Zekaliya 6
6
Ichisetuka icha ngolo folo
1Nkatalankannya sona, nkazyennya ingolo folo zikufuma pakasi pamaghamba mabili, ghagho maghamba agha mukuba uwa chela. 2Ingolo iyakwanda yikaba ni falasi inchesamu, iyabubili yikaba ni falasi ifitu, 3iyabutatu yikaba ni falasi iswepu, po iyafolo yikaba ni falasi iyamabalamabala, loli zyosi zikaba zyamaka nkani. 4Po nkamulalusya uwantumi yuyo akanenagha nane nkati, “Wee songo wane, nkimba vinivi vikung'anamula ichoni?”
5Uwantumi akanyamula akati, “Zinizi zyo mpepo folo izya kumwanya, zyafuma bulo pamaso pa Mwene uwa chisu chosi ichapasi. 6Ingolo yiyo yili ni falasi ifitu yikubuka kuchigaba ichakumitu, sona ingolo iya falasi iswepu yikubuka kuchigaba icha kubwinjililo bwizuba, yope ingolo iya falasi iyamabalamabala yikubuka ku chigaba icha kuntende.”
7Bo ifalasi izyamaka zikwepamo zikalondagha nkani pakuchitendela ichisu chosi ichapasi. Uwantumi akababuzya akati, “Bukagha pakuchitendela ichisu chila!” Po bakachitendela ichisu ichapasi. 8Po uwantumi akanyitizya akati, “Ennya ifalasi zizyo zikubuka kuchigaba icha kumitu, zyabwisya ubukali ubwa Mwene.”
Nizya kumuvwika u Yoshwa impumpu
9U Mwene akambuzya akati, 10“Senda u siliva nu golide kwa Helidayi nu Tobiya, sona nu Yedaya, babo bakaba bakayidi kuchisu icha Babiloni. Ubuke isiku linilyo kunyumba iya Yosiya umwana uwa Zefaniya. 11Senda u siliva nu golide yula nukuyannya impumpu, mumuvwike u Yoshwa umwana uwa Yehozadaki pakuba muputi usongo. 12Po umubuzye ukuti: U Mwene Uwamaka Ghosi ati, ‘Ennya umuntu yuyo itabwa lyache we Lusamba, pakuti akwiza pakumela papo ali, sona akwiza pakuzengapo Inyumba iya Mwene. 13Weyuyo akwiza pakuzenga Inyumba iya Mwene sona akwiza pakuvwinkiwa nu buchindamu, akwiza pakulaghila bo ikaye pachitengo chache. Akwiza pakubapo sona umuputi papipi ni chitengo icha bumwene. Abantu babili banaba bakwiza pakubomba imbombo nu moyo ghoka.’ 14Impumpu yiniyi yikwiza pakupeghiwa kwa Helidayi nu Tobiya, sona nu Yedaya nu Heni umwana uwa Zefaniya pakuba chikumbusyo mu Nyumba iya Mwene. 15Abantu bosi babo bali kubutali, bakwiza pakwavwa pakuzenga Inyumba iya Mwene, po bakwiza pakumanya ukuti u Mwene Uwamaka Ghosi antuma pakasi papabo. Zinizi zikwiza pakubombiwa nanti naloli mukughivwila amazyu agha Mwene u Chala winyu.”
Currently Selected:
Zekaliya 6: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
