Matthew 6
6
1အဲနော့ ကိုယ်တော်ဟ "နန်းနို့ဟ ကောမြတ်ဝိုလုပ်ဒွေဝို လူဒွေရှေ့မှာဘဲ့ ဟန်ပြလုပ်ဆော်မယ်ဆိုဝါ ရွှေဗြို့တော်မှာရှေ့တော်မူဝို နန်းနို့ရဲ့အဖဘုရားရှင်ဆီဟနေ ကောကျိုးချမ်းသာဒွေဝို ရရှေ့နိုင်မှာမုဝ။ 2အဲဂျော့ နန်းနို့ ပေးကမ်းစွန့်ကြဲဝိုခါမှာ သူတော်ကောယော်ဆော်သူဒွေမျိုး လူဒွေရဲ့ချီးမွမ်းဇာဝို ခံရဝို့တွက် ဓမ္မာရုံဒွေန လမ်းဒွေမှာ တူရိယာဒွေ တီးခတ်ပီး ပေးကမ်းစွန့်ကြဲဇာဝိုပြုဂေ့န။ ဟဲဖြစ်ရိနူးဆိုဝါ အဲမိုလူဒွေဟ လူဒွေရဲ့ချီးမွမ်းဇာဝိုဘဲ့ ရရှေ့ဂေ့လိမယ်ဖြစ်ပြီး ဘုရားရှင်ဆီဟနေ ဟဲရာဆုလာဘ်ဝိုမှ ရနိုင်ဝေါ့မှာမုဝ။ 3အဲဂျော့ နန်းနို့ပေးကမ်းစွန့်ကြဲဝိုခါမှာ နန့်ညာဖက်လက်ဟ လုပ်ဇာမှန်သမျှဝို ဘယ်ဖက်လက်ဝိုဂိုမှ သိပါစေန။ 4အဲခါ နန့်ရဲ့သိုသိစွာပေးကမ်းဇာဝို ဗြင်တော်မူဝို အဖဘုရားရှင်ဟ နန့်ဝို ဆုလာဘ်ဒွေ ပေးသနားတော်မူလိမှာဖြစ်ရယ်။ 5နန်းနို့ ဆုတောဂေ့ဝိုခါမှာ သူတော်ကောယော်ဆော်သူဒွေဝိုမျိုး လူဒွေချီးမွမ်းဇာဝို ခံရဝို့တွက် ဓမ္မာရုံဒွေန လမ်းဆုံဒွေမှာ မတ်တပ်ရပ်ပီး ဆုတောဇာဝို ပြုဂေ့န။ ဟဲဖြစ်ရိနူးဆိုဝါ အဲမိုလူဒွေဟ လူဒွေရဲ့ချီးမွမ်းဇာဝိုဘဲ့ ရရှေ့ဂေ့လိမယ်ဖြစ်ပြီး ဘုရားရှင်ဆီဟနေ ဟဲရာဆုလာဘ်ဝိုမှ ရနိုင်ဝေါ့မှာမုဝ။ 6အဲဖြစ်ရိ သီးသန့်တည်ရှေ့တော်မူဝို အဖဘုရားရှင်ဆီဟနေ နန်ဆုတောဝိုခါမှာ ခန်းခေါ့ပေါ့ဝိုပိပီး ယော့ဒဲ သီးသန့်ဆုတောပါ။ အဲခါ နန်သိုသိုသိသိနလုပ်ဆော်ဝိုဇာဒွေဝို ဗြင်နိုင်ဝို အဖဘုရားရှင်ဟ နန့်ဝို ဆုလာဘ်ဒွေ ပေးသနားတော်မူပါလိမယ်။ 7နန်းနို့ဆုတောဝိုခါမှာ တိုင်းတပါးသားဒွေမျိုး ရယ်မရဖတ်မရဂါးဒွေန ထပ်ခါထပ်ခါဆုတောဇာဝို လုပ်ဂေ့န။ သူ့နို့ဟ အဲမျိုးဆုတောမယ်ဆိုဝါ သူ့နို့ဆုတောဒွေဝို နားထော်ပေးမယ်ဆိုပီး ထံနေဂေ့ရယ်။ 