Matthew 7
7
1ကိုယ့်ဝိုဝီဖန်ပြစ်တံဇာ ခံနိုဘဲနေရယ်ဆိုဝါ သူများဝိုလဲ ဝီဖန်ပြစ်တံဇာလုပ်ဂေ့န။ 2ဟဲဖြစ်ရိနူးဆိုဝါ နန်းနို့ သူများဝို ဝီဖန်ပြစ်တံဒိုင်း နန်းနို့လဲ ဝီဖန်ပြစ်တံဇာခံရမှာဖြစ်ပြီး နန်းနို့ သူများဝို တိုင်းတာဝိုစံနှုန်းတိုင်း နန်းနို့ဟလဲ တိုင်းတာခံရလိမှာဖြစ်ရိတွက်ဂျော့ဖြစ်ရယ်။ 3နန်ဟ နန့်မျစ်လုံးထဲဟ သစ်တုံးဝိုဗြင်ဘဲန နန့်ညီကိုမျစ်လုံးထဲဟ သစ်မှုန်စရားဝို ဟဲဂျော့ဗြင်နေဂေ့နူး။ 4နန့်မျစ်လုံးထဲမှာ သစ်တုံးကီးရှေ့နေရိသားန နန့်ညီကိုဝို 'နန့်မျစ်လုံးထဲဟ သစ်မှုန်စရားဝို ငါထုပေးမယ်။' ဆိုပီးဟဲမျိုးလုပ်ပီးပြောနိုင်မယ်နူး။ 5သူတော်ကော ယောဆော်ထားဝိုလူ၊ နန့်မျစ်လုံးထဲဟ သစ်တုံးဝို ရင်ဆုံးထုလိုက်မှဘဲ့ နန့်ညီကိုမျစ်လုံးထဲဟ သစ်မှုန်စဝို ထုပေးဝို့ရှင်းရှင်းလင်းလင်း ဗြင်ရမှာဖြစ်ရယ်။ 6သန့်ဇင်မွန် မြတ်ဝိုအရာဒွေဝို ခွီးဒွေဝိုပေးပါန။ နန်းနို့ရဲ့ပုလဲဒွေဝိုလဲ ဝက်ဒွေရှေ့ မှာသွားပစ်ဂေ့န။ နန်းနို့အဲမျိုးပြုလုပ်မယ်ဆိုဝါ သူ့နို့ဟ အဲမိုဇာဒွေဝို သူ့နို့ခေဖဝါးအော့မှာ နန်းချေဂေ့ပြီးမှ နန့်ဆီဝို လှည့်လာပြီး နန့်ဝိုတိုက်ခိုက်ဂေ့လိမယ်။ 7တောဂေ့ပါ။ တောရယ်ဆိုဝါ နန်းနို့ရလိမယ်။ ရှာဂေ့ပါ။ ရှာရယ်ဆိုဝါ နန်းနို့တွီ့လိမယ်။ ခေါ့ပေါ့ဝို ခေါ့ဂေ့ပါ။ ခေါ့ပေါ့ခေါ့ရယ်ဆိုဝါဝို ခေါ့ပေါ့ဖွမ့်ပေးလိမယ်။ 8ဟဲဖြစ်ရိနူးဆိုဝါ တောဒဲ့လူဒိုင်း ရဂေ့လိမယ်။ ရှာဒဲ့လူဒိုင်း တွီ့ဂေ့လိမယ်။ ခေါ့ပေါ့ခေါ့ဝိုလူဒိုင်းဝိုလဲ ခေါ့ပေါ့ဖွမ့်ပေးလိမယ်ဖြစ်ရယ်။ 9နန်းနို့သားဟ ပါမုဝိုတောရယ်ဆိုဝါ နန်းနို့ထဲဟ ဟယ်သူဟ ကိုယ့်သားဝို ကလော့တုံးပေးမယ်နူး။ 10နန်းနို့သားဟ ငါးဝိုတောမယ်ဆိုဝါ သူ့ဝို ဗွီပေးမယ်လော။ 11နန်းနို့ဟ ပြစ်ဒုဇရိုက်သားဒွေဖြစ်ပါလျှက် နန်းနို့သားမီးဒွေဝို ကောဝိုရာဒွေဝိုဘဲ့ ပေးတတ်မယ်ဆိုဝါ ရွှေဗြို့တော်မှာရှေ့ဝို နန်းနို့ရဲ့အဖဘုရားဟ သူ့ဝိုတောဝိုလူဒွေဝို ကောမွန်ဇာဒွေ ဟယ်မျှလော့ပေးလိမယ်နူး။ 12အဲဂျော့ရိ နန်းနို့ပေါ်ဝို သူများဟ ပြုမူဆစ်ဆံစေလိုဝိုမျိုး နန်းနို့ဟလဲ သူများဝို ပြုမူဆစ်ဆံဂေ့ပါ။ အယ်မိုဇာဟ ပညတ်ရားတော်ကျမ်းန ပရောဖက်ဒွေ ရေးရစ်ဝိုကျမ်းစာဒွေရဲ့ နှစ်ချုပ်ဘဲ့ဖြစ်ရယ်။ 13ကျဉ်းမြောဝို ဝမ်ပေါ့ဟနေ ဝမ်ဂေ့ပါ။ ဟဲဖြစ်ရိနူးဆိုဝါ ကျယ်ဝန်းဝို ဝမ်ပေါ့ဟ ဝမ်ရလွယ်ကူပြီး ပျစ်ဆီးခြင်းဝိုဘဲ့ ဦးတည်နေဇာဖြစ်ပီး အဲမိုဝမ်ပေါ့ဟ ဝမ်သူဒွေဟလဲ ရားဒိုင်းများလေရယ်။ 14သက်ရှင်ဇာဝို ရနိုင်ဝိုလမ်းဝိုဦးတည်ဝို ဝမ်ပေါ့ဟ ကျဉ်းမြောပြီး ဝမ်ရော့ဝို့ ခက်ခဲရိတွက်ဂျော့ အဲမိုဝမ်ပေါ့ဟနေ ဝမ်ဝိုလူဒွေဟ နဲပါးရယ်။ 15ပရောဖက်တုယော်ဒွေဝို ဒိထားဂေ့လော့။ သူ့နို့ဟသိုးရေ ခြုံထားဝို ရစ်စစ်ကြမ်းကြုတ်ဝို ဝံပုလွေဒွေမျိုး နန်းနို့ဆီလာဂေ့လိမယ်ဖြစ်ရယ်။ 16 နန်းနို့ဟ အဲမိုလူဒွေဝို သူ့နို့ရဲ့လုပ်ရစ်ဒွေဝို ကေ့ပီးသိဂေ့လိမယ်။ ဆူးခြုံပံဟ ဗျစ်သီးဖြစ်ဖြစ် သဖန်းသီးဖြစ်ဖြစ် ဆွတ်ခူးရလေ့ရှေ့ရိလော။ 17အဲမိုမျိုးဘဲ့ ကောဝိုပံဒိုင်းဟ ကောဝိုသီးဝို သီးဘေမဲ့ မကောဘဲဝိုပံဟ မကောဘဲဝိုသီးဝိုသီးရယ်။ 18ကောဝိုပံဟ မကောဘဲဝိုသီးဝို သီးနိုင်ဘဲမျိုး မကောဘဲဝိုပံဟလဲ ကောဝိုသီးဝိုသီးနိုင်ရ။ 19ကောဝိုသီးဝိုမသီးဘဲဝိုပံဒိုင်းဟ ခုလှဲဇာခံရပြီး မီးထဲဝိုပစ်ခလဇာ ခံရမှာဖြစ်ရယ်။ 20အဲဂျော့ နန်းနို့ဟ ပရောဖက်တုယော်ဒွေဝို သူ့နို့လုပ်ရစ်ဝိုကေ့ပီး သူ့နို့ ဝို သိဂေ့လိမယ်။ 21ငါ့ဝို 'အရှင်၊ အရှင်' ဆိုပီး ခေါ် ဝိုလူဒိုင်းဟ ရွှေဗြို့တော်ရဲ့သာသနာတော်ဝို