Esther 9
9
Zehudi ngāiin a Rāldui ngāi ei That una
1 #
2Sa 22:41; Est 3:12-14; 8:11; Chn 22:22-23 Hava suona chu tha sōmleianni changna Adar thā, ni sōmleianthum nikhuona, Zuda ādui ngāiin a chung una rui āril rang ei sabei u nikhuo, rēng chongpēk lē a dāndet anga ei thō u rang nikhuo chu a hong āsuok zei a. Tenchu hava nikhuo ha anthūl pak a, Zehudi ngāiin amāni anmūmāk ngāi chunga rui a ril viak u na. 2Rēng Ahasveros a ramzobāk ngāi dōrana a khopui u ngāia Zehudi ngāi chu amāni ānsiat ranga āval ngāi chunga kut anlek ranga anchun u na. Tūtē amāni ādui thei om mak a, asik chu nam tinin amāni chu āchi u na. 3#Est 8:17; Chn 16:7Ramzobāk tina nam milian ngāi, satrap ngāi, ramoppū ngāi lē rēng sin a thō ngāi chu Zehudi ngāi a san u na. Asik chu Mordekai anchina a chung una a chul a. 4#2Sa 3:1; 1Kh 11:9; Est 8:15Mordekai chu rēng-ina milian sabak a ni. A raming chu ramzobāk dōrāna a hong ānthang a. Hantin han Mordekai chu ei lianna ansōn riam a. 5Hantin han Zehudi ngāiin a rāldui ngāi chu khendāi le a vit a, a that a, a masiat biang u na. Amāni anmūmāk ngāi chu ei zōt anga a lōt u na. 6Susa rēng khopuia Zehudi ngāiin mī 500 athata a rūn u na. 7Parsandatha, Dalfon, Aspatha, 8Poratha, Adalia, Aridatha, 9Parmasta, Arisai, Aridai lē Vaizatha, 10#Aph 14:23; 1Sa 14:32; Est 5:11Hamedatha a nāipasal Haman, Zehudi ngāi rāldui nāipasal sōm ngāi um a that u na. Tenchu rālrūn neinun chunga kut thāk u mak a.
11Hava nikhuona Susa rēng khopuia mī ei that u dōra chu rēng kōma a hong mantung u na. 12#Est 5:6Hatuka rēngin Esther kōma, “Zehudi ngāiin Susa khopuia mī 500 lē Haman a nāipasal sōm ngāi chu athata a pei u zei. Rēng ramzobāk atei ngāia hong mo ei thō u a ni zei? Atun hong mo nei la zong? Hava ha anphal in ti. Atei hong mo nei la zong zōt? Hava hā'm na ranga anthōna om in ti,” a tī na. 13#Est 5:11Esther-in a kōma, “Rēngin asa a ti ten, Susa khopuia Zehudi mī āom ngāi ranga aviana dāndet anga hin nangtūk um anphal rase. Haman a nāipasal sōm ngāi ōkrikhāināna ankhāi u rase,” a tī na. 14#Dān 21:23Hatuka rēngin havan tin anga āthō ranga chong a pēk a. Hava dāndet ha Susa khopuia ei ānpuong lē Haman a nāipasal sōm ngāi chu a makhāi u na. 15#Aph 14:23; Est 8:11Hatuka Susa khopuia Zehudi ngāi chu Adar thāna, ni sōmleimanli nikhuona anchun rēt u na, Susa khopuia mī 300 a that u na. Tenchu rālrūn neinun chunga kut thāk u mak a.
16 #
Lev 26:7-8; Est 4:14; 8:11; 9:2 Rēng ramzobāk ateia Zehudi mī āom ngāi chu munkhata anchun u na, ei dam una chu a rung u na. A rāldui ngāi ātā pōngansa u na. Amāni a rāldui ngāi 75,000 a that u na. Tenchu rālrūn neinun chunga kut thāk u mak a. 17Hava ha Adar thāna, ni sōmleianthum nikhuona a ni. Hatuka ni sōmleimanli nikhuona pōngansa u na. Hava nikhuo ha nēkna pāntā lē khohui nikhuona a mang u na. 18Tenchu Susa khopuia Zehudi mī āom ngāi chu ni sōmleianthum lē ni sōmleimanli nikhuonā'm munkhata anbūm u na. Hatuka ni sōmleirangā nikhuona pōngansa u na. Hava nikhuo ha nēkna pāntā lē khohui nikhuona a mang u na.