8သူ့နို့မျိုးလုပ်ဂေ့န၊ ဟဲဖြစ်ရိနူးဆိုဝါ အဖဘုရားရှင်ဟ နန်းနို့လိုအပ်နေဝိုဇာဒွေဝို နန်းနို့မတောဆိုခံဒဲဟ သိတော်မူရိတွက်ဖြစ်ရယ်။ 9အဲဂျော့ နန်းနို့ဆုတောဝိုခါမှာ "ရွှေဗြို့တော်မှာရှေ့တော်မူဝို အဖဘုရားရှင်၊ ကြီးမြတ်တော်မူဝို အဖဘုရားရှင်ဝို ချီးမွမ်းပါရယ်။ 10ဘုရားသာသနာတော်ဝို ထူထော်ပါ။ ရွှေဗြို့တော်မှာမျိုး ဘုရားရှင်ကိုယ်တော်တိုင် ဘာမလေပေါ်ဝိုလည်း ကြွရော့အုပ်စိုးတော်မူပါ။ 11ကျနော်ဒို့ တစ်နေ့တာ လိုအပ်ဝိုစားဇာဝို ပေးသနားတော်မူပါ။ 12ကျနော်ဒို့ပေါ် ပြစ်ကြွေးရှေ့သူဒွေဝို ကျနော်ဒို့ ခွမ့်လွှတ်မျိုး ကျနော်ဒို့ရဲ့ ပြစ်ကြွေးဒွေဝိုလည်း ခွမ့်လွှတ်ပေးတော်မူပါ။ 13ဖြားယောသွီးဆော်ဇာဝို ခံရပါစေန။ ကောဆိုးဝါးအန္တရာယ်ဟနေ ကာကွယ်တော်မူပါ" ဆိုပီး ဆုတောဂေ့ပါ။ 14ဟဲဖြစ်ရိနူးဆိုဝါ နန်းနို့ဟ နန်းနို့ပေါ် ပြုလုပ်ဝို လူဒွေရဲ့ဒုဇရိုက်ပြစ်ဝို ခွမ့်လွှတ်မယ်ဆိုဝါ၊ ရွှေဗြို့တော်မှာရှေ့တော်မူဝို အဖဘုရားရှင်ဟလည်း နန်းနို့ရဲ့ ပြစ်ဒုဇရိုက်ဒွေဝို ခွမ့်လွှတ်တော်မူလိမယ်။ 15အယ်ဘေမဲ့ နန်းနို့ဟ သူတစ်ပါးဝို ခွမ့်လွှတ်ဇာမှေ့ဘဲနေရယ်ဆိုဝါ နန်းနို့ရဲ့အဖဘုရားရှင်ဟလည်း နန်းနို့ကျူးလွန်ဝိုပြစ်ဒွေဝို ခွမ့်လွှတ်မှာမုဝ။ 16နန်းနို့ စာရှော်ဆုတောဂေ့ဝိုခါမှာ သူတော်ကောယော်ဆော်သူဒွေမျိုး မျစ်နှာညှိုးငယ်ဇာ ရှေ့ဂေ့စေန။ သူ့နို့ဟ သူ့နို့စာရှော်နေဂေ့ဇာဝို လူဒွေဟသိစေဝို့ အဲမိုမျိုး လုပ်ပြနေဇာဖြစ်ရယ်။ အဲလူဒွေဟ လူဒွေရဲ့ချီးမွမ်းဇာဝိုဘဲ့ ရရှေ့ဂေ့လိမယ်ဖြစ်ပြီး ဘုရားရှင်ဆီဟနေ ဟဲရာဆုလာဘ်မှ ရနိုင်ဝေါ့မှာမုဝ။ နန်းနို့ဝို ငါမှန်ဇာပြောမယ်၊ သူ့နို့ဟ သူ့နို့ရဲ့ဆုလာဘ်ဝို ရဂေ့ပီးပီဖြစ်ရယ်။ 17အယ်ဘေမဲ့ နန်းနို့စာရှော်ခါမှာ ဆန်းဘမ်ဝို