Rōm 11
11
Pathianin Israel ei Heng Phat Ni Mak
1 #
Lev 26:44; 1Sa 12:22; Sām 94:14; Zer 31:37; 2Ko 11:22; Fil 3:5 Kei ti chu, hanōkten Pathianin a mi ngāi dōra chu ei khāi tina mo a ni zei? Ni pial mak. Asik chu koi len hi Israel mi, Abraham a chi le Benzamin nama mi kā nī na. 2Pathianin aphāmān ātā a mi riat zēt ngāi chu ei khāi ni mak. Eliza ruia Pathian Lekhabū'n hong mo ei ti ha riat u mak chē mo? Amā'n Israel mi ngāi chunga Pathian kōma hintin hin a dāi a ril a, 3“Puma, na deari ngāi chu a that u na. Na māichām ngāi chu a masiam u na. Koi rong hi ānniang kā ni zei. Kei damna ālāk ranga ā rok u na.” (1Rē 19:10, 14) 4Tenchu a kōma Pathianin imo ei masang ha? “Baāl Pathian matona mankhūk la bil lui mī 7,000 koi ka ranga ka la hōi a.” (1Rē 19:18) 5Hantin han, atun taka huna, lungkhamnāna ānthang ei ni anga, amaniang a lā om a. 6Hatuka hava ha lungkhamna sika a ni ten, a sinthō sika ni lāi mak. Hava lungkhamna ha lungkhamna ni lāi mak. Tenchu a sinthō sika a ni ten hava ha lungkhamna ni lāi mak. Hava a sinthō ha a sinthō ni lāi mak.
7Hanle imo? Israel ngāiin ei ravān u chu man u mak a. Tenchu ānthang ngāiin chu hava ha a man u na. Atei ngāiin malung a mankhir u na. 8#Mt 13:13-15A lei ānziak anga han,
“Pathianin amāni kōma malung sētna a pēk a,
Mu thei nōkna ranga mit a pēk a,
Riatthei nōkna ranga kuor a pēk a,
Avian tenpei a lā ni,” (Dān 29:4; Isa 29:10) a tī na.
9David-in,
“A dōkham u chu chāng lē chāngtē chang rase,
Amāni ranga anbāna lung lē phubalākna chang rase.
10Ei mū thei u nōkna ranga, a mit u ngāi chu zīng rase,
A ruong u chu ankulpē chian rase,” (Sām 69:22-23) a tī na.
Tukzom Anthō Thingbāk
11 #
Kui 13:46
Kei ti rēt chu: Hanle amāni ei ānbā u ha anthuirēt thei u lāi lui rang mo? Ni pial mak. Tenchu amānī'n ei masial u sika namtei ngāi ranga sandamna ei hong om a ni zei, Israel ngāi thang ei ānthuoi theina ranga. 12Amānī'n ei masial u sika maniapūr ranga aneina, hatuka amānī'n ei machān u sika namtei ngāi aneina a ni zei ten, amāni anzui kiar u tik vāng chu ituk ātam mo nei chang rang a ni.
13 #
Kui 9:15
Atun chu nangni namtei ngāi kōma chong kei ril rēt a ni zei, namtei ngāi kōma kuitīr kei ni sika hin hiva hasō le dorbō kei dom hi kei lianpui a ni. 14#Mt 1:21; Lk 2:11; Zn 3:17; Kui 4:12; 1Ko 1:21; 10:33; 1Th 2:16; 1Ti 2:4; Tit 3:5Taksa lama ka phung ngāi thang kei manthuoi zāma amāni bila senkhat luo chu sandama kei manthei una ranga kei lianpui. 15#Lk 15:24, 32Asik chu Pathianin amāni ei pom nōkna tak ha maniapūr ranga anngoina a hong āchang ten, Pathianin amāni ngāi a pom tik vāng chu thīna nātā damna rong nōk chu atei imo āom rang? 16#Lev 23:10, 17; Atl 15:18-21Vāipōltheppak āndar mānsā chu anthiang ten, vāipōl tang pumpui chu ānthiang a ni. Thingkung razung chu ānthiang ten, abāk ngāi um ānthiang a ni.
