင်သော ဝိညာဉ်ရေးရာကောင်းချီးမင်္ဂလာများနှင့်အတူ ယေရှုခရစ်တော်၌ တစ်လုံးတစ်ဝတည်းဖြစ်သောအကျွန်ုပ်တို့ကို ကောင်းချီးမင်္ဂလာရှိစေခဲ့ပြီဖြစ်သည်။ 4ဤကမ္ဘာကြီးကို မဖန်ဆင်းမီကပင် ဘုရားရှင်သည် အကျွန်ုပ်တို့ကိုခရစ်တော်နှင့် တစ်သွေးတစ်သားတည်း ဖြစ်စေပြီး သူ၏ရှေ့တော်တွင် အပြစ်ဆိုစရာမရှိဘဲ သန့်ရှင်းမွန်မြတ်သူများဖြစ်စေရန်ရွေးချယ်တော်မူသည်အထိ ချစ်မြတ်နိုးတော်မူခဲ့ပါသည်။ 5အကျွန်ုပ်တို့သည် ဘုရားရှင်၏သားသမီးများဖြစ်စေရန် ယေရှုခရစ်တော်အားဖြင့်ရွေးကောက်တော်မူပြီးဖြစ် သည်။ ဤသည်ကား ဘုရားရှင်နှစ်သက်တော်မူသောအရာနှင့်အလိုရှိတော်မူသောအရာပင်ဖြစ်သည်။ 6ထို့ကြောင့် ဘုရားရှင်၏ကြီးမြတ်တော်မူသောကျေးဇူးတော်ကို အကျွန်ုပ်တို့ချီးမွမ်းသင့်ပေသည်။ ဘုရားရှင်သည် သူချစ်မြတ်နိုးတော်မူသော် သားတော်အားအကျွန်ုပ်အား အခမဲ့ပေးသနားတော်မူခဲ့သည်။ 7ဘုရားရှင်၏ကျေးဇူတော်သည်ကြွယ်ဝလှသဖြင့် အကျွန်ုပ်တို့သည်ယေရှုခရစ်တော်၏အသွေးတော်အားဖြင့် ရွေးနုတ်ခြင်းခံခဲ့ကြရသည်ဖြစ်သည်။ ထိုရွေးနုတ်ခြင်းကြောင့် အပြစ်များကိုခွင့်လွှတ်တော်မူသောကျေးဇူးတော်ကို ရရှိကြခြင်းဖြစ်သည်။ 8ဘုရားရှင်သည် ထိုကျေးဇူးတော်ကို ခပ်သိမ်းသောဉာဏ်ပညာနှင့် နားလည်သောအသိပညာဖြင့် အကျွန်ုပ်တို့ကို ရက်ရောစွာပေးကမ်းခဲ့ပြီးဖြစ်သည်။ 9ဘုရားရှင်သည် လျှို့ဝှက်နက်နဲသော မိမိ၏အကြံအစည်တော်ကို ယေရှုခရစ်တော်အားဖြင့် မိမိရည်ရွယ်တော်မူ ထားသည့်အတိုင်း အကျွန်ုပ်တို့ကိုသိစေတော်မူပြီဖြစ်သည်။ 10အချိန်ကျလာသောအခါ ဘုရားရှင်သည်ရွှေမြို့တော်နှင့် ဤကမ္ဘာမြေပေါ်ရှိအရာအားလုံးကို ယေရှုခရစ်တော်၏လက်အောက်၌အတူတကွထားရှိခြင်းဖြင့် မိမိ၏အကြံအစည်အားပြည့်စုံစေလိမ့်မည်ဖြစ်သည်။ 11အကျွန်ုပ်တို့သည်လည်း ယေရှုခရစ်တော်နှင့်တစ်လုံးတစ်ဝတည်းဖြစ်စေရန်ရွေးကောက်ခြင်းခံရမည်ဖြစ်သည်။ အဘယ်ကြောင့်ဆိုသော် ဘုရားရှင်သည်မိမိအလိုတော်ရှိသည့်အတိုင်းအရာအားလုံးကိုဖြစ်မြောက်အောင်လုပ် ဆောင်တော်မူသောကြောင့်ဖြစ်သည်။ 12ထို့ကြောင့် ယေရှုခရစ်တော်အား ပထမဦးစွာမျှော်လင့်ခဲ့ကြသော အကျွန်ုပ်တို့သည် ဘုရားရှင်၏ ဘုန်းအသရေတော်ကိုချီးမွမ်းကြစို့။ 13သင်တို့သည်လည်း သင်တို့အတွက်ကယ်တင်ခြင်းတည်းဟူသောမင်္ဂလာသတင်းကောင်းကိုလည်းကောင်း၊ မှန်ကန်သောသတင်းစကားကိုလည်းကောင်းကြားသိခဲ့ကြပြီးဖြစ်သည်။ သင်တို့သည်ယေရှုခရစ်တော် အားယုံကြည်ခြင်းရှိကြပြီး ယေရှုခရစ်တော်နှင့်တစ်လုံးတစ်ဝတည်းဖြစ်ကြသောကြောင့် ဘုရားရှင်ကတိတော် ထားရှိသည့်အတိုင်း