ဝမ်ရော့ဂေ့ရမှာမုဘဲန ရွှေဗြို့တော်မှာရှေ့ဝို ငါ့ရဲ့အဖဘုရားရှင်လိုတော်တိုင်း လိုက်နာဆော်ဝက်ဝိုလူဒွေဘဲ့ ဝမ်ခွမ့်ရမှာဖြစ်ရယ်။ 22ရားစီရင်ဝိုနေ့ဝို ရော့လာခါမှာ လူများဂီးဟ ငါ့ ဝို 'အရှင်၊ အရှင်ရဲ့မည်နာမဝို မှီပြုပီး ကျနော်ဒို့ဟ ဘုရားရှင်ရဲ့မြင်ဂလာဒန်းဂေါဝို ဟောပြောဂေ့ပြီး နတ်ဆိုးဒွေဝိုလဲ နှံထုခဲ့ဂေ့ရယ်မုဝလော။ အံ့ဖွယ်မှုကိစ္စများဂီးဝိုလဲ အရှင်ရဲ့ မည်နာမဝိုမှီပြုပီး လုပ်ဆော်ခဲ့ဂေ့ ရယ်မုဝလော' ဆိုပီး ပြောဂေ့လိမယ်။ 23အဲခါ ငါဟ အဲမိုလူဒွေဝို 'နန်းနို့ဝို ငါလုံးဝသိရ။ ပြစ်ဒုဇရိုက်ဒွေဝိုကျူးလွန်သူဒွေ၊ ငါ့ဆီဟနေ ထွက်သွားဂေ့လော့။' ဆိုပီး ပြတ်ပြတ်သားသားပြောမယ်။ 24 အဲဂျော့ ငါ့ဂါးဝိုနားထော်ပြီး လိုက်နာကျင့်ကြံသူဒိုင်းဟ ကလော့ပေါ်မှာအီဆော့ဝို ပညာရှေ့နတူလေရယ်။ 25မိုးဒွေဝါပြီး ရေကီးခီမှာ လေပြင်းဒွေဟ အဲမိုအီဝိုတိုက်ခတ်ဘေမဲ့ ကလော့ပေါ်မှာ ဆော့ရားရိတွက်ဂျော့ အဲမိုအီဟ ပြိုလဲမှာမုဝ။ 26အယ်ဘေမဲ့ ငါဂါးဝိုနားထော်ပြီး လိုက်နာကျင့်ကြံဇာမှေ့ဘဲဝိုသူဒွေဟ သဲပေါ်မှာ အီဆော့ဝို မိုက်မဲဝိုသူဒွေန တူလေရယ်။ 27မိုးဝါပြီး ရေလွှမ်းမိုးခီ လေပြင်းဒွေ အဲမိုအီဝိုတိုက်ခတ်ဝိုခါမှာ ပြိုလဲသွားမှာဖြစ်ပြီး အဲအီတအီလုံးဟ လုံးဝပျစ်ဆီးရားမှာဖြစ်ရယ်။" ဆိုပီး မိကြားလေရယ်။ 28ကိုယ်တော်ယေရှု အဲမိုကြောရာဒွေဝို မိဆိုပြီးခါမှာ လူထုပရိသတ်ဟ ကိုယ်တော်ရဲ့သွန်သန်ဆုံးမမှုဒွေဝို အံ့ဩချီးမွမ်းဂေ့လေရယ်။ 29ဟဲဖြစ်ရိနူးဆိုဝါ ကိုယ်တော်ဟ ကျမ်းတတ်ဆရာဒွေနတူပဲန ဂိုးအာဏာပလဲ့ဝစွာရှေ့သူမျိုး သွန်သန်ဆုံးမနေတွက်ဂျော့ဖြစ်ရယ်။
Currently Selected:
Matthew 7: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
