1 Thessalonians 5
5
1ညီအစ်ကိုမောင်နှမတို့ ထိုအချိန်အခါနှင့် ကာလနေ့ရက်များအကြောင်းကို သင်တို့ထံ စာရေးရန် မလိုအပ်ပေ။ 2အကြောင်းမူကား ညအချိန်တွင် သူခိုးလာသကဲ့သို့ အရှင်၏နေ့ရက်သည် မမျှော်လင့်ဘဲရောက်လာမည်ကို သင်တို့ကောင်းစွာသိကြသောကြောင့် ဖြစ်၏။ 3လူတို့က “ငြိမ်းချမ်း၍ လုံခြုံသည်” ဟု ပြောနေသည့်အချိန်၌ပင် ကိုယ်ဝန်ဆောင်အမျိုးသမီးတွင် ကလေးမွေးဖွားခြင်းဝေဒနာခံစားရသကဲ့သို့ ဘေးအန္တရာယ်သည် သူတို့အပေါ် ရုတ်တရက် ကျရောက်လာပြီး သူတို့သည် လွတ်မြောက်ကြမည်မဟုတ်ပေ။ 4သို့သော်လည်း ညီအစ်ကိုမောင်နှမတို့၊ သင်တို့သည် အမှောင်၌ မရှိသောကြောင့် ထိုနေ့ရက်သည် သင်တို့ထံ သူခိုးကဲ့သို့ အငိုက်ဖမ်းလိမ့်မည်မဟုတ်ပေ။ 5သင်တို့သည် အလင်း၏သားသမီးများ၊ နေ့အချိန်၏သားသမီးများဖြစ်ကြသည်။ ကျွန်ုပ်တို့သည် ညအချိန်နှင့်သော်လည်းကောင်း အမှောင်နှင့်သော်လည်းကောင်း သက်ဆိုင်မှုမရှိပေ။ 6သို့ဖြစ်၍ အခြားသူများအိပ်ပျော်သကဲ့သို့ အိပ်ပျော်မနေဘဲ နိုးနိုးကြားကြားနေလျက် မိမိကိုယ်ကိုစောင့်ထိန်းကြကုန်အံ့။ 7အိပ်ပျော်သောသူတို့သည် ညအချိန်၌ အိပ်ပျော်တတ်ကြ၏။ သေရည်အရက်မူးယစ်သော သူတို့သည်လည်း ညအချိန်၌ မူးယစ်တတ်ကြ၏။ 8သို့သော် ကျွန်ုပ်တို့သည် နေ့အချိန်နှင့်သက်ဆိုင်သောသူများဖြစ်သောကြောင့် မိမိကိုယ်ကိုစောင့်ထိန်းကြလျက် ယုံကြည်ခြင်းနှင့် ချစ်ခြင်းမေတ္တာတို့ကို ရင်အုပ်ကာချပ်ဝတ်အဖြစ် ဝတ်ဆင်ကာ ကယ်တင်ခြင်းတည်းဟူသော မျှော်လင့်ခြင်းကို ခမောက်အဖြစ် ဆောင်းကြကုန်အံ့။ 9အကြောင်းမူကား ဘုရားရှင်သည် ကျွန်ုပ်တို့ကို အမျက်တော်ခံရစေရန် သတ်မှတ်ထားတော်မူသည်မဟုတ်ဘဲ ကျွန်ုပ်တို့၏အရှင် ယေရှုခရစ်တော်အားဖြင့် ကယ်တင်ခံရစေရန် သတ်မှတ်ထားတော်မူခြင်းဖြစ်၏။ 10ကိုယ်တော်သည် ကျွန်ုပ်တို့အတွက် အသေခံတော်မူခဲ့သောကြောင့် ကျွန်ုပ်တို့သည် နိုးလျက်ရှိသည်ဖြစ်စေ၊ အိပ်ပျော်သည်ဖြစ်စေ ကိုယ်တော်နှင့်အတူ အသက်ရှင်ကြမည်ဖြစ်သည်။ 11ထို့ကြောင့် ယခု သင်တို့လုပ်ဆောင်နေသည့်အတိုင်း အချင်းချင်းအားပေးလျက် တစ်ယောက်နှင့်တစ်ယောက် ကူညီတည်ဆောက်ပေးကြလော့။ 12ညီအစ်ကိုမောင်နှမတို့၊ သင်တို့အထဲတွင် အမှုတော်ကို ကြိုးစားဆောင်ရွက်၍ အရှင့်အားဖြင့် ဦးဆောင်ပြီး သင်တို့ကို သတိပေးဆုံးမနေသောသူများကို ရိုသေလေးစားကြရန် ကျွန်ုပ်တို့ တိုက်တွန်းပါ၏။ 13သူတို့လုပ်ဆောင်သည့်အမှုတော်ကိုထောက်၍ ရိုသေချစ်ခင်ကြလော့။ သင်တို့အချင်းချင်း ငြိမ်းချမ်းစွာ နေထိုင်ကြလော့။ 14ထို့ပြင် ညီအစ်ကိုမောင်နှမတို့၊ ပျင်းရိသူများကို သတိပေးဆုံးမကြလော့။ ကြောက်ရွံ့နေသူများကို အားပေးကြလော့။ အားနည်းသူများကို ကူညီကြလော့။ လူတိုင်းအပေါ်တွင် စိတ်ရှည်ကြလော့။ 15အဘယ်သူမျှ ရန်ကိုရန်ချင်း မတုံ့ပြန်ကြနှင့်။ ထို့အစား အချင်းချင်းအတွက်သော်လည်းကောင်း၊ လူအပေါင်းတို့အတွက်သော်လည်းကောင်း အကျိုးရှိသောအရာများကို အမြဲကြိုးစားလုပ်ဆောင်ကြလော့။ 16အစဉ်အမြဲဝမ်းမြောက်ပျော်ရွှင်ကြလော့။ 17အမြဲမပြတ်ဆုတောင်းကြလော့။ 18မည်သည့်အခြေအနေ၌ပင် ဖြစ်စေ ကျေးဇူးတော်ကိုချီးမွမ်းကြလော့။ အကြောင်းမူကား သင်တို့သည် ယေရှုခရစ်တော်အားဖြင့် ထိုသို့ပြုကြရန် ဘုရားရှင်အလိုရှိသောကြောင့်ဖြစ်သည်။ 19ဉာဏ်အလင်းတော်၏ အရှိန်ကို မငြိမ်းစေကြနှင့်။ 20ကြိုတင်ဟောပြောခြင်းတို့အား မထီမဲ့မြင် မပြုကြနှင့်။ 21သို့သော် အရာအားလုံးကို စစ်ဆေးပြီး ကောင်းမွန်သည့် အရာတို့ကို လက်ခံကြလော့။ 22မကောင်းသည့် အရာမှန်သမျှကို ရှောင်ကြလော့။ 23ငြိမ်းချမ်းခြင်း၏အရှင်ဖြစ်သော ဘုရားရှင်ကိုယ်တိုင်သည် သင်တို့ကို အကြွင်းမဲ့သန့်ရှင်းစေတော်မူလိမ့်မည်။ ကျွန်ုပ်တို့၏အရှင် ယေရှုခရစ်တော် ပြန်လည်ကြွလာသည့်အချိန်ထိ သင်တို့၏ ကိုယ်စိတ်နှလုံးအား အပြစ်ဆိုဖွယ်မရှိစေရန် စောင့်ရှောက်ပါစေသော။ 24သင်တို့ကို ခေါ်တော်မူသောအရှင်သည် သစ္စာရှိတော်မူသဖြင့် ထိုအတိုင်း ပြုတော်မူလိမ့်မည်။ 25ညီအစ်ကိုမောင်နှမတို့၊ ကျွန်ုပ်တို့အတွက် ဆုတောင်းပေးကြလော့။ 26ညီအစ်ကိုမောင်နှမအပေါင်းတို့ကို မြင့်မြတ်သန့်ရှင်းသော အနမ်းဖြင့် နှုတ်ဆက်ကြလော့။ 27ဤစာကို ညီအစ်ကိုမောင်နှမအပေါင်းတို့ရှေ့၌ ဖတ်ကြားရန် အရှင်ထံ တိုင်တည်၍ သင်တို့ကို လေးလေးနက်နက် ငါအမိန့်ပေး၏။ 28ကျွန်ုပ်တို့ အရှင်ယေရှုခရစ်တော်၏ ကျေးဇူးတော်သည် သင်တို့နှင့်အတူ ရှိပါစေသော။
Currently Selected:
1 Thessalonians 5: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
