2 Corinthians 12
12
1ကြွားဝါခြင်းသည် အကျိုးမရှိသော်လည်း အကျွန်ုပ်ဆက်လက်၍ကြွားဝါရမည်။ ယခုတွင်မူ ဘုရားရှင်ထံမှ ရူပါရုံနှင့် ဗျာဒိတ်တော်အကြောင်းကိုပြောဦးမည်။ 2ယေရှုခရစ်တော်၏တပည့်တော်တစ်ဦးသည် လွန်ခဲ့သောတစ်ဆယ့်လေးနှစ်က ရွှေမြို့တော်တတိယအဆင့်ထိတိုင်အောင်ချီဆောင်ခြင်းကိုခံရသည်ကိုအကျွန်ုပ်သိသည်။ 3သူသည် ကိုယ်ခန္ဓာပါလျက်ချီဆောင်ခြင်းခံရသလော၊ မပါဘဲချီဆောင်ခြင်းခံရသလောအကျွန်ုပ်မသိပါ။ ဘုရားရှင်သာသိတော်မူသည်။ 4သူသည် ပရဒိသုဘုံထဲသို့ ချီဆောင်ခြင်းခံရသည်။ သူသည် လူတို့ပြောခွင့်မရှိ၊ ပြောပြ၍လည်းမရနိုင်သောစကားတို့ကိုကြားခဲ့ရသည်။ 5ထိုသို့သောသူ၏အကြောင်းကို အကျွန်ုပ်ကြွားဝါပါမည်။ အကျွန်ုပ်နှင့်ပတ်သက်လျှင်မူ အကျွန်ုပ်၏ အားနည်းခြင်းအကြောင်းမှလွဲ၍ ကြွားဝါမည်မဟုတ်ပေ။ 6အကျွန်ုပ်ကြွားဝါလိုလျှင်လည်း အမှန်ကိုသာပြောဆိုမည်ဖြစ်သောကြောင့် မိုက်မဲသောသူဖြစ်မည်မဟုတ်။ သို့သော် မည်သူကမျှ အကျွန်ုပ်ကိုမြင်ရသည်ထက် သို့မဟုတ် အကျွန်ုပ်ထံမှကြားရသည်ထက် ပို၍ အထင်မကြီးမိစေရန် အကျွန်ုပ်မကြွားဝါဘဲနေမည်ဖြစ်သည်။ 7အကျွန်ုပ်ရရှိသည့် ဗျာဒိတ်တော်မှာအလွန်ထူးမြတ်သောကြောင့် မိမိကိုယ်ကိုယ်အထင်မကြီးမိစေရန် အကျွန်ုပ်၏ကိုယ်ခန္ဓာထဲ၌ ဆူးတစ်ခုကိုပေးတော်မူသည်။ ထိုဆူးမှာ အကျွန်ုပ်သည် မိမိကိုယ်ကိုယ် အထင်မကြီးမိစေရန် အကျွန်ုပ်ကိုဒုက္ခပေးသည့် မာရ်နတ်၏ စေတမန်ပင်ဖြစ်သည်။ 8ထိုဆူးကို ဖယ်ရှားပေးတော်မူရန် ဘုရားရှင်ထံ သုံးကြိမ်တိုင်တိုင် အကျွန်ုပ်အသနားခံခဲ့သည်။ 9သို့သော် ကိုယ်တော်သည် “ငါ၏ကျေးဇူးတော်သည် သင့်အတွက်လုံလောက်ပေသည်။ အဘယ်ကြောင့်ဆိုသော် ငါ၏တန်ခိုးသည် အားနည်းခြင်းအဖြစ်၌ ပြည့်စုံတတ်သည်” ဟုအကျွန်ုပ်အားမိန့်တော်မူခဲ့သည်။ ထို့ကြောင့် ယေရှုခရစ်တော်၏တန်ခိုးသည် အကျွန်ုပ်အပေါ်တည်နေမည့်အကြောင်း အကျွန်ုပ်သည် အကျွန်ုပ်၏အားနည်းခြင်း၌ပို၍ဝမ်းမြောက်စွာကြွားဝါမည်။ 10သို့ဖြစ်၍ ယေရှုခရစ်တော်အတွက်ကြောင့်ခံရသော