Mathāi 8
8
Isuo'n Āphār Khat ei Mandamna
Mk 1:40-45; Lk 5:12-16
1Ama chu muolpui ātā a hong āchum suole, mipui ātampā'n a nūk a zī u na. 2#Lev 13:45; Lk 5:12Entā, āphār#8:2 āphār: “Vun rikhuo tong” tīna a ni, atunlāia āphār nei riat anga ni mak. khat a hong a, “Puma, nā zōt ten, nangin na na manthiang thei,” tīna, a hong ā mōk a. 3Hatuka Isuo'n a kut a sōn a, a tōn a, “Kā zōt, anthiang ta ro,” a tī na. Anlāiseka ei phārna#8:3 phārna: Vun rikhuo tīna. chu a hong ānthiang a. 4#Lev 14:2-32; Mk 5:43; Lk 4:41; 17:14Isuo'n a kōma, “En ro, tūtē kōma ril nō ro. Tenchu sē tānla, chāizūng kōma na ninga vā'n lang ro. Amāni kōma riatpuina ranga, Mōsi a chongpēk anga anbōlna dāli va dar ro,” a tī na.
Sipai Razaruoipū Iamna
Lk 7:1-10
5Isuo chu Kapernaum khuona a hong ālūt le, sipai razaruoipū khat a kōma a hong a, sanna a hong zong a. 6Amā'n, “Puma, ka suok chu anhīp rikhuona, natna tuor sabaka ina om a,” a tī na. 7Isuo'n a kōma, “Hong ka tia, mandam ka ting,” a tipē na. 8#Sām 107:20Tenchu sipai razaruoipū'n a kōma, “Puma, ka insūnga nei hong lūt rang hi aruo ni mak ung. Tenchu chongbāi khat ngal ti tānla, ka suok chu dam in ti. 9Koi um mī ningneina thuoia om kā nī na. Ka thuoiā'm sipai a om u na. Angkhat kōma, ‘Sē ro,’ ka ti ten, a sē na. Atei angkhat kōma, ‘Hong ro,’ ka ti ten, a hong a. Ka suok kōma, ‘Hiva hi thō ro,’ ka ti ten, a thō chachak a,” a tī na. 10Isuo'n hava chong ha a riat a, a boi a dong a, a nūk azī ngāi kōma, “Taktaka, kei na ril a ni u zei, ama anga iamna ālian ādōn hi, Israel kāra ngal la mu ngāi mak ung. 11#Sām 107:3; Isa 49:12; Mal 1:11; Lk 13:29Kei na ril a u ni zei, suolam lē tāklam ātā mī tampā la hong u'n tia, vān rēngrama Abraham, Isak, Zakob ngāi bila lā'n sut u'n ti. 12#Lk 13:28Tenchu hava rēngrama mi ngāi chu Pathianin apanga azīng kāra pei in ti. Hava han chapna lē rakam anrialna om in ti,” a tī na. 13Hatuka Isuo'n sipai razaruoipū kōma, “Sē ta ro. Nei iam anga na chunga anthōna om rase,” a tī na. Hatuka, a suok chu hava dārkār taka han a lei dam a.
Peter a Tarpī ei Damna
Mk 1:29-34; Lk 4:38-41
14Hatuka Isuo chu Peter a ina a hong ālūt le, a tarpī chu atakin ei tuna azāla a hong mū na. 15Isuo'n a kut le a tōn na, atakin ei tun chu a mathān len a. Hatuka, ama chu anthui a, amāni dorbō chu a dom a.
Isuo'n Mī Tampā a Mandam
16Khului a hong ānī le, raluoiin ei sūr mī tampā a kōma a hong ruoi u na. Amā'n ratha sanōk ngāi chu chongkam duoi le a razūl a, āna ngāi dōra chu a dam u na. 17Deari Isaia amanga chong anrila om chu, “Amā'n koini nei rātnōkna ngāi chu lāk a. Nei natna ngāi dōra chu a pēl a,” (Isa 53:4)
ti ha, ei kip theina ranga a ni.
