2 Corinthians 13
13
1ယခု အကျွန်ုပ်သည် တတိယအကြိမ် သင်တို့ထံသို့လာခဲ့မည်ဖြစ်သည်။ ကျမ်းစာ၌ “အမှုကိစ္စမှန်သမျှကို သက်သေနှစ်ဦး၊ သို့မဟုတ် သုံးဦးတို့၏ထွက်ဆိုချက်အရအတည်ပြုဆုံးဖြတ်ရမည်” ဟုရေးသားထားသည်။ 2ဒုတိယအကြိမ် အကျွန်ုပ်သင်တို့နှင့်အတူရှိခဲ့စဉ်က ယခင်အပြစ်ကျူးလွန်သူများနှင့် အခြားသူအပေါင်းတို့အား နောက်တစ်ကြိမ် ရောက်လာလျှင် ညှာတာမည်မဟုတ်ဟု သတိပေးခဲ့သည့်အတိုင်း ယခုအဝေး၌ရှိစဉ်တွင်လည်း ထပ်မံ၍ သတိပေးလိုက်ပါသည်။ 3ယေရှုခရစ်တော်သည် အကျွန်ုပ်အားဖြင့်မိန့်တော်မူသည်ဟူသောသက်သေကို သင်တို့တောင်းဆိုသည့်အတိုင်း အကျွန်ုပ်ပြပါမည်။ ကိုယ်တော်သည် သင်တို့ကိုအပြစ်ပေးရာ၌ဖြစ်စေ၊ ကူညီမစရာ၌ဖြစ်စေအားနည်းတော်မူခြင်း မရှိခဲ့ပါ။ တန်ခိုးတော်သည် သင်တို့၏အလယ်၌ အားကြီးတော်မူသည်။ 4ကိုယ်တော်သည်လက်ဝါးကပ်တိုင်တွင်အသတ်ခံရစဉ်အခါ၌စွမ်းအားနည်းသည့်အခြေအနေ၌ ရှိတော်မူခဲ့သော်လည်း၊ ယခုအခါဘုရားရှင်၏တန်ခိုးတော်အားဖြင့်အသက်ရှင်လျက်နေတော်မူလေသည်။ အကျွန်ုပ်တို့သည်လည်းကိုယ်တော်နှင့်တစ်လုံးတစ်ဝတည်းရှိသဖြင့်စွမ်းအားနည်းကြရသည်။ သို့သော် အကျွန်ုပ်တို့သည်ဘုရားရှင်၏တန်ခိုးတော်အားဖြင့် ယေရှုခရစ်တော်နှင့်အတူအသက်ရှင်ကြလိမ့်မည်ဖြစ်သည်။ 5သင်တို့သည် ယုံကြည်ခြင်း၌ တည်သောသူများဖြစ်သည်၊ မဖြစ်သည်ကို မိမိကိုယ်ကိုဆန်းစစ်ကြလော့။ မိမိကိုယ်ကို စစ်ဆေးကြလော့။ ယေရှုခရစ်တော်သည် သင်တို့အထဲ၌ ကိန်းဝပ်တော်မူကြောင်း သင်တို့မသိကြသလော။ စစ်ဆေးရာတွင်ကျရှုံးလျှင်မူ ယေရှုခရစ်တော်သည် သင်တို့အထဲ၌ကိန်းဝပ်တော်မူ မည်မဟုတ်ပေ။ 6အကျွန်ုပ်တို့သည် စစ်ဆေးရာတွင်ကျရှုံးမည်မဟုတ်ကြောင်းကို သင်တို့သိကြလိမ့်မည်ဟု အကျွန်ုပ်မျှော်လင့်ပါသည်။ 7သင်တို့သည် မကောင်းသောအမှုကိုမပြုမိစေရန် ဘုရားရှင်ထံ အကျွန်ုပ်တို့ဆုတောင်းပါသည်။ ဤသို့ဆုတောင်းရခြင်းမှာ စစ်ဆေးခြင်းကို အကျွန်ုပ်တို့အောင်မြင်ကြောင်းပေါ်လွင်စေလို၍မဟုတ်ပါ။ အကျွန်ုပ်တို့သည် စစ်ဆေးခြင်းကို ကျရှုံးသောသူများကဲ့သို့ဖြစ်နေလျှင်ပင် သင်တို့အားကောင်းသောအမှုကို ပြုစေလိုခြင်းဖြစ်သည်။ 8အကျွန်ုပ်တို့သည် သမ္မာတရားကိုဆန့်ကျင်၍ မည်သည့်အမှုကိုမျှမပြုနိုင်ကြ။ သမ္မာတရားဘက်၌ နေ၍သာ ပြုနိုင်ကြသည်။ 9အကျွန်ုပ်တို့အားနည်းနေလျှင်ပင် သင်တို့အားကြီးပါက အကျွန်ုပ်တို့ဝမ်းမြောက်ပါသည်။ အကျွန်ုပ်တို့ဆုတောင်းသည်မှာ သင်တို့၌အပြစ်ဆိုဖွယ်မရှိသည်အထိ ဘုရားရှင်သည် ပြုပြင်ပေးတော်မူရန်ဖြစ်သည်။ 10အကျွန်ုပ်ရောက်လာသောအခါ အကျွန်ုပ်အား ဘုရားရှင်ပေးတော်မူသည့်အခွင့်အာဏာကို ပြင်းထန်စွာ အသုံးမပြုလိုသောကြောင့် သင်တို့ထံမလာမီ ဤအကြောင်းအရာများကိုရေးလိုက်ပါသည်။ ဘုရားရှင် ပေးတော်မူသည့် ထိုအခွင့်အာဏာမှာ သင်တို့အားဖြိုဖျက်ရန်မဟုတ်ဘဲ တည်ဆောက်ရန်သာဖြစ်သည်။ 11နိဂုံးချုပ်စကားဆိုရလျှင် အကျွန်ုပ်၏ညီအစ်ကိုမောင်နှမတို့၊ ဝမ်းမြောက်ကြလော့။ သင်တို့၌ အပြစ်ဆိုဖွယ်မရှိသည်အထိ ဘုရားရှင်သည်ပြုပြင်ပေးတော်မူရန် အခွင့်ပေးကြလော့။ အကျွန်ုပ်၏ နှိုးဆော်ချက်ကို နားထောင်ကြလော့။ တစ်စိတ်တစ်ဝမ်းတည်းရှိလျက် သင့်မြတ်စွာနေကြလော့။ မေတ္တာတရားနှင့် ငြိမ်းချမ်းခြင်းတို့၏ အရှင်ဖြစ်တော်မူသော ဘုရားရှင်သည် သင်တို့နှင့်အတူရှိတော်မူလိမ့်မည်ဖြစ်သည်။ 12အချင်းချင်း တစ်ယောက်ကိုတစ်ယောက် သန့်ရှင်းသောအနမ်းဖြင့်နှုတ်ဆက်ကြလော့။ 13ဘုရားရှင်ကို ယုံကြည်ကြသည့် ဤနေရာ၌ရှိသောသူအပေါင်းတို့သည် သင်တို့ကိုနှုတ်ဆက်လိုက်ကြပါသည်။ 14အရှင်ဖြစ်တော်မူသောယေရှုခရစ်တော်၏ကျေးဇူးတော်၊ ဘုရားရှင်၏ မေတ္တာတော်နှင့် ဉာဏ်အလင်းတော်၏ မိတ်သဟာယဖွဲ့ခြင်းတို့သည် သင်တို့အားလုံးနှင့်အတူရှိပါစေသော်။
Currently Selected:
2 Corinthians 13: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