အားနည်းခြင်း၊ ကဲ့ရဲ့ခြင်း၊ ကျပ်တည်းခြင်း၊ ညှဉ်းပန်းနှိပ်စက်ခြင်းနှင့် ခက်ခဲခြင်းတို့ကို အကျွန်ုပ်ကျေနပ်သည်။ အဘယ်ကြောင့်ဆိုသော် အကျွန်ုပ်သည် အားနည်းသောအခါ ယေရှုခရစ်တော်၏တန်ခိုးအားဖြင့် အားကြီးလျက်ရှိသောကြောင့်ဖြစ်သည်။ 11သင်တို့သည် အကျွန်ုပ်ကိုမိုက်မဲသောသူဖြစ်စေရန် တွန်းပို့သဖြင့် အကျွန်ုပ်သည်မိုက်မဲသောသူဖြစ်လာရသည်။ အမှန်စင်စစ် သင်တို့သည် အကျွန်ုပ်ကိုချီးမွမ်းသင့်သည်။ အဘယ်ကြောင့်ဆိုသော် အကျွန်ုပ်သည် ရိုးရိုးသာမာန်လူဖြစ်သော်လည်း ထိပ်တန်းသာဝကများထက် အနည်းငယ်မျှပင် မညံ့သောကြောင့်ဖြစ်သည်။ 12အကျွန်ုပ်သည် သာဝကဖြစ်ကြောင်းကို သင်တို့နှင့်အတူရှိစဉ် လက္ခဏာများနှင့်တကွသက်သေပြခဲ့သည်။ အကျွန်ုပ်သည် နိမိတ်လက္ခဏာများ၊ အံ့ဖွယ်ဖြစ်ရပ်များနှင့် အံ့ဖွယ်တန်ခိုးများဖြင့် သင်တို့အား စိတ်ရှည်စွာပြခဲ့သည်။ 13အကျွန်ုပ်အား ငွေကြေးထောက်ပံ့ရသော ဝန်ထုပ်ဝန်ပိုးကို သင်တို့အားမပေးခဲ့ခြင်းမှလွဲ၍ သင်တို့သည် အခြားအသင်းတော်များထက် ဂုဏ်ငယ်စရာအကြောင်းမရှိပေ။ ဤသို့မမျှမတပြုခဲ့သည့်အတွက် အကျွန်ုပ်ကို ခွင့်လွှတ်ကြပါ။ 14ယခု အကျွန်ုပ်သည် သင်တို့ထံသို့ တတိယအကြိမ်လာရန်အသင့်ရှိသည်။ သို့သော် သင်တို့အတွက် ဝန်ထုပ်ဝန်ပိုးဖြစ်စေမည်မဟုတ်။ အဘယ်ကြောင့်ဆိုသော် အကျွန်ုပ်သည် သင်တို့၏ ငွေကြေးဥစ္စာကို အလိုရှိ၍မဟုတ်ဘဲ သင်တို့ကိုသာအလိုရှိသောကြောင့်ဖြစ်သည်။ သားသမီးတို့သည် မိဘအတွက် ငွေကြေးဥစ္စာကို စုဆောင်းရသည်မဟုတ်။ မိဘတို့ကသာ သားသမီးတို့အတွက်စုဆောင်းရသည်ဖြစ်သည်။ 15ထို့ကြောင့် အကျွန်ုပ်သည် သင်တို့၏စိတ်ဝိညာဉ်အတွက် အကျွန်ုပ်၌ရှိသမျှသောငွေကြေးဥစ္စာများနှင့် စိတ်ရောကိုယ်ပါဝမ်းမြောက်စွာပေးအပ်မည်ဖြစ်သည်။ အကျွန်ုပ်သည် သင်တို့အပေါ် ဤမျှမေတ္တာထားလျှင် အကျွန်ုပ်အပေါ်ထားသော သင်တို့၏မေတ္တာသည် လျော့ပါးသွားမည်လော။ 16အကျွန်ုပ်သည် သင်တို့အတွက် ဝန်ထုပ်ဝန်ပိုးမဖြစ်ကြောင်းကို