Purim Pāntā
19 #
Est 3:7
Hasikhan khopui rakul dōnlui Zehudi mī khuona ommun akhuor ngāi chu Adar thāna, ni sōmleimanli nikhuona khohui, nēkna pāntā, pōngansana-ni, lē amāni lē amāni phāmpēk anthuonna nikhuona a mang u na. 20Hatuka Mordekai-in hiva rui ngāi hi a maziak a, rēng Ahasveros a ramzobāka āom Zehudi ngāi dōra, ālāna om lē ānāia om ngāi dōra kōma lekhā a mathuon a. 21Adar thāna, ni sōmleimanli lē ni sōmleirangā hi kum tina āmang ranga chong a pēk a. 22#Neh 8:10; Sām 30:11-12Asik chu hiva nikhuo hin Zehudi ngāiin a rāldui ngāi ātā pōng ei ānsa u na, hatuka hava thā han lunghāngna nātā rāisānna ei changna, chapanngūi ātā pōngansana nikhuo; hava ha nēkna pāntā lē rāisānna nikhuona, amāni lē amāni phāmpēk anthuonna lē ānriang ngāi kōma neinun anthuonna nikhuona āmang ranga chong a pēk a.
23Hasikhan Zehudi ngāiin a lei phut anga lē Mordekai-in ei maziak anga chongpēk chu a pom u na. 24#Ant 17:8-16; Est 3:6-7Asik chu Agag mī Haman, Zehudi ngāi rāldui Hamedatha a nāipasalin, Zehudi ngāi āpei biang ranga a val a, Pur (hiva hi semā-en) a en a. 25#Dān 21:22-23; Est 7:10; 9:13Tenchu Esther rēng matona a hong a, amā'n lekhamathuon amanga chong a pēk a, Zehudi ngāi ranga asa nōk a lei mandon chu ama lu chung lena chul rase, ama lē a nāipasal ngāi chu ōkrikhāināna anthōi rase.
Purim Pāntā ei Ānmangna
26 #
Est 3:7
Hasikhan Pur raming azīna hiva nikhuo ngāi chu Purim a ti u na. Hasikhan hava lekhamathuona chongkam ngāi dōra lē hiva ngāi ruia ei hong mū u ngāi lē ei hong tong u ngāi sika, 27Zehudi ngāiin a ning una lē a khūk u ngāi ang chipa lē amāni nama ālūt ngāi dōrā'n chu chāi thak luia hava nikhuo anni ngāi ha, lekhabūna ānziak anga lē hunbī a lei ānthang ang taka, kum tina ei mang u chachak rang. 28Hatuka hava nikhuo ngāi ha akhūk akhūka insūngkuo tinin, ramzobāk tinin lē khopui tinin riattitna ranga ei mang u chachak rang. Hiva Purim#9:28 Purim: Pārsia chonga “Semā-en” tīna a ni. nikhuo ngāi hi Zehudi ngāi kāra anpial luia ei ānmang rang, hatuka a khūk u ngāi kāra riattitna chu ei sāi lāi nōkna rang.
29 #
Est 2:15
Hatuka Abihail a nāinupang, rēngnū Esther, Zehudi mī Mordekai le han ningneina dōra lē lekhā anthuon voi annina Purim ruia ei detna ranga a maziak u na. 30Mordekai-in rēng Ahasveros a rēngrama ramzobāk 127 kōma phūkdāina chongkam lē dikna chongkam lekhā chu Zehudi ngāi dōra kōma, 31#Est 4:1-3, 16amāni a ning una lē a khūk u ngāi ranga dāndet ei sin u, angoi lē chapna ruia, ahun anruot taka, hiva Purim nikhuo ngāi Zehudi mī Mordekai lē rēngnū Esther-in ei pēk anga andet ranga lekhā ei mathuon u. 32Esther a dāndetin Purim rui chu a det a, hava ha lekhabūna anziak a.
Bible in Ranglong, © Bibles International, the Bible society of Baptist Mid-Missions, 2024.