Mathāi 17
17
Isuo Mēlteina
Mk 9:2-13; Lk 9:28-36
1Nī ruk suona han Isuo'n Peter, Zakob lē a paruol Zohan ngāi chu a ruoi a, muolpui ansānga a vā kalpui a. 2Hava han amāni matona a mēl antei a. A māi chu anī anga a ēl a, a puon chu raāng anga a vār a. 3Entā, Mōsi lē Eliza chu amāni kōma a hong anlang u na, Isuo a chongpui u na. 4Hatuka Peter-in Isuo kōma, “Puma, hivana nei om rang hi koini ranga a sā. Nā zōt ten, hiva hin chubuk anthum manding in ti, nang na rang khat, Mōsi rang khat lē Eliza rang khat,” a tī na. 5#Kui 3:22-23Ama chu a lā chong lāitak han, entā, ansūm āvārin amāni chu a hong manlia na. Anlāiseka, ansūm ātā rōl a hong āsuok a, “Hiva hi ka Nāipasal madit, ama chunga hin ka rāi asān. Ama chu rangāi u ro,” a tī na. 6Hava ha zolāi ngāiin a riat u le chu, phila anbok u na, ā chi sabak u na. 7Tenchu Isuo chu a hong a, amāni chu a tōn a, “Anthui u ro, āchi u nō ro,” a tī na. 8Chung atang u le chu, Isuo rong nōk chu atei tūtē mu u lāi mak a.
9 #
Mk 8:30
Muolpui ātā a hong āchum u susūnga, Isuo'n a zolāi ngāi kōma, “Miring Nāipasal hi āthi nātā anthui māseng chu, hiva anlārna hi tūtē kōma ril u nō ro,” tīna chong a pēk a. 10A zolāi ngāiin a kōma, “Ichang mo dānmīnchūpū ngāiin Eliza kēng āhong mānsa rang ei ti u?” tīna a rakel u na. 11#Mal 4:6; Lk 1:16-17Isuo'n a masang a, a kōm u na, “Ataktaka, Eliza chu hong mānsā in tia, aloma hong sin kiar rēt in ti. 12Tenchu kei na ril a ni u zei, Eliza chu a lei hong suo zei. Ama chu mī'n lei riat mak a, tenchu a chunga amānī'n ei zozōt a lei thō u na. Hantin anga han Miring Nāipasal um amāni kuta antak ei tiar rang a ni,” a tī na. 13Hatuka zolāi ngāiin Baptispū Zohan a rui kēng ei ril, tīna a riatthei u na.
Raluoiin ei Sūr Pasaltē ei Damna
Mk 9:14-29; Lk 9:37-43
14Amāni chu mipui ngāi kōma a hong āsuok u le, mī khat chu Isuo kōma a hong a, mankhūk a hong bila, 15“Puma, ka nāipasal chunga lungkham na mupē ro, asik chu ama chu rirangol a tong a, a tuor sabak a, voi ituk mo moia ei chul a, tinā'm ei chul a ni zei. 16Ama chu na zolāi ngāi kōma ka ruoi a, tenchu mandam thei u ngāi mak a,” a tī na. 17Isuo'n a masang a, a kōma, “O, iamnabui lē khūk salui ngāi! Ituk ten mo na kār una kei om rang? Ituk ten mo kei na diar thei u rang? Ama chu ka kōma hiva hin hong ruoi u ro,” a tī na. 18Isuo'n raluoi chu ā ngō na, a sūng ātā a hong suok a. Hava dārkār len ātā nāipangtē chu a hong ādam a. 19Hatuka zolāi ngāi chu maruka Isuo kōma a hong u na, “Ichang mo koinī'n le hava ha nei razūl thei nōk?” a ti u na. 20#Lk 17:6; 1Ko 13:2Isuo'n a kōm u na, “Nei iam una ātōm sika a ni. Taktaka kei na ril a ni u zei, hoirō rū dōr ngal iamna nā dōn u ten, hiva muolpui kōma hin, ‘Hiva nātā sovā son anthot ro,’ na ti u ten anthot in ti. Nei thō thei u nōk rang ngal ītē om nō ni. 21Hanum ni sela, zārzong lē angoi rong nōk ānten, hiva ang hi chu suok thei mak,” a tī na.
Isuo'n ei Thi Rang Rui Aphāmāna ei Rilna
Mk 9:30-32; Lk 9:43-45
22Galili rama a om u lāi han, Isuo'n amāni kōma, “Miring Nāipasal hi miring ngāi kuta ānsūr vit rang a ni zei. 23Ama chu that u'n tia, nīnthum nikhuona anthui in ti,” a tī na. Hatuka amāni chu a malung a na sabak u na.
Peter lē a Pū'n Sia a Chōi u
24 #
Ant 30:13
Kapernaum khuo a hong ātung u le, tempula drakma#17:24 drakma: Hiva hi Grik sum, denari le ānmun, nikhat lō a ni. anni siachōi ānsuongpū ngāi chu Peter kōma a hong u na, “Nangni anā'n chūpū'n tempula drakma anni siachōi pēk chachak mak mo?” a ti u na. 25#Rōm 13:7Amā'n, “A pēk chachak,” a tī na. Ama chu in a hong ālūt le, Isuo'n chong a lei dō mānsā na, “Simon, nang le hong mo na mandon? Phila rēng ngāiin tū kōm ātā mo siachōi mo ole, ōt mo ei sūr u chachak? A nāi ngāi ātā mo ole mītei ngāi kōm ātā mo?” a tī na. 26Peter-in a kōma, “Mītei ngāi kōm ātā,” a tī na. Isuo'n a kōma, “Nāi ngāi chu a zōk. 27#Zn 6:61Hanum ni sela, amāni ādui nei chang nōkna ranga, tipuia sē tānla, rakuoi va pei ro. Rakuoia ngā ānlāk mānsā ha lāk tānla, a bāi phong tānla, sumrū dangka khat man in na ti. Hava ha chōi tānla, koi lē nang na ranga amāni kōma va pēk ro,” a tī na.
Bible in Ranglong, © Bibles International, the Bible society of Baptist Mid-Missions, 2024.