သင်တို့ဝန်ခံကြသည်။ သို့သော် အကျွန်ုပ်သည် ဉာဏ်များသောသူဖြစ်ပြီး သင်တို့၏ငွေကြေးဥစ္စာကို လှည့်စား၍ရယူခဲ့သည်ဟု သင်တို့ထဲမှ တချို့သည် ထင်ကြဆဲဖြစ်သည်။ 17ထိုသို့ဆိုလျှင် သင်တို့ထံသို့ အကျွန်ုပ်စေလွှတ်ခဲ့သောသူတစ်စုံတစ်ယောက်အားဖြင့် သင်တို့အပေါ် အမြတ်ထုတ်ခဲ့ဖူးသလော။ 18အကျွန်ုပ်သည် တိတုကို သင်တို့ထံသွားရန်တိုက်တွန်းပြီး သူနှင့်အတူ အခြားသောညီအစ်ကိုတစ်ယောက်ကို လည်းစေလွှတ်ခဲ့သည်။ တိတုသည် သင်တို့အပေါ်အမြတ်ထုတ်ခဲ့ဖူးသလော။ အကျွန်ုပ်တို့သည် စိတ်သဘောချင်းတူ၍ တစ်လမ်းတည်းလျှောက်ခဲ့ကြသည်မဟုတ်လော။ 19အကျွန်ုပ်တို့သည် မိမိကိုယ်ကိုယ်ကာကွယ်ပြောဆိုနေကြသည်ဟု သင်တို့ တစ်ချိန်လုံးထင်မှတ်နေကြသလော။ အကျွန်ုပ်တို့သည် ယေရှုခရစ်တော်ပြောဆိုစေတော်မူသည့်အတိုင်း ဘုရားရှင်ရှေ့တော်မှောက်၌ပြောဆိုကြသည် ဖြစ်သည်။ ချစ်ရပါသောမိတ်ဆွေတို့၊ အကျွန်ုပ်တို့လုပ်ဆောင်သမျှ အရာရာတိုင်းသည် သင်တို့၏အကျိုးအတွက် သာဖြစ်သည်။ 20အကျွန်ုပ်ရောက်လာသောအခါ သင်တို့ကို အကျွန်ုပ်မြင်တွေ့လိုသည့်အတိုင်း မဖြစ်သကဲ့သို့ အကျွန်ုပ်ကိုလည်း သင်တို့မြင်တွေ့လိုသည့်အတိုင်း မဖြစ်မည်ကို အကျွန်ုပ်စိုးရိမ်သည်။ ခိုက်ရန်ဖြစ်ခြင်း၊ မနာလိုခြင်း၊ ဒေါသကြီးခြင်း၊ တစ်ကိုယ်ကောင်းဆန်ခြင်း၊ အသရေဖျက်ခြင်း၊ ကောလာဟလပြောခြင်း၊ ဘဝင်မြင့်ခြင်း၊ ရုန်းရင်းဆန်ခတ်ဖြစ်ခြင်းစသည်တို့ရှိမည်ကိုစိုးရိမ်သည်။ 21နောက်တစ်ကြိမ် အကျွန်ုပ်ရောက်လာသောအခါ ဘုရားရှင်သည် သင်တို့ရှေ့၌ အကျွန်ုပ်အားအရှက်ရစေတော်မူ လိမ့်မည်လောဟူ၍လည်းကောင်း၊ ယခင်က ကျူးလွန်ခဲ့သည့် စက်ဆုပ်ညစ်ညမ်းခြင်း၊ တရားနှင့်မညီသော မေထုန်ပြုခြင်း၊ ကာမဂုဏ်လိုက်စားခြင်းတို့ကို ယခုတိုင်အောင်ကျူးလွန်လျက် နောင်တမရသေးသောသူများစွာအတွက်ကြောင့် အကျွန်ုပ်ဝမ်းနည်းရမည်လောဟူ၍လည်းကောင် အကျွန်ုပ်စိုးရိမ်ပါသည်။
Currently Selected:
2 Corinthians 12: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