ဖီးပီး မျစ်နှာဝို ဆေးကြောဂေ့လော့။ 18နန်းနို့ စာရှော်ဆုတောဂေ့ဇာဝို လူဒွေဟ သိဘဲနေဂေ့ပေမဲ့ ဟယ်သူမှဗြင်နိုင်ဘဲဝို အဖဘုရားရှင်ဟ သိတော်မူရိတွက် နန်းနို့ဝို ဆုလာဘ်ဒွေ ပေးသနားတော်မူလိမယ်။ 19နန်းနို့ရဲ့ စည်းဇိမ်ဥစ္စာဒွေဝို ရန်သူမျိုး ၅ပါး ဖျစ်ဆီးနိုင်ဝို အယ်မိုဘာပေါ်မှာ စုဆောခြင်းပြုဂေ့န။ 20အဲမိုစား နန်းနို့ရဲ့ ပစ္စည်းဥစ္စာရတနာဒွေဝို ရန်သူမျိုး ၅ပါး ဖျစ်ဆီးနိုင်ဘဲဝို ရွှေဗြို့တော်မှာဘဲ့ စုဆောခြင်း ပြုဂေ့လော့။ 21ဟဲဖြစ်ရိနူးဆိုဝါ ဥစ္စာရတနာဒွေရှေ့ဝိုရပ်ဝို စိနှလုံးဟ ရော့နေတတ်ရိဂျော့ဖြစ်ရယ်။ 22 နန်းနို့မျစ်လုံးဟ နန်းနို့ကိုယ်ခန္ဓာရဲ့ မီးအီနတူရယ်။ အဲဂျော့ ကောဝိုမျစ်လုံးဒွေရှေ့မယ်ဆိုဝါ ဂူလုံးဝို ရှင်းရှင်းလင်းလင်းန ဗြင်နိုင်ရယ်။ 23အယ်ဘေမဲ့ နန့်မျစ်လုံးဒွေကောဘဲနေရယ်ဆိုဝါ ကိုယ်ခန္ဓာခုလုံး မှော်မိုက်နေလိမယ်။ နန်းနို့ရဲ့မျစ်လုံးဟ မကောဘေမဲ့ ကောရယ်ထံပီး တွီးမှားနေရယ်ဆိုဝါ နန်းနို့ဟ ဟယ်မျှမှော်မိုက်နေလိမယ်နူး။ 24ဟယ်သူမှ သခင်နှေ့ယော့ဆီမှာ မှုထမ်းနိုင်မှာမုဝ။ သခင်တယော့ဝိုရှစ်ရယ်ဆိုဝါ ခြားတယော့ဝို မူးလိမယ်ဖြစ်ပြီး ယော့ဝို သစ္စာရှေ့ရယ်ဆိုဝါ ကျန်တယော့ဝိုလဲ သစ္စာမဲ့မှာဘဲ့ဖြစ်ရိတွက်ဂျော့ဖြစ်ရယ်။ အဲဂျော့ နန်းနို့ဟ ဘုရားရှင် န လောကီစည်းစိမ်ဝို တဗြိုင်နက် မှုထမ်းနိုင်ရ။ 25အဲဂျော့ရိ နန်းနို့ဝို ငါပြောရှင်ဇာဟလောဝါ၊ နန်းနို့သက်ရှင်နေထိုင်ဝို့တွက် စား၊ ဝတ်၊ နေရေးဝို စိုးရီပူပန်ဇာရှေ့ဂေ့န။ နန်းနို့သက်ဟ စားဇာထက် ပိုပီးတန်ဖိုးရှေ့ရယ်မုဝလော။ နန်းနို့ခန္ဓာကိုယ်ဟ ဝတ်စားထက်ပိုပီး တန်ဖိုးရှေ့ရယ်မုဝလော။ 26ကောကံဟ ငှက်ဒွေဝိုကေ့လော့။ သူ့နို့ဟ စိုက်ပျိုးဇာ၊ ရိသီးဇာမှေ့ရ။ သူ့နို့မှာ စားသော့ သိုလှော်ရားဇာမှေ့ရ။ အဖဘုရားရှင်ဟ ငှက်ဒွေဂိုမှ စော့ရှော့ကျွေးမွီးရားရယ်မုဝလော။ နန်းနို့ဟ ငှက်ဒွေထက် ပိုပီးဖိုးတန်ရယ်မုဝလော။ 27နန်းနို့ထဲဟ ဟယ်သူဟ အယ်မိုမျိုး စိုးရီပူပန်မှုဒွေန ကိုယ့်သက်ဝို နဲနဲရားဂိုမှရှယ်ဇေရိလော။ 28ဝတ်ထည်တွက် ဟဲဂျော့ ပူပန်နေဂေ့နူး။ ကွမ်းပလန်ထဲမှာရှေ့ဝို တောပန်းရားဒွေ ဖူးပွမ့်နေဇာဝို တွီးဂေ့လော့။ သူ့နို့ဟ လုပ်လည်းမလုပ်။ ထည်လည်း ယှက်ဂေ့ရ။ 29အယ်ဘေမဲ့ နန်းနို့ဝို ငါပြောရှင်ဇာဟလော ကြွယ်ဝချမ်းသာဝို ရှောလမုန်ဘုရင်ကီးဂိုမှ အယ်မိုတောပန်းဒွေမျိုး လှပဝိုဝတ်စားဒွေ ဆင်မြန်းခဲ့ရရ။ 30ခု ရှင်သန်ပီးရှေ့နေဘေမဲ့ နော့နေ့မှာ မီးရှို့ခံရမှာဖြစ်ဝို တောပန်းဒွေဂိုမှ အယ်မိုလော့ လှပစေနေမယ်ဆိုဝါ ဘုရားရှင်ဟ နန်းနို့ဝို ဟယ်မျှလော့ပိုပီးလှပအော် ဆင်မြန်းပေးလိမယ်နူး။ နန်းနို့ အယ်လော့ဂိုမှ ယုံကြည်ချင့်နည်းဂေ့ဇမား။ 31အဲဂျော့ "ကျနော်ဒို့ ဟဲရာဝိုစားရမယ်နူး" "ကျနော်ဒို့ ဟဲရာဝို သော့ရမယ်နူး" "ကျနော်ဒို့ ဟဲရာဝို ဝတ်ရမယ်နူး" ဆိုပီး ပူပန်ပြောဆိုဇာ ပြုဂေ့န။ 32ဘုရားဝိုသိဘဲဝိုလူဒွေဘဲ့ အဲမိုမျိုး ပူပန်တတ်ဂေ့ရယ်။ ရွှေဗြို့တော်ဟ နန်းနို့ရဲ့ အဖဘုရားရှင်ဟ နန်းနို့ လိုအပ်ဇာမှန်သမျှဝို သိဗြင်တော်မူရယ်။ 33အယ်မိုဇာဒွေထက် ဘုရားရှင်ရဲ့သာသနာတော်န ဖြော့မတ်ခြင်းရားဒွေဝိုဘဲ့ ဦးဆုံးရှာဖွီဂေ့မယ်ဆိုဝါ ကျန်ဇာဂူလုံးဝို ဘုရားရှင်ဟ နန့်ဝို ဖလဲ့ဆည်းပေးတော်မူလိမယ်။ 34အဲဂျော့ နတ်ကီးသယ်တွက် ပူပန်ခြင်းမှေ့ဂေ့န။ နတ်ကီးသယ်မှာလဲ နတ်ကီးသယ်တွက် ပူပန်ဇာဒွေရှေ့နေဦးမှာဖြစ်ရယ်။ နေ့ရစ်ဒိုင်းမှာလဲ ကြုံတွီ့ရဝို့ပူပန်ဇာဒွေ ရှေ့နေလိဦးမယ်ဖြစ်ရယ်။
Currently Selected:
Matthew 6: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
