2 Corinthians 5
5
1အကျွန်ုပ်တို့၏ ကိုယ်ခန္ဓာသည် ဤကမ္ဘာပေါ်တွင် အကျွန်ုပ်တို့နေထိုင်သော ယာယီတဲနှင့်တူသည်။ ဤယာယီတဲပျက်စီးသွားလျှင် ရွှေမြို့တော်တွင် လူ့လက်ဖြင့်မဆောက်လုပ်ဘဲ ဘုရားရှင်ဖန်ဆင်းတော်မူသည့် ထာဝရအိမ်တော်နှင့် တူသောကိုယ်ခန္ဓာအသစ်ရှိကြောင်းကို အကျွန်ုပ်တို့သိကြသည်။ 2အကျွန်ုပ်တို့သည် ရွှေမြို့တော်ရှိ ကိုယ်ခန္ဓာကိုအဝတ်အသစ်ကဲ့သိုဝတ်ဆင်ရမည့်နေ့အတွက် စိတ်အားထက်သန်စွာ စောင့်မျှော်၍ လက်ရှိကိုယ်ခန္ဓာ၌ညည်းတွားလျက်နေကြသည်။ 3အကျွန်ုပ်တို့သည် ထိုသို့ဝတ်ဆင်ထားကြလျှင် အကျွန်ုပ်တို့သည်အဝတ်ဗလာဖြစ်နေမည်မဟုတ်ပေ။ 4အကျွန်ုပ်တို့သည် ဤရုပ်ခန္ဓာတွင်ရှိနေစဉ် လေးလံသောဝန်ကိုထမ်းရသောကြောင့် ညည်းတွားကြရသည်။ ထိုသို့ ညည်းတွားကြသည်မှာ ဤရုပ်ခန္ဓာမှထွက်ခွာလိုသောကြောင့် မဟုတ်ဘဲ သေတတ်သောအရာကို ထာဝရအသက်ရှင်ခြင်းဖြင့် အစားထိုးနိုင်ရန် ရွှေမြို့တော်ရှိ ကိုယ်ခန္ဓာကိုဝတ်ဆင်လိုသောကြောင့်ဖြစ်သည်။ 5ဤသို့အစားထိုးနိုင်ရန်အတွက် အကျွန်ုပ်တို့ကို ပြင်ဆင်ပေးတော်မူသောအရှင်မှာ ဘုရားရှင်ပင်ဖြစ်သည်။ ဘုရားရှင်သည် အကျွန်ုပ်တို့အားဖြစ်လာမည့်အရာများအတွက် အာမခံချက်ပေးလျက် ဉာဏ်အလင်းတော်ကို စရံအဖြစ်ပေးတော်မူသောဘုရားဖြစ်သည်။ 6ထို့ကြောင့် အကျွန်ုပ်တို့သည်အစဉ်အမြဲယုံကြည်စိတ်ချမှုရှိကြသည်။ ဤကိုယ်ခန္ဓာ၌ အကျွန်ုပ်တို့ရှိနေသရွေ့ ဘုရားရှင်နှင့်ဝေးကွာလျက်ရှိကြောင်းကိုလည်း အကျွန်ုပ်တို့သိကြသည်။ 7အဘယ်ကြောင့်ဆိုသော် အကျွန်ုပ်တို့သည် မြင်ရခြင်းအားဖြင့် မပြုမူမနေထိုင်ဘဲ ယုံကြည်ခြင်းအားဖြင့် ပြုမူနေထိုင်သောကြောင့်ဖြစ်သည်။ 8အကျွန်ုပ်တို့သည် စိတ်ချယုံကြည်မှုရှိ၍ ဤကိုယ်ခန္ဓာကိုစွန့်ခွာပြီးလျှင် ဘုရားရှင်နှင့် အတူနေထိုင်ရန် လိုလားကြသည်။ 9ထို့ကြောင့် ဤကိုယ်ခန္ဓာ၌ရှိနေသည်ဖြစ်စေ၊ စွန့်ခွာသည်ဖြစ်စေ အကျွန်ုပ်တို့၏ ရည်မှန်းချက်မှာ ကိုယ်တော်အား နှစ်သက်စေတော်မူရန်ဖြစ်သည်။ 10အဘယ်ကြောင့်ဆိုသော် အကျွန်ုပ်တို့အားလုံးသည် တရားစီရင်ခြင်းကိုခံရန် ယေရှုခရစ်တော်၏တရားပလ္လင်တော်ရှေ့သို့ရောက်ရှိရကြမည်ဖြစ်သောကြောင့်ဖြစ်သည်။ ကိုယ်ခန္ဓာနေအိမ်၌ရှိနေစဉ်ပြုကျင့်ခဲ့သည့်ကောင်းမှုမကောင်းမှုများအတွက် ထိုက်သင့်ရာအကျိုးအပြစ်ကို အကျွန်ုပ်တို့အသီးသီးခံကြရမည်ဖြစ်သည်။ 11အကျွန်ုပ်တို့သည် အဘယ်ကြောင့်ဘုရားရှင်ကို ကြောက်ရွံ့ရကြောင်းကိုသိသဖြင့် အခြားသူများအား ဘုရားရှင်ထံတော်သို့ လှည့်ပြန်ရန်တိုက်တွန်းစည်းရုံးကြသည်။ ကျွန်ုပ်တို့အကြောင်းကိုမူ ဘုရားရှင်အကြွင်းမဲ့သိတော်မူ၍ အကျွန်ုပ်တို့မှာ မည်ကဲ့သို့သောသူများဖြစ်သည်ကို သင်တို့၏စိတ်ထဲ၌ အကြွင်းမဲ့သိကြမည်ဟုမျှော်လင့်ပါသည်။ 12အကျွန်ုပ်တို့သည် သင်တို့၏ရှေ့၌ တစ်ဖန်မိမိကိုယ်ကိုယ်ထောက်ခံချီးမွမ်းနေကြသည်မဟုတ်ပေ။ အကျွန်ုပ်တို့အတွက် သင်တို့ဂုဏ်ယူနိုင်ရန်အခွင့်ပေးနေခြင်းသာဖြစ်သည်။ သို့မှသာ အတွင်းစိတ်ကိုမကြည့်ဘဲ အပြင်ပန်းပုံသဏ္ဌာန်ကိုသာကြည့်၍ ဂုဏ်ယူတတ်သောသူတို့၏စကားကိုသင်တို့ပြန်လည်ချေပနိုင်မည်ဖြစ်သည်။ 13အကျွန်ုပ်တို့သည်ရူးသွပ်နေလျှင် ဘုရားရှင်အတွက်ဖြစ်သည်။ အကယ်၍ ရူးသွပ်ခြင်းမရှိလျှင်လည်း မိမိတို့အဖို့သာဖြစ်သည်။ 14ယေရှုခရစ်တော်၏ ချစ်ခြင်းမေတ္တာသည် အကျွန်ုပ်တို့ကိုလွှမ်းမိုးလျက်ရှိသည်။ တစ်ယောက်သောသူသည် လူအပေါင်းတို့အတွက် အသေခံလျှင် လူအပေါင်းတို့သည် ထိုသူနှင့်အတူအသေခံကြောင်းကို အကျွန်ုပ်တို့သိကြပြီ ဖြစ်သည်။ 15ထိုသို့ လူအပေါင်းတို့အတွက် ကိုယ်တော်အသေခံတော်မူခြင်းမှာ အသက်ရှင်သောသူတို့သည် မိမိကိုယ်ကျိုးအတွက် အသက်မရှင်ဘဲ မိမိတို့အတွက်အသေခံပြီး တစ်ဖန်ရှင်ပြန်ထမြောက်တော်မူသော ကိုယ်တော့်အတွက် အသက်ရှင်ရန်ဖြစ်သည်။ 16ထို့ကြောင့် ယခုမှစ၍ အကျွန်ုပ်တို့သည် မည်သူ့ကိုမျှလူတို့စံနှုန်းအရအကဲမဖြတ်ကြတော့ပေ။ တစ်ချိန်က အကျွန်ုပ်တို့သည် ယေရှုခရစ်တော်ကို လူတို့၏စံနှုန်းဖြင့်အကဲဖြတ်ခဲ့က်သော်လည်း ယခုတွင်မူ ထိုသို့အကဲမဖြတ်ကြတော့ပေ။ 17မည်သူမဆို ယေရှုခရစ်တော်နှင့် တပေါင်းတစည်းတည်းဖြစ်လျှင် အသစ်ဖန်ဆင်းခံရသူဖြစ်သည်။ ထိုသူ၏ ဘဝဟောင်းသည် ပြီးဆုံးသွားပြီဖြစ်ပြီး ဘဝသစ်အစပြုခြင်းဖြစ်သည်။ 18ဤအရာအားလုံးသည် ဘုရားရှင်ပြုတော်မူသောအမှုပင်ဖြစ်သည်။ ဘုရားရှင်သည် ယေရှုခရစ်တော်အားဖြင့် အကျွန်ုပ်တို့ကို မိမိနှင့်ပြန်လည်သင့်မြတ်စေတော်မူပြီးလျှင် အခြားသောသူတို့ကို မိမိနှင့် ပြန်လည်သင့်မြတ်စေရန်အတွက် ဆောင်ရွက်ရမည့်တာဝန်ကိုလည်းပေးတော်မူသည်။ 19ဤသို့ဖြင့် ဘုရားရှင်သည် လူအပေါင်းတို့၏ အပြစ်ဒုစရိုက်များကိုမှတ်တော်မမူဘဲ ယေရှုခရစ်တော်အားဖြင့် မိမိနှင့်ပြန်လည်သင့်မြတ်စေတော်မူသည်။ ဘုရားရှင်သည် ပြန်လည်သင့်မြတ်ခြင်းတရားကို ဟောပြောရန် အကျွန်ုပ်တို့အားတာဝန်ပေးတော်မူသည်။ 20သို့ဖြစ်၍အကျွန်ုပ်တို့သည်ယေရှုခရစ်တော်၏သာဝကအနေဖြင့်သင်တို့အားမေတ္တာရပ်ခံအပ်ပါသည်။ ဘုရား ရှင်ကိုယ်တော်တိုင်ပင်လျှင် အကျွန်ုပ်တို့မှတစ်ဆင့်သင်တို့ကိုမေတ္တာရပ်သကဲ့သို့သင်တို့အားမေတ္တာရပ်ခံအပ် ပါသည်။ သင်တို့သည်ဘုရားရှင်၏ ရန်သူများအဖြစ်မှမိတ်ဆွေများအဖြစ်သို့ပြောင်းလဲကြပါဟု ယေရှုခရစ်တော်၏ ကိုယ်စား အကျွန်ုပ်တို့တောင်ဆိုပါသည်။ 21ယေရှုခရစ်တော်သည်အပြစ်ကင်းစင်တော်မူသောအရှင်ဖြစ်သည်။ သို့ရာတွင်အကျွန်ုပ်တို့သည် ယေရှုခရစ် တော်နှင့်တစ်လုံးတစ်ဝတည်းဖြစ်လျက်ဘုရားရှင်ကဲ့သို့ကောင်းမြတ်နိုင်ကြစေရန် ဘုရားရှင်သည် ယေရှုခရစ်တော်အား အကျွန်ုပ်တို့အတွက်ကြောင့် အကျွန်ုပ်တို့ကဲ့သို့အပြစ်ရှိသူဖြစ်စေတော်မူသည်။
Currently Selected:
2 Corinthians 5: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
