Colossians 3
3
1သင်တို့သည် ယေရှုခရစ်တော်နှင့်အတူ အသက်ပြန်လည်ရှင်သန်ထမြောက်စေပြီးဖြစ်သောကြောင့် သင်တို့၏နှလုံးသားသည် ဘုရားရှင်၏လက်ယာတော်ဘက်တွင်ထိုင်တော်မူသော ယေရှုခရစ်တော်ရှိရာအရပ်ဖြစ်သည့် ရွှေမြို့တော်ကိုလိုချင်တောင်းတမှုရှိရမည်ဖြစ်သည်။ 2ရွှေမြို့တော်တွင်ရှိသော အရာများကိုသာအာရုံစူးစိုက်ထားရမည်။ ဤလောကတွင်ရှိသောအရာများကို အာရုံစူးစိုက်မူမရှိကြနှင့်။ 3အဘယ်ကြောင့်ဆိုသော်သင်တို့သည်သေလွန်ပြီးပြီဖြစ်၍ သင်တို့၏ဘဝအသစ်မှာ ယေရှုခရစ်တော်၏ လက်ထဲတွင်ဝှက်ထားလျက်ရှိသောကြောင့်ဖြစ်သည်။ 4ယေရှုခရစ်တော်သည် သင်တို့၏အသက်ဖြစ်သည်။ ယေရှုခရစ်တော်ပြန်လည်ကြွလာသောအခါ သင်တို့သည် အောင်ပွဲခံလျှက်မျှဝေခံစားရကြလိမ့်မည်။ 5ထို့ကြောင့် သင်တို့သည် ကာမဂုဏ်လိုက်စားခြင်း၊ ညစ်ညမ်းသောအမှုကိုလုပ်ခြင်း၊ တဏှာစိတ်ပြင်းပြခြင်း၊ မကောင်းမှုပြုလိုစိတ်ရှိခြင်း၊ လောဘကြီးခြင်းနှင့် ရုပ်ထုကိုးကွယ်ခြင်းစသည့် ဤလောကရှိအကျင့်တို့ကို ပြုလုပ်ခြင်းမှရပ်တန့်ကြပါ။ 6အဘယ်ကြောင့်ဆိုသော် လူတို့သည်ထိုအကျင့်များကိုကျင့်ကြံကြသောကြောင့် ဘုရားရှင်ကိုပြင်းထန်စွာအပြစ် ပေးလိမ့်မည်ဖြစ်သောကြောင့်ဖြစ်သည်။ 7သင်တို့ကိုယ်တိုင်သည်လည်း ထိုကဲ့သို့သောအပြစ်ဒုစရိုက်များကိုကျူးလွန်သော ဘဝမျိုးဖြင့်နေထိုင်ခဲ့ကြသည်။ 8သိုသော်ယခုတွင်သင်တို့သည် ဒေါသထွက်ခြင်း၊ စိတ်ဆိုးခြင်း၊ မုန်းတီးခြင်း၊ စော်ကားပြောဆိုခြင်း၊ ညစ်ညမ်းသောစကားများကိုပြောဆိုခြင်းစသည့်အကျင့်များကို ဖယ်ရှားကြလော့။ 9တစ်ဦးနှင့်တစ်ဦးမလိမ်လည်ကြနှင့်။ သင်တို့သည်ထိုအကျင့်များနှင့်တကွသင်တို့၏လူဟောင်းကိုချွတ်ပစ်ပြီး 10လူအသစ်ကိုပြောင်းလဲဝတ်ဆင်ကြပါ။ သင်တို့သည် သင့်အား ဖန်ဆင်းသောသူကဲ့သို့ဖြစ်လာသည်။ ထိုအသစ်သောအသက်တာသည် သင်တို့အားဘုရားရှင်၏စစ်မှန်သောအသိဉာဏ်ပညာကိုပေးတော်မူသည်။ 11အသစ်သောအသက်တာတွင် ဂရိလူမျိုးဟူ၍သောလည်းကောင်း၊ ဂျူးလူမျိုးဟူ၍သော်လည်းကောင်း၊ အရေဖျားလှီးမင်္ဂလာပြုလုပ်ထားသောသူဟူ၍လည်းကောင်း၊ အရေဖျားလှီးမင်္ဂလာမပြုလုပ်ထားသောသူဟူ ၍လည်းကောင်း၊ တိုင်းတစ်ပါးသားဟူ၍လည်းကောင်း၊ လူရိုင်းများဟူ၍လည်းကောင်း၊ အစေခံဟူ၍လည်းကောင်း၊ ယေရှုခရစ်တော်သည်သာ အလွန်အရေးကြီးသောသူဖြစ်ပြီး အကျွန်ုပ်တို့အားလုံးထဲတွင်ကိန်းအောင်းတော်မူသည်။ 12ထို့ကြောင့်သင်တို့သည်ဘုရားရှင်ရွေးချယ်ထားသောသူများ၊ မြင့်မြတ်သောသူများ၊ ချစ်မြတ်နိုးရသောသူများ ဖြစ်သည့်အလျောက် မေတ္တာထားခြင်း၊ သနားကြင်နာခြင်း၊ နှိမ့်ချခြင်း၊ နူးညံ့သိမ်မွေ့ခြင်း၊ စိတ်ရှည်ခြင်းတို့ရှိကြ လော့။ 13အချင်းချင်းသည်းခံကြပြီး