Isuo Nūk a Zī ei Āntakzia
Lk 9:57-62
18 #
Mk 4:35
Isuo'n a kōl a kianga mipui ātampā a mū na, son tiang varāla ankān ranga chong a pēk a. 19Hatuka dānmīnchūpū khat a hong a, ama kōma, “Mīnchūpū, nei sēna taka, na nūk na zī ka ting,” a tī na. 20#Dnl 7:13; Mk 2:10Isuo'n a kōma, “Sial ngāiin khur a dōn u na, chunga va ngāiin rabū a dōn u na. Tenchu, Miring Nāipasal chu a lū siakna rang mun dōn mak a,” a tī na. 21A zolāi ngāi kāra ateiin a kōma, “Puma, sē mānsā ka tia, ka pā va phūm bak rong,” a tī na. 22Tenchu Isuo'n a kōma, “Ka nūk na zī ro, āthi ngāi chu amāni āthi ruok chu phūm u rase,” a tī na.
Isuo'n Phāivuo ei Āngōna
Mk 4:35-41; Lk 8:22-25
23Hatuka ama chu rakuonga a chuong suole, a zolāi ngāiin a nūk a zī u na. 24Entā, tipuia anlāiseka phāivuo ānrikpā a hong a, tiduar ansokin rakuong chu a suk sabak a. Isuo chu a in zāt a. 25Hatuka a zolāi ngāi chu a hong u na, ama chu a mathui u na: “Puma, na san ta ro ba! Āthi suo rang nā ni zei hile!” a ti u na. 26#Sām 65:7; 107:29Isuo'n a kōm u na, “O, nangni iamna tōm ngāi! Hong sik mo na rathā nei manta u?” a tī na. Hatuka ama chu anthui a, thīnthī lē tipui chu ā ngō na, a hong āmong len a. 27Mi ngāi chu a boi a dong u na, “Hiva mī hi hong zāt miring mo? Thīnthī lē tipui ngalin a hē ei tel hi?” a ti u na.
Raluoiin ei Sūr Mī Anni ngāi ei Damna
Mk 5:1-20; Lk 8:26-39
28Hatuka Isuo chu tipui son tiang varāla, Gadara rama a vā suok a. Hava han raluoiin ei sūr mī anni, thānkhur ātā a hong āsuok chu antongpui a. Hava ngāi ha achālaka anchīruoi a ni u na. Hasikhan hava lampui tianga tūtē āsē ngam om u mak a. 29#Rui 11:12; 2Sa 16:10; 1Rē 17:18; Mk 1:24; Zn 2:4; 2Pe 2:4Entā, amāni chu anlāiseka ankhēk u na, “Isuo, nang Pathian Nāipasal, nang le hong mo koini nei na thō rang? Hun anruot māna anā'n sinsak ranga āhong mo nā ni?” a ti u na. 30Amāni nātā varāl uola vok ruol atampā anvāia om a. 31Raluoi ngāiin a kōma, “Nei na rahōk a ni ten, vok ruol ngāi sūnga son ālūt ranga na phal ro,” tīna a mathēm u na. 32Amā'n a kōma, “Sē u ro,” a tī na. Amāni chu a hong āsuok u na, vok ruol sūnga a vā lūt u na. Entā, anlāiseka vok ruol dōra chu nīmkeia a tān a, tipuia a vā chul u na, tīna a thi zit u na. 33Vok avāi ngāi chu a rot u na. Amāni chu khuona a sē u na, aloma a va ril u na. Raluoiin ei sūr ngāi rui um a va ril u na. 34#Lk 5:8; Kui 16:39Entā, khopui pumpui chu Isuo āntongpui ranga a hong āsuok u na. Ama chu a hong mū u na, ama chu a ram u nātā ānkhāi ranga a mathēm u na.
Bible in Ranglong, © Bibles International, the Bible society of Baptist Mid-Missions, 2024.