2 Korɛɛntënyüü 4

Nyɔsʋaa ‑nyɛɛ ana 'klü sɔ

1'Bala 'lɩ ‑gälɩ, 'be Nyɔsʋa 'jä ana nyatɛrɩ 'ɔnya ‑nyɩ amɩ 'jrʋpalä, 'ii känyrɩ ana kpati 'nyɩ jä 'lɩ ‑a. 2Diili bäa' 'nyüsü 'wʋ i nröröa' ‑sisiedii 'lɩ nɩ, a blara 'iin 'klɩ, anyɩ nʋ yrʋgbi ‑a, anyɩ 'cici bɩa nyɔsʋaawii ‑a. ‑Maa ‑srɩ 'klɩ a srara nyüü 'cɩcasa nyüüa 'fɩɔ 'mä amɩ plɛtoro Nyɔsʋa 'klʋɩ ‑gälɩ. 3‑Maa 'Mʋfagogolä a 'saaa' ma ‑sisie 'kä ‑mölööa ‑gʋ nɩ, 'abɩa nyüülü 'mɔlɔa', 'üü bobo ‑maa 'ä ‑sisie. 4'Üü 'nyɩ toro 'iin plɛ. 'Be 'plälä kʋa' ‑pɩa nyɔsʋa 'cakla 'üa bobowli 'lɩ 'ümä 'jöjrüükpü 'lɩ kʋ, 'ü ‑pɩ 'napɛlɛ bäa' 'Mʋfagogoa 'mlɩ 'wʋjä, ‑bɛ 'ɛɛ srara 'Kriisëlɔ bäa' Nyɔsʋaa 'pikea 'wliklɩbʋbʋakʋ.

5‑Mää ana 'mʋgbɛa ‑gogoa anyɩ 'sa 'amɩ, ‑maa 'Pläkänyɔɔ Jesu 'Kriisëa ‑gogoa 'saa 'amɩ. A 'kpla ana nyüfë ‑beere 'ana 'jrʋpafɛnyüü Jesua ‑gʋ. 6'Be Nyɔsʋalɔ 'daaa' ‑maa: «Abɩa 'napɛ ŋʋala 'jöjrüükpü 'lɩ#4.6 Jenɛɛsë 1.3.!» 'A 'ɔa 'doolɔ 'ɔɔ ŋʋala 'ɔa 'napɛ ana polua 'mlɩ, 'kä 'ɔmä amɩ 'ɔa 'bʋalakʋlʋ ŋʋalaa' Jesu 'Kriisëa 'klʋɩ srara amä 'uun jre.

7‑Maa amɔlɔ 'klaaa' 'bɩɔlʋ nɩ, a ‑beere mamɛɛa ‑püü. 'Imä jrere 'sɩrɩ 'ia 'klü kpakülü 'nyɩa' ana 'klü bä, ‑maa Nyɔsʋaa ‑nyɛɛ 'i sɔ. 8A 'jää ‑sʋɩa 'fɩɔ ‑maa anyɩ 'iin ‑wälɩ ‑a järä; ana plɛklɩkala, ‑maa ana plɛ 'nyɩ 'lɩ Nyɔsʋa dɛrɩ ‑a tʋŋlɔ. 9Bʋbɔgbi nrörö amɩ ‑gba, ‑maa Nyɔsʋa 'nyɩ amɩ dɛrɩ ‑a sɔ. 'Ü 'kpa amɩ 'kä, ‑maa anyɩ jä ‑a jä. 10A ‑ka ‑gbötö 'Pläkänyɔɔ#4.10 'Pläkänyɔɔ: ‑Taa ‑waklöölä 'nyɩ grɛɛkë kätɩpɔɔkɩ ‑mɩdooa 'mlɩ ‑a bä. Jesua jäjäkʋ, Jesua 'klä 'mä bɩa ana fugbalɩ 'wʋjärä. 11A bälɩ, ‑maa a 'jää jäjäwʋ 'taɩn a 'fɩɔ 'lɩ Jesua ‑gʋ, 'kä 'ɔa 'klä 'mä bɩa 'wʋcrɛrɛ ana jäjäfugbaa 'mlɩ. 12'Ia 'taɩn 'lɩ nɩ, jäjä ‑fɛɛɛrɛ amɩ 'lɩ 'äa 'jrʋpa, ‑maa 'amɔlɔ nɩ, 'klä 'ä ‑fɛɛɛrɛ 'amɩ 'lɩ 'äa 'jrʋpa.

13'I ‑jɩjra nyɔsʋapɔɔkʋ 'lɩ ‑maa: «Plɛ 'n toro 'iin, 'a 'ia ‑gʋ 'n 'pawii#4.13 'Lɩbrɛrɛpɔɔkʋ 116.10..» ‑Bɛ a 'klaaa' ‑Susu 'doo, u bäa' nyɔsʋaplɛtorokʋ nɩ, ana 'mʋgbɛ a toro 'iin plɛ, 'a 'ia ‑gʋ a 'paa wii. 14'Be a jresaa Nyɔsʋalɔ 'baa' 'Pläkänyɔɔ Jesu 'kuaabre nɩ, 'ɔnya bɩa amɔ ‑bɛ Jesu 'kuaabre 'baa, 'kä 'ɔnya amɩ ‑bɛ 'amɔ 'ɔa 'klɩsrara.

Abɩa 'klü bä 'amɩ 'lɩa 'doo

15Wiili kä 'fɩɔ jräa' amɩ ‑gälɩ nɩ, 'ana ‑gʋ, 'kä Nyɔsʋaa ‑gbinanakʋ 'mä ‑gälɩ 'paplaa 'doo. 'Ia 'taɩn 'lɩ nyüülü nëmäa' Nyɔsʋa 'trɛɛ nya ‑sümlöa ‑gböösa, 'kä 'inya Nyɔsʋa 'bʋala. 16‑Jää dɛɛlɛ kä ‑gʋ ana kpati jäa' 'lɩ. ‑Bakää ana fugba ma bʋblɔ ‑takasa nɩ, ana ‑susulu bäa' amɩ 'lɩ nö dëdrä ‑srɩ o ‑srɩ. 17'Be ‑sʋɩlɩ a 'jääa' 'fʋma ‑bɛ 'inyɩ ‑wlɛlɩ ‑a, ‑maa 'i tɛrɛ amɩ 'wliklɩbʋabʋakʋlʋ ‑sia' ana ‑sʋɩ 'wʋ. 'Ia 'wliklɩbʋabʋakʋlʋ ‑wlɛɛɛlɩ 'plɔʋplɔʋa ‑gʋ 'unya 'bʋa ‑gböösa 'unya ‑si ana ‑sʋɩ 'wʋ. 18Amɔlɔ nɩ, ‑mää i 'nyü 'jääa' ‑mää 'ii anyɩ 'bata, ‑maa i 'nyü 'nyɩ 'jääa' 'ii a 'bata. Dɛɛlɛ 'nyü 'jääa' 'nyɩ ‑wɩara ‑wɩara ‑a, ‑maa ɛ 'nyü 'nyɩ 'jäa' nɩ, 'ɛnyɩ blöröfa ‑a kä 'plɔʋ.

Currently Selected:

2 Korɛɛntënyüü 4: Bakwé

Highlight

Copy