2 Korɛɛntënyüü 5

1'Be a jre 'imɩ, ana fugbalä ‑beerea' ‑tete ä kä 'mlɩ a kʋa' ‑pɩ ‑tʋtʋ ‑gälɩ, äma ‑gblooo nɩ, a kälä cɛlɩ nyukulu Nyɔsʋa tɛrɛa' amɩ; nyukulu 'nyɩa' nyɔɔa 'papanyuku bä, 'umäa' ‑wɩara 'taɩn a 'fɩɔ 'lɩ. 2'A ‑tetelɛa 'mlɩ a bä ‑bɛ a pütö, 'be a 'sosowʋ ‑gböösa amä nyukulu bäa' cɛlɩ 'sroo. 3'Iibä bɩa ama 'sroo nyukulu bäa' cɛlɩ nɩ, 'ü ‑nëmä ana ‑gbagbapolu ‑a 'jä. 4A ‑ka kʋa' ana ‑tete ‑wälɩ ‑pɩ ‑tʋtʋ ‑gälɩ nɩ, a pütö ‑beere kälɩbädii a ‑gbötö. 'Be ‑mää 'kä diigbaba tʋ 'blaa amɩ ‑a, ‑maa ‑pasakotulu bäa' cɛlɩ a 'bata amä 'lɩpa, ‑bɛ 'klä 'mä ‑plɩɩ jäjäfugba 'ba. 5Nyɔsʋaa 'mʋgbɛ ‑ëlere amɩ 'klälä kʋa' ‑pɩ ‑a ‑gʋ. 'Ɔ ‑nyɩ bɩa amɩ 'ɔa ‑Susu 'ɔmä amɩ 'suru diili 'ɔmäa' amɩ ‑nyɩ, 'ia ‑gʋ.

6'Ia ‑gʋ ana 'klü 'jraaa 'doo. ‑Maa a jre 'iin 'sɩrɩ ama ‑ka kʋa' fugbalä kʋa' ‑pɩa 'mlɩ nɩ, a tʋŋlɔlɩ ana nyuku dɛrɩ, a tʋŋlɔlɩ 'Pläkänyɔɔ dɛrɩ. 7Nyɔsʋaplɛ a nö ‑bɛ a 'nyɛɛ, ‑maa ‑mää ana 'nyüa 'sa anyɩ 'nyɛ. 8‑Yɛɛ, 'klü ‑ka 'jra amɩ ‑gba ‑bɛ a 'bata fugbalä kʋa' ‑pɩa 'lɩ 'ceciekʋ, amä 'Pläkänyɔɔa ‑gba kʋkalɩ mi. 9'A 'ia ‑gʋ ‑bakää anyɩ tɩɔ ‑taa fugbaa 'mlɩ, 'aiɛ ‑bakää anyɩ sɔ 'lɩ, wiili kä 'doo a 'bataa' nɩ, amä 'ɔɔn 'tʋkä. 10'Be ana 'fɩɔ nya 'Kriisëa 'klʋɩ 'nyüglöa 'ɔmä ana ‑gä ‑tʋ. 'Ia 'taɩn 'lɩ, 'jrʋpalä ‑moloo ‑fɛɛɛrɛa' ‑pɩ tʋtʋ ‑gälɩ ma 'na, 'aiɛ äma 'nyɩ 'na ‑a 'na, 'a 'ia 'sa 'ümä 'ɔɔn 'pɛɛ.