တစ်ဦးပေါ်တစ်ဦးအပြစ်တင်စရာများရှိလျှင်ခွင့်လွှတ်ကြလော့။ အရှင်သည်သင်တို့အားခွင့်လွှတ်သကဲ့သို့ သင်တို့သည်လည်းအခြားသောသူများကိုခွင့်လွှတ်ကြလော့။ 14အထက်ပါအရာအားလုံးထက်အရေးကြီးဆုံးအရာသည် တစ်ဦးကိုတစ်ဦးမေတ္တာထားသင့်ခြင်းပင်ဖြစ်သည်။ တစ်ဦးကိုတစ်ဦးမေတ္တာထားခြင်းသည် သင်တို့အားစည်းလုံးညီညွတ်စေသည်ဖြစ်သည်။ 15ယေရှုခရစ်တော်ငြိမ်သက်ခြင်းအားသင်တို့၏စိတ်နှလုံးထဲတွင်ရှိစေကြလော့။ ဤသဘောအရ သင်တို့သည်ကိုယ်ခန္ဓာတစ်ခုတည်း၌ ငြိမ်သက်ခြင်း ရှိစေရမည်။ အစဉ်အမြဲဘုရားရှင်၏ကျေးဇူးတော်ကို ချီးမွမ်းကြလော့။ 16ယေရှုခရစ်တော်သွန်သင်သော တရားတော်ကို သင်တို့အထဲ၌အပြည့်အဝရှင်သန်ပါစေ။ ဉာဏ်ပညာအမျိုးမျိုးဖြင့် အချင်းချင်း သွန်သင်လမ်းပြကြလော့။ ဆာလံသီချင်း၊ ဓမ္မသီချင်း၊ ဝိညာဉ်ရေးရာသီချင်းများကို ဘုရားရှင်အားကျေးဇူးတင်သောစိတ်နှလုံးဖြင့်သီဆိုကြလော့။ 17သင်တို့သည် မည်သည့်အရာကိုမဆိုပြောလျှင်သော်လည်းကောင်း၊ လုပ်လျှင်သော်လည်းကောင်း အရှင်ယေရှုခရစ်တော်၏နာမအားဖြင့်အရာအားလုံးကိုလုပ်ဆောင်ကြပါ။ 18ဇနီးမယားတို့သည် လင်ယောကျာ်းတို့၏အုပ်စိုးခြင်းကိုခံယူကြလော့။ အဘယ်ကြောင့်ဆိုသော်၎င်းသည် ဘုရားရှင်၏နောက်လိုက်ပြုမူနေထိုင်သည့်အပြုအမူပင်ဖြစ်သည်။ 19လင်ယောကျာ်းသည်လည်း ဇနီးမယားကို ဆူပူသောင်းကျန်းခြင်း မပြုရ။ သူတို့အပေါ်ချစ်မြတ်နိုးကြပြီး နူးညံ့သိမ်မွေ့ခြင်းရှိရမည်။ 20သားသမီးတို့သည်လည်း ဘုရားရှင်နှစ်သက်တော်မူသည့်အတိုင်း အရာခပ်သိမ်း၌ သင်တို့၏မိဘစကားကိုနား ထောင်ကြလော့။ 21ဖခင်ဖြစ်သူတို့သည်လည်း သားသမီးများအပေါ်တွင် စိတ်ဆိုးမာန်ဆိုးဖြင့်မအော်ငေါက်ကြနှင့်။ ထိုသို့ပြုမူလျှင် သူတို့သည်စိတ်အားလျော့သွားကြပေလိမ့်မည်။ 22အစေခံတို့သည်လည်း အရာခပ်သိမ်းတို့၌ သခင်၏အမိန့်ကိုနာခံကြလော့။ မျက်နှာသာရရန်အတွက် သူတို့၏ ရှေ့၌သာကောင်းစွာအလုပ်လုပ်ကြသည်မဟုတ်ပဲ ဘုရားရှင်ကိုရိုသေသောအားဖြင့် ရိုသားသောစိတ်ဖြင့်အလုပ် လုပ်ကြလော့။ 23သင်တို့သည်မည်သည့်အလုပ်ကိုလုပ်သည်မဆို လူတို့အတွက်လုပ်သည်မဟုတ်ဘဲ အရှင့်အတွက်အလုပ်လုပ်သကဲ့သို့ သင်တို့၏စိတ်နှလုံးတစ်ခုလုံးဖြင့်လုပ်ဆောင်ကြလော့။ 24အရှင်သည်သူ၏လူများအားကတိတော်ထားရှိခဲ့သည့်အတိုင်း သင်တို့အားဆုလာဒ်များပေးသနားတော် မူမည်ဖြစ်ပြီး သင်တို့သည်လည်းကောင်းချီးများရကြလိမ့်မည်ဖြစ်ကြောင်းကိုသိကြသောကြောင့် ထိုကဲ့သို့လုပ်ဆောင်ကြလော့။ 25မတရားမှုကိုပြုသောသူသည် သူ၏မတရားမှုအတွက်ပြစ်ဒါဏ်ခံကြရမည်ဖြစ်ပြီး မည်သူမှမျက်နှာသာပေးခြင်းခံရမည်မဟုတ်ပေ။
Currently Selected:
Colossians 3: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