17 #
Zer 11:16; Zn 15:2; Kui 2:39; Efe 2:11-13 Oliv bāk senkhat a lei ankhiak ten, nang ram oliv kung, amāni bila tukzoma nei om, amāni le han a razung lē ei satna āmanpū nā ni zei, 18#Zn 4:22a bāk ngāi aduia anphu nō ro. Nā'n phu ten, riattit ro, nang ni mak a razung asūr, tenchu a razung kēng nang anā sūr. 19Nangin, “Tukzom kei om theina ranga a bāk ngāi chu ankhiaka om a,” na ti thei a. 20#1Ko 10:12; 2Ko 1:24; 1Ti 6:17; 1Pe 1:17Nei ti ha ādik a ni chu a ni, amāni chu ei iam u nōk sika ānkhiak a ni u na. Hatuka nang chu iamna sika ānding kēng nā ni. Ansānga anbē nō tānla āchi ro. 21Asik chu Pathianin abāk tatak ngāi luo mana hōi mak, nang vāng chu na hōi pial nō ni. 22#Zn 15:2; 1Ko 15:2; Kol 1:23; Heb 3:6Hasikhan Pathian ei singzia le ei rāngzia ha mandon ro. Ama chu nūk ankei ngāi ranga arāng a ni, tenchu ama singna chunga nā'n betōk u ten, nangni ranga Pathian ei singna chu a hong anlang a. Hanōkten nang um ni sela ankhiaka om in na ti. 23#2Ko 3:16Hanum ni sela, amāni ngāi ha a iam nōka a lā omtit u ten, amānī'm tukzom anthō anga Pathianin manzom u'n ti. Asik chu Pathianin amāni ngāi tukzom anthō anga a manzom rēt thei a ni. 24#Zer 11:16Asik chu anzom theilui, nangni, rama oliv kung luo mana ei na tuka rahuona oliv kung āsa le han tukzom anthō anga a na manzom thei ten, Pathianin abāk tatak ngāi vāng chu alāka oliv kung tataka ei manzom chu ituk mo ei ni rang a ni.
Israel Dōra Sandama om in ti
25 #
Lk 21:24; 1Ko 10:1; 2Ko 1:8; 1Th 4:13 Ūnāi ngāi, hiva chongrīl anthup rui hi nei riat u ranga kei zōt a ni. Hanōkten na ninga ahian nā'n ti viak thei u ngāi. Hiva hi chongrīl anthup chu a ni: namtei ngāi ranga kipna a hong āsuok māseng chu Israel nam chu malung ankhīrna bāk khat man u'n ti. 26#Isa 45:17; Zer 31:34Hantin han Israel dōra chu sandama om in ti, a lei ānziak anga,
“Zion ātā ratanpū chu hong in tia,
Zakob a chī nātā Pathian biak nōkna dōra chu hong khāi in ti.
27 #
Heb 8:10, 12 Āsia ei thō u ngāi dōra ka pei suole han,
Hiva hi amāni le ka dānkhitna chu chang in ti.” (Isa 27:9; 59:20-21; Zer 31:33-34)
28 #
Dān 7:8
Thangahui tianga na chōi ten nangni na ranga amāni ngāi chu na rāldui, tenchu Pathian ruotsā tianga na chōi ten na chipui ranga Pathian maditna a ni. 29#Heb 7:21Asik chu Pathian neinun pēk lungkhamna ngāi dōra lē amā'n ei kuina hi anlet ngāi mak. 30#Efe 2:2Tianlāi han Pathian hē telluia nei om u, tenchu atun amāni hē tel nōk sika riangvāimūna nei chang u. 31Havan tin dēn han amānī'm ni sela atun chu hē telluia ei om u, nangnī'n riangvāimūna nei chang u anga, amānī'm riangvāimūna ei chang thei una ranga. 32Pathianin lōkō takchunga a lungkhamna ei manlang theina ranga Israel ngāi alom una hē tel nōkna thuoia ei siak zit kēng a ni zei.
Pathian Anpākna
33 #
Zōb 5:9; Chp 8:17; Isa 40:28; Efe 3:10; Kol 2:3 O! Pathian riatna ei ānchongzia le ei hianna zia chu anthūk ba! A ruirilna ngāi um asūt suo zāt ni mak! Hanūk chu a lampui ngāi um athūna ariat suo zāt ni mak!
34 #
1Ko 2:16
“Asik chu tū mo Puma mandon ariatthei a lā ni?
Tū mo ama huongvārsakpū a lā ni?” (Isa 40:13)
35“Tū mo ei thuonna rang,
Ama a lei āpēk mānsā a om?” (Zōb 41:11)
36 #
1Ko 8:6; Kol 1:16; 1Ti 1:17; Heb 2:10; 1Pe 5:11; Anl 5:13 Asik chu alompeia ama kōm ātā le ama sika le ama ranga kiar a ni. Ama kōma anlianna tāituon tāituona om rase! Amen.
Bible in Ranglong, © Bibles International, the Bible society of Baptist Mid-Missions, 2024.