'Kriisë känyrɩ a nyra Nyɔsʋa nya 'nönröwli

11A jre dɛɛlɛ bäa' 'Pläkänyɔɔa pɩpɩkʋ, 'a 'ia ‑gʋ a nö 'imɩ nyüü 'mä 'iin wii 'wʋ 'ba. Nyɔsʋa jre 'tasɩrɩ 'sɩrɩ a bäa' 'wʋ, ‑bɛ 'n jre bɩa 'saa 'a jre amɩ. 12A ‑ka ‑nëmä 'sɔɔwʋ ana nyüfë 'amɩ 'klɩ ‑a srara. Wiili kä ‑gʋ ama 'jäa' 'amɩ ‑bɛ 'a käa' 'amäa' amɩ dɔrʋ 'wʋ kä nɩ, 'ii a 'bata amä 'amɩ ‑gbala. 'Ia 'taɩn 'lɩ nɩ, nyüülü ‑gbaaa' 'lɩ diili 'nyü 'jääa' 'wʋa ‑gʋ, ‑bɛ 'ünyɩ ‑gbaa' 'lɩ plɛa nia ‑gʋ nɩ, üma 'bete 'amɩ 'amä 'üa ‑gälɩ 'sasrakʋ jre. 13'Ima bä 'kasa sa kla amɩ nɩ, Nyɔsʋaa ‑gʋ 'i bäsaa; ama 'nyɩ saklagbi ‑a kä nɩ, 'ana ‑gʋ. 14'Kriisëa ‑wawakʋ 'tuto amɩ, 'be anya 'a 'nu 'sɩrɩ nyɔɔ 'doo ma jäa' nyüüa 'fɩɔa ‑gʋ nɩ, 'iibä nyüüa 'fɩɔ jä. 15'Ɔ jä nyüüa 'fɩɔa ‑gʋ, 'kä nyüülü bäa' 'lɩ 'mä 'lɩbä 'ɔa ‑gʋ, 'ümä 'lɩbä 'ɔɔlɔ jäa' ‑bɛ ɔ sɔa' 'kuaabre 'üa ‑gʋ.

16'A 'ia ‑gʋ, 'bala 'saarɩ ‑gälɩ, 'sɩrɩ ‑pɩ ‑tʋtʋ ‑gälɩa nyɔɔ bäa' ‑mää 'sɩ anyɩ 'jä nyɔɔ 'wʋ. ‑Bakää a 'kpla kä 'saa 'Kriisë nɩ, 'köklesa ‑plɩɩ nɩ, ‑mää 'sɩ a ‑kanyɩ 'kpla 'ɔɔn. 17Nyɔɔ nyra 'Kriisë ma bä 'doo nɩ, nyɔɔdëdrä nyɔɔlɔ bä; 'klɩbɩaa ni 'a ‑si, 'köklesa ‑plɩɩ diia 'fɩɔ bä dëdrä. 18'Ia 'fɩɔlʋ nɩ, Nyɔsʋa kälɩ 'i sɔ, Nyɔsʋalɔ ‑sröröa' Jesu 'Kriisë kälɩ ‑bɛ 'ɔ 'nönröa' amɩ 'wli a nyra 'ɔɔn kɔsɔ. Amɔ Nyɔsʋa ‑nyɩ 'köklesa ‑plɩɩ 'wlinönrökʋa 'jrʋpa. 19‑A 'jää 'iin le? Nyɔsʋa ‑sröröa' 'Kriisë kälɩ nɩ, 'pläa 'fɩɔ nyra 'ɔɔlɔ bäa' Nyɔsʋa 'nönröwli, 'ɔnyɩ 'ma bɩa 'üün 'üa bʋbɔgbi ‑gälɩ 'kä ‑a. 'Ɔnya blɔ amɩ a mi a 'sara 'lɩ nyüü 'wlinönröwii.

20'Ii känyrɩ, 'Kriisëa bɔblɔnyüü a bä. 'I ‑beere 'sɩrɩ Nyɔsʋaa 'mʋgbɛ ‑sröröa' amɩ kälɩ amä 'amɩ wii cere: a bibie 'amɩ 'Kriisëa 'nyrɩklɩa ‑gʋ, 'ba nyra Nyɔsʋa 'nönröwli! 21Nyɔɔlɔ ‑kaapɩɔa' ‑balʋ nʋ nɩ, Nyɔsʋa bere 'ɔɔn ana ‑balʋ 'wli, 'kä amɔlɔ nyra 'Kriisë bäa' 'doo nɩ, amä 'klɩgä Nyɔsʋaa 'klɩ.

Currently Selected:

2 Korɛɛntënyüü 5: Bakwé

Highlight

Copy