ဉာဏ်အလင်းတော်ဖြင့်တံဆိပ်ခတ်နှိပ်ခြင်းခံကြရပြီဖြစ်သည်။ 14ဉာဏ်အလင်းတော်သည် အကျွန်ုပ်တို့အားကောင်းမွန်သောအရာများကိုပေးအပ်မည်ဟူသော ဘုရားရှင်၏ ကတိတော်ကို အာမခံပေးသောအာမခံချက်ပင်ဖြစ်သည်။ ဘုရားရှင်သည်အလွန်ကြီးမြတ်တော်မူသောကြောင့် အကျွန်ုပ်တို့ဘုရားရှင်အားချီးမွမ်းကြပါစို့။ 15ထို့ကြောင့် ယေရှုခရစ်တော်အပေါ်ထားသော သင်တို့၏ ယုံကြည်ခြင်းနှင့် ယုံကြည်သူများအပေါ် ထားသော သင်တို့၏ ချစ်ခြင်းမေတ္တာအကြောင်းတို့ကို ကြားသိရသဖြင့် 16အကျွန်ုပ်သည် သင်တို့အတွက် ဘုရားရှင်၏ကျေးဇူးတော်အားအစဉ်မပြတ်ချီးမွမ်း၍ သတိတရ ဆုတောင်းပေးနေသည်။ 17အကျွန်ုပ်ဆုတောင်းသည်က အကျွန်ုပ်တို့၏အရှင်ယေရှုခရစ်တော်၏ ဘုရားရှင်ဖြစ်တော်မူသည့် ဘုန်းကြီးသော အဖခမည်းတော်သည် ဝိညာဉ်ရေးဆိုင်ရာဉာဏ်ပညာနှင့် ဗျာဒိတ်တော်ကို သင်တို့အား ပေးသနားတော်မူရန်ဖြစ်သည်။ သို့မှသာ သင်တို့သည် ခမည်းတော်အကြောင်းကို ပို၍သိကြမည်ဖြစ်သည်။ 18ဘုရားရှင်သည် သင်တို့၏စိတ်နှလုံးမျက်စိကိုပွင့်လင်းစေ၍ ခေါ်ယူတော်မူခြင်းနှင့်ဆိုင်သောမျှော်လင့်ခြင်းသည် မည်သည့်အရာဖြစ်သည်ကိုလည်းကောင်း၊ သန့်ရှင်းသူတို့ခံရမည့်အမွေတော်သည် ဘုန်းအသရေနှင့် မည်မျှကြွယ်ဝသည်ကိုလည်းကောင်း၊ 19ကိုယ်တော်၏အစွမ်းသတ္တိနှင့်ပြည့်စုံသော တန်ခိုးအရှိန်အဝါ၏လုပ်ဆောင်မှုအားဖြင့် ယုံကြည်သောငါတို့အပေါ်သက်ရောက်သည့် ကိုယ်တော်၏တန်ခိုးသည် မည်မျှထူးကဲကြီးမားသည်ကိုလည်းကောင်း သင်တို့အားသိစေရန်တောင်းလျှောက်၏။ 20ထိုတန်ခိုးတော်ဖြင့် ဘုရားရှင်သည် ယေရှုခရစ်တော်အားသေရာမှပြန်လည်ရှင်သန်ထမြောက်စေတော်မူ၍ ရွှေမြို့တော်တွင် မိမိ၏လက်ယာတော်၌ စံမြန်းစေတော်မူသောအခါ၌ ပြသတော်မူသော တန်ခိုးပင်ဖြစ်သည်။ 21ထိုရွှေမြို့တော်တွင် ယေရှုခရစ်တော်သည် အုပ်ချုပ်သူများ၊ အာဏာပိုင်များ၊ တန်ခိုးရှင်များနှင့် အရှင်သခင် အပေါင်းတို့အားအုပ်ချုပ်တော်မူမည်ဖြစ်သည်။ ကိုယ်တော်၏နာမတော်သည် ယခုမျက်မှောက်ကာလ၌သာမက အနာဂတ်ကာလပင် ခေါ်ဝေါ်ခြင်းခံရသည့်ဘွဲ့နာမများအားလုံး၏အထက်တွင်ရှိတော်မူသည်။ 22ဘုရားရှင်သည်ခပ်သိမ်းသောအရာတို့ကို ယေရှုခရစ်တော်၏ခြေဖဝါးတော်အောက်တွင်ချထား၍ ကိုယ်တော်အားအသင်းတော်အတွက် ဦးခေါင်းအဖြစ်ခန့်အပ်ထားတော်မူသည်။ 23ထိုအသင်းတော်သည် ခပ်သိမ်းသောအရာတို့၌ နည်းလမ်းအမျိုးမျိုးဖြင့်အလုံးစုံပြည့်ဝစေတော်မူသောအရှင်၏ပြည့်စုံခြင်းတည်းဟူသော ယေရှုခရစ်တော်၏ကိုယ်ခန္ဓာတော်ပင်ဖြစ်သည်။
Currently Selected:
Ephesians 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
