Rome 12
12
Kiristtoosar kille de7o
1Yikke, ta ishuntso, Xoozza ufayssize, de7on geeshi zharsho mahi, yin galtto shiishode fana taanii yinttana Xoozze maarotitsite woossane. Yinnan Xoozza yin goynodes beezize turii oge. 2Lo77o, ufayssizen folo maaqqide Xoozze qofa shaakkii erodes yin wozintte laaminttotep attin hyanna alamito aazippete.
3Xoozii yin fetays fetays inggide ammanttii fana wozinaama asi fana qoppote. Qoppodes beezizannippa aatsii yinttana dummuzii, uturara qoppipete ga7i taas ingginttide aadho keehatitsite yinttis ohine. 4Nu fettii gallitii gidda dumma dumma billituntsi yene; yinna dumma dumma billituntsis dumma dumma oocha yene. 5Yinnii gaar, nuunii gaama asi maaqqikon Kiristtoosara fettii galla maaqqida. Nuunii fettii galla maaqqii dumma dumma billite fetay fetayra aykinttida. 6Nuus ingginttide aadho keehatitsite dumma dumma imo yene. Nu imotta tinbbite ohe maaqqiko, nuus yeze ammanttii gaar ohodes beezane. 7Nu imotta melluntsana maade maaqqiko, yinna oochite minggodes beezane; tamaarsse maaqqiko, yinna tamaarssite minggodes beezane. 8Nu imotta melluntsana mintsitse maaqqiko, miinggi mintsitsodes beezane. Nu imotta nuus yeze bazappa melluntsis ingge maaqqiko, wozinappa inggodes beezane. Nu imotta ahe maaqqiko, miinggi ahodes beezane. Nu imotta melluntsis keehe maaqqiko, ufayssara keehodes beezane.
9Yin siiqita afurappa kattara maaqqodes beezoos. Iita baz ixxote; lo77o baz mintsii aykkote. 10Fetay fatayra ishe fana siiqinttote; fetay fetaya bonchchote. 11Azal7ippete; yin ayyaanar miinggi Laatstsis oochchote. 12Xoozii inggide ufayssara ufayttote; madha dandda7ote; ubba wode Xooz woossote. 13Ammanze geeshshuntsana koshshize bazara maaddote; zaqqo mokkote.
14Yinttana bay7izuntsana anjjote; anjjotep attin baaddippete. 15Ufayttizuntsara ufayttote; yeekkizuntsara yeekkote. 16Fetay fetayra fettii qofite yezote. Utura qofa ashshii, yinttana ziqii yiizii, aada asuntsara wolla yezote. Yin yinttana era ga7i qoppipete.
17Ooden yinttis iita baz oochchiko, ye atstses iita mahippete. As ubba tiino nashshize lo77o oocha oochchote. 18Dandda7inttiko as ubbara saro yessades yinttis dandda7inttizanno ubba oochchote. 19Ta ishuntso, yin, yin ommite asis qime mahippete. Xoozii qime mahode fana ees ashshote. Geeshi Maxaafite,
«Taanii qime mahoda;
taanii kushito mahoda»
yagaane Laatstsii, ga7intti xaafinttida.
20Yezin Geeshi Maxaafite,
«Ne morkkizaya naydhdhiko muzo;
E baridhdhiko ushsho.
Ne yinno oochchiko E ommite
tama qaaqa gussane»
ga7intti xaafinttida.
21Iita lo77or gamotep attin iitara gaminttippe.
Currently Selected:
Rome 12: OydaNTL
Highlight
Share
Copy
Want to have your highlights saved across all your devices? Sign up or sign in
The word for the World Ethiopia
