1 Korɛɛntënyüü 11

1'Sɩrɩ 'n nöa' 'Kriisëa 'sa nɩ, 'ba nʋ bɩa 'na 'saa.

'SƖRƖ 'CƐCƖNYÜÜ KÄ ƖA' 'ÜMÄA' NƲ 'CƐCƲ 'LƖ

11.2–14.40

'Kriisë bä nyɔɔa 'wliklɩ, nyɔɔ bä 'ŋlʋʋa 'wliklɩ

2'N 'kɔlɔ 'amɩ#11.2 'N 'kɔlɔ 'amɩ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «‑Wlajü 'amɩ 'n 'kɔlɔ amɩ». wiili 'a boboa' 'na ‑gʋ wiia 'fɩɔa 'mlɩ, ‑bɛ wiili 'n 'kpɩaa' 'amɩ nɩ, 'a ‑ka ‑träärälɩ 'imɩ. 3‑Maa 'ba jresaa, 'Kriisë 'ɔɔ bä nyɔɔ o nyɔɔa 'wliklɩ. Nyɔɔ bä 'ŋlʋʋa 'wliklɩ. Nyɔsʋa nya bä 'Kriisëa 'wliklɩ. 4Nyɔɔ o nyɔɔ bibiea' Nyɔsʋa, 'aiɛ 'ɔ 'palaa' Nyɔsʋa mlɩ ‑bɛ 'ɔ ‑tʋʋäa' dapä 'wli nɩ, 'ɔa 'wliklɩa nyɔɔ 'ɔ 'böö 'klɩ. 5'Ŋlʋʋ o 'ŋlʋʋ bibiea' Nyɔsʋa, 'aiɛ 'ɔ 'palaa' Nyɔsʋa mlɩ ‑bɛ 'ɔnyɩ ‑tʋa' dapä 'wli nɩ, 'ɔa 'wliklɩa nyɔɔ 'ɔ 'böö 'klɩ. 'I ‑beere 'sɩrɩ 'ɔa 'wli kplaraa'#11.5 Wiili 'Pɔɔlë 'paplaa' 'klɩ nɩ, ‑kätɩsa 'ŋlʋʋa 'wli ma kplara nɩ 'i 'böö 'ɔɔn 'klɩ.. 6‑Bɛ 'ŋlʋʋ ma 'nyɩ ‑tʋ dapä 'wli ‑a nɩ, ɔ 'böbö 'ɔa 'ŋuei 'klɩ! ‑Maa ima bä 'nyüsü 'wʋ 'kä 'ŋlʋʋ 'mä 'wli kpla nɩ, ɔ ‑tʋ dapä 'wli.

7Nyɔɔ 'nyɩ kä ‑a kä 'ɔmä dapä 'wli ‑tʋ, 'be 'ɔɔ jajra Nyɔsʋa, 'ɔɔ bä Nyɔsʋaa 'bʋalakʋ; ‑maa 'ŋlʋʋ bä nyɔɔa 'bʋalakʋ. 8'Be ‑mää 'ŋlʋʋ 'lɩ 'ünyɩ nyɩbɛrʋ 'kʋɛɛrɛ ‑maa nyɩbɛrʋ 'lɩ 'ü 'kʋɛɛrɛ 'ŋlʋʋ#11.8 Jenɛɛsë 1.26-27; 2.18-23.. 9Nyɩbɛrʋ 'nyɩ nrörö ‑a nrörö 'ŋlʋʋa ‑gʋ, 'ŋlʋʋ 'ɔɔ nrörö nyɩbɛrʋa ‑gʋ. 10'Ii känyrɩ, 'ŋlʋʋ kä 'ɔmä dapä 'wli ‑tʋ 'aanjëa ‑gʋ, 'ii srara 'sɩrɩ 'ɔ ‑trääräa' 'lɩ 'ɔa dʋɔ. 11‑Maa 'Pläkänyɔɔ 'lɩ nɩ, 'ŋlʋʋ 'ɔɔ nö nyɔɔ ‑bɛ nyɔɔ nö bɩa 'ŋlʋʋ, 12'be 'sɩrɩ 'ŋlʋʋ 'ciea' nyɔɔ 'lɩ nɩ, 'asɩ 'ŋlʋʋ ‑guuö bɩa nyɔɔ. ‑Maa Nyɔsʋaa kälɩ wiia 'fɩɔ sɔ.

