Zekaliya 7
7
U Mwene akususya pakutuzya ukulya ukwa buzimbuli
1Mumwaka uwafolo uwa bulaghili ubwa mwene u Daliyasi u Mwene akanena nu Zekaliya, pisiku ilyafolo ilya mwezi uwa nayini, ghugho mwezi uwa Kisilevi.
2Abantu aba ku Beteli bakamutuma u Shalezeli sona nu Legemu Meleki ku Nyumba iya Mwene, poka na bantu babo, pakumulambilizya u Mwene ukuti abape ulusayo, 3pakubalalusya abaputi aba mu Nyumba iya Mwene Uwamaka Ghosi sona na balaghuzi ukuti, “Nkimba infwifwitilaye nukutuzya pakulya mumwezi uwafayivi, ukuyana namumo nkabombelagha amaka aminji?”
4Po u Mwene Uwamaka Ghosi akambuzya amazyu aghakuti, 5“Balalusye abantu bosi aba muchisu poka na baputi ukuti, ‘Nkimba bo ukutuzya pakulya nukufwifwitila, mumwezi uwafayivi nu mwezi uwaseveni amaka 70 ghagho ghachilapo, nkimba mukatuzya pakulya pachifukwa icha ane? 6Sona bo mukulya nukung'wela, nkimba mutakasekelagha pachifukwa icha mwebene? 7Nkimba te mazyu ghagho u Mwene akalumbilila ukwendela mubalaghuzi abavula intazi bala, bo akaya aka Yelusalemu poka nutwaya utukulu tuto tukazyunguliye tuli pamutende sona, kuchigaba icha kuntende sona na mumaghamba, kuko bakikalagha?’ ”
Ubuzya pachifukwa icha ukusita ukwivwila
8Po u Mwene akamubuzya sona u Zekaliya amazyu aghakuti, 9“U Mwene Uwamaka Ghosi akuti, ‘Wenelezye ukuti ubwanaloli bukubombiwa, ubapelelaye ichisa abantu sona mubanje nichililizi ku weka na weka. 10Mutakabayivyanje abafwilwe pamo abalanda, abayeni pamo abapina. Mutakinong'onelanaye ivintu ivibibi mumoyo ghinyu.’
11“Loli namoyo amakafu abantu banaba bakakana pakuteghelezya, bakampa inkonto zyabo sona bakighalila amakutu ghabo umwakuti batakivwanje. 12Bakakazya nkani amoyo ghabo ngati libwe, umwakuti batakivwanga ululaghilo sona na mazyu agha Mwene Uwamaka Ghosi ghagho akababuzya abalaghuzi abavula intazi bala pakwendela mwa Muzimu. Po u Mwene Uwamaka Ghosi akakalala nkani.
13“U Mwene Uwamaka Ghosi akuti, ‘Bo nkubitizya batakivwanga, bo bope bakunyitizya, intakabateghelezya. 14Nkabanyampannya nu kankungu pakasi pa inko zyosi, kuko bakaba bayeni. Ichisu chabo chikaba chisami umwakuti nayumoyumo umuntu angikalamo. Umu momumo bakachipelela ichisu ichiza pakuba chisami.’ ”
Currently Selected:
Zekaliya 7: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