13'Ana 'mʋgbɛ 'ba bobo 'amä 'iin 'jä: 'i 'na ‑plɩɩ 'kä 'ŋlʋʋ 'mä Nyɔsʋa bibie 'kä 'ɔnyɩ ‑tʋ dapä 'wli? 14‑Fälɩ a kʋa' nɩ, nyɩbɛrʋa 'ŋuei ma tʋŋlɔ nɩ, 'iibä 'nyüsü 'wʋ, 15‑maa 'ii 'bʋala 'ŋlʋʋ. 'Be 'ɔa 'ŋuei tʋŋlɔ 'kä 'ɔa 'wli 'mä ‑sisie. 16Nyɔɔ ma 'bata 'ɔmä 'sɔɔwʋ 'ia 'blarʋlʋ 'blara nɩ, ɔ jresaa anyɩ ‑pasaa nɩ mlɩkä ‑a jre, 'palɩ Nyɔsʋaa 'cɛcʋ.

Nyɔsʋaa kuöa jijrɛ

17Wiili 'a nöa', 'ii 'n ‑gbala 'amɩ, 'nyɩ 'lɩ ‑a bɩa 'mä 'amɩ 'bʋala. 'Be 'ama trara ‑mää 'klɔɔtrʋ mi ‑gʋ 'anyɩ trara, ‑maa 'ana bʋbɔgbi ‑gälɩ 'paplakʋa ‑gʋ 'a trara. 18‑Kätɩ nɩ, 'crɛ bäblä 'mlɩ ‑bɛ 'a trara 'cɛcɩnyüköli. 'Ü ‑gbala 'mɩ 'iin, 'nyaa jresaa 'cɩcasa bäsaa. 19Abɩa 'crɛ bäblä 'mlɩ 'ana ‑tɔrʋpɩɔ ‑bɛ ‑mülü ‑trääräa' 'lɩ Nyɔsʋa 'mä jrere. 20'Ama trara nɩ, ‑mää 'Pläkänyɔɔa kuöa jijrɛ 'a 'nɩ ji. 21'Ama kɔkɔwälɩ 'amä dɛɛji dotro, ‑moloo ma bälɩ, 'ɔa 'mʋgbɛa jijrɛ 'ɔ dɔrɔwʋ, 'kä ‑gbëka 'blaa ‑mülüü ‑bɛ 'nʋ 'blaa ‑mülüü. 22'Anyɩ nyëka ‑a kä? ‑Bɛ dɛplɛɛ kä ‑gʋ 'anyɩ jrörödɛɛ ‑bɛ 'anyɩ 'mlara 'lɩ le? ‑Ale Nyɔsʋaa 'Cɛcɩ 'a 'bata 'amä cɛlɩ be? Nyüülü 'nyɩa' dɛɛ kä, 'üü 'a 'bata 'amä 'nyüsü 'blara? ‑Asɩ ‑a ‑gba le? ‑A 'bʋala 'amɩ? 'Nëmä 'amɩ ‑a 'bʋala 'plɔʋ!

23Wiili 'n 'kpɩaa' 'amɩ nɩ, 'Pläkänyɔɔ kälɩ 'n 'ba 'imɩ: ‑Gbialä kä 'mlɩ 'Pläkänyɔɔ Jesu 'saraa' nɩ, 'a ‑gbia 'dööläa 'mlɩ 'ɔ dɔrɔ 'flɔɔ 'wʋ. 24'Ɔ bɩaa' Nyɔsʋa 'tɛtrɛɛkʋ nɩ, 'ɔnya 'böblö 'uun ‑tɩa, 'ɔ ‑nëma: «'Ba dɔrɔ 'uun 'wʋ, 'ba ji 'uun#11.24 'Ba dɔrɔ 'uun 'wʋ, 'ba ji 'uun: ‑Taa waklüülü 'nyɩ grɛɛkë kätɩpɔɔkɩ ‑mɩdooa 'mlɩ ‑a bä., 'na fugba bäsaa, 'ää 'saraa' 'ana ‑gʋ. 'Ba nʋ 'imɩ 'amä 'na ‑gä plɛ 'pa.» 25'Ü bɩaraa' 'lɩ nɩ, 'asɩ 'ɔ nʋ bɩa 'ɔnya dɔrɔ ‑köwö 'wʋ, 'ɔ ‑nëma: «‑Taa ‑köwölä nɩ, 'ää bä kuö dëdrälä 'palaa' 'na ‑toru 'lɩ. 'Asɩ 'amäa' 'ään 'mla nɩ, 'ba nʋ 'imɩ 'amä 'na ‑gä plɛ 'pa.» 26'Ba jresaa, 'taɩn a 'fɩɔ 'lɩ 'amäa' ‑taa 'flɔɔlʋ ji, ‑bɛ 'amäa' ‑taa ‑köwölä 'mla nɩ, 'Pläkänyɔɔa jäjäa ‑gä 'a 'pa; 'asɩ 'anya kä kä, 'kä 'ɔnya ji.

27'A 'ia ‑gʋ, nyɔɔ ma 'pa 'iin sawʋ nɩ, ‑bɛ ɔma ji 'flɔɔlʋ, ɔma 'mla 'Pläkänyɔɔa ‑köwölä nɩ, ‑balʋ 'ɔ nʋ 'Pläkänyɔɔa fugba nyra 'ɔa ‑toru ‑gba. 28'Ii känyrɩ, ‑moloo ma bälɩ, ɔ bobo 'ɔa nʋnʋgbia ‑gä 'fɩɔwʋ ‑bɛ 'ɔmä 'flɔɔlʋ ji, ‑bɛ 'ɔmä ‑köwölä 'mla. 29'Be nyɔɔlɔ 'nyɩ ‑trääräa' 'lɩ 'iin, ‑bɛ 'ɔ jöa' 'flɔɔlʋ ‑bɛ 'ɔ 'mlaa ‑köwölä nɩ, Nyɔsʋaa 'pɔnɩkʋ 'ɔ 'kʋɛɛrɛ 'ɔa nyufa 'wʋ; 'be 'ɔnyɩ bobo ‑a bobo 'sɩrɩ 'Pläkänyɔɔa fugba bäa' 'saa. 30'Abɩa 'ia ‑gʋ, ‑wusu 'blaa 'ana ‑tɔrʋpɩɔa nyüü 'kɔkɔmlɛ, ‑bɛ ‑mölöö kpa, ‑mölöö nya järä 'ia 'mlɩ. 31Ama 'jäjrä ana nʋnʋgbi nɩ, Nyɔsʋa ‑nëmä ana ‑gä ‑a ‑tʋ. 32‑Maa 'Pläkänyɔɔ ‑tʋʋä ana ‑gä amä 'klɩ ‑gä, 'ɔ ‑pɩ amɩ ‑fälɩa nyüü 'cakla, 'ɔ ‑pɩ amɩ 'pɔnɩ.

33'Ii känyrɩ, 'na ‑wlajü 'amɩ, 'ama trara 'wʋ tarakʋa ‑gʋ nɩ, 'ba ‑glaaa 'ana ‑mölöö. 34‑Bɛ ‑gbëka ma 'bla nyɔɔ nɩ, ɔ tara 'ɔa ‑nyɛɛ, Nyɔsʋa ‑pɩ 'amɩ 'pɔnɩ 'taɩn 'lɩ 'amäa' trara. Wii ‑mɩlɩ 'a 'betrea' 'mɩ 'lɩ nɩ, ama ji 'nyaa 'iin 'känyɩglaa.

Currently Selected:

1 Korɛɛntënyüü 11: Bakwé

Highlight

Copy