Kuitīr Ngāi Sinthō 8

Kuibing Ansinsakna Sika Āiampū ngāi ei Ānthek Rak una

1Stefen athat u lāi han Saul-in um ei mahampui a ni. Hava nikhuo len ātā Zerusalem khopuia kuibing āom ngāi chunga achālaka ansinsakna a hong āsuok a. Kuitīr ngāi rong nōk chu, āiam ngāi dōra Zudāi ram le Samari rama anthek rak u na. 2Pathian andon mī senkhat ngāiin Stefen chu a va phūm u na, achālaka a chap sabak u na. 3#1Ko 15:9; Gal 1:13, 23; Fil 3:6; 1Ti 1:13Tenchu Saul hān kuibing ngāi ānsiat a phut zei a. In tina a vā lūt a, nupang pasal a va nuka lung ina ankhum ranga a betōk a.

Samari-na Filip a Thangahuirilna

4Hatuka hava anthek rak ngāi ha ei sē una mun tina thangahui chong a ril tir u chachak a. 5Hatuka Filip chu Samari rama khuona a sē na. Amāni kōma Khristā rui a va puong a. 6Hatuka mipuiin Filip a chong a riat u lē sinsiana ngāi rui ei riat u na, ei mu u na, malung munkhata a hē a rangāi u na. 7#Mt 4:24; Mk 16:17Asik chu rathā ānnimin ei sūr mi ātampā sūng ātā anringpāna ankhēka rathā ānnim ngāi chu ei hong suok u chachak a ni. Hanūk chu āzeng le ākhor tamtak um a lei mandam a ni. 8Hantin han hava khuona han achālaka rāi ei mansān u a ni.

Mitpialdōi Athei Simon

9Tenchu hava han mī khat Simon ei ti u chu a om a. Ama chu aphāmān han dōi a thō chachak a. Samari mi ngāi chu a boi a mandong chachak a, a ninga milian khat antī na. 10Mi dōrā'n āsīn khīt ātā ansāng khītin um a chong a rangāi sabak u na. Amānī'n a ti u na: “Hiva mī hi Pathian thōtheina ālian khīt ādōn a ni,” a ti u na. 11Hun asōtpā nātā a dōitheina le han mī a boi ei mandong chachak sika han ama chong ei rangāi u chachak a. 12#Mt 3:2Filip-in Pathian ram le Isuo Khristā raming ruia chong a ril a. Filip a chong a iam a, nupang pasal baptisma a lāk u na. 13Hatuka Simon len um a iam a, baptisma a lāk a, Filip a bila a om chian a. Sinsiana ngāi le tichangbui sinthō ngāi a mū na a boi a mandong a.

14 # Lk 22:8; Heb 4:12 Hatuka Zerusalem khopuia om kuitīr ngāi hān, Samari khuona mi ngāiin Pathian chong a pom u zei tī a riat u le, Peter lē Zohan amāni kōma a tīr u na. 15#Zn 20:22Hatuka amānī'n Samari khuo a vā suok u le Samari ngāiin Rathā Ānthiang ei manthei una ranga zār azong u na. 16#Mt 28:19Asik chu hava mān han amāni kāra tūtē chunga Rathā Ānthiang la hong tung mak. Puma Isuo raming ronga kēng baptisma ei lāk u. 17#Zn 20:22Hankēng Peter lē Zohan a chung una a kut a bāng u na, Rathā Ānthiang a man u na. 18Kuitīr ngāiin mi chunga a kut a bāng u le Pathianin Rathā Ānthiang ei man u Simon-in a mū na, a kōm una sum apēk rang a tī na. 19“Koi um hiva ang thōtheina ranak na pēk u ro, hankēng angkhat pei chunga ka kut kei bāngna taka Rathā Ānthiang ei manthei una ranga,” a tī na. 20#2Rē 5:16; Dnl 5:17; Mt 10:8Tenchu Peter-in a kōma: “Pathian neinun pēk hi sum le ānchōk rang malung nei thō sika, Pathianin na sum le ile na pei rase. 21#Neh 2:20; Sām 78:37Pathian mitmūna na malung ei diknōk sika, hiva dorbōndomna hin kop mak chē na, chang-āi um dōn mak chē. 22Hasikhan, nei siat ātā ansīr tānla, Pathian kōma zārzong ro. Na malung mandonna chu Pathianin a na maduol ving thei ngāi. 23Asik chu na sūng hi akhana ābit lē ādik nōka ānkhit kēng nā ni tī ka na mu,” a tī na. 24#Ant 8:8; Atl 21:7; 1Rē 13:6; Zer 42:2Hatuka Simon-in a masang a, “Nei ti u ngāi dōra ka chunga ei chul nōkna ranga, Puma kōma zār na zongpē u ro,” a tī na.

25Hatuka amānī'n a manriat tir u na, Puma chong a ril tir u na, Zerusalem khopuia a kīr u na. Hava han ei pan balam u han Samari mi ngāi khuo tamtaka thangahui chu a ril tir u na.

Filip lē Ethiopia Thāidōr

26Hatuka entā, Puma vānpalāi khat Filip a kōma chong a hong ril a, “Anthui tānla, sim tianga lam Zerusalem khopui ātā Gaza khuo āpan lampuia sē ro,” a tī na. Hava lampui ha mibuiram panna lampui a ni. 27#1Rē 8:41-43; Sām 68:31; Isa 56:3-5; Zef 3:10; Zn 12:20Hatuka anthuia a sē len a. Hankēng entā, Ethiopia mī khat, Ethiopia ngāi rēngnū Kandaki thuoia dorbōndom thāidōr ulian khat a om a. Ama hi rēngnū anei anung ngāi dōra chunga ārungpū a ni. Ama chu Pathian abiak ranga Zerusalem-a āhong a ni. 28Hatuka a hong kīr tiang han sakortolāia chunga ansuta deari Isaia lekhabū a siar tir a. 29Hankēng Rathā'n Filip a kōma: “Sovā ei chuongna sakortolāi so va huom tānla vā'n loppui ro,” a tī na. 30Hatuka Filip thāidōr kōma atān le chu amā'n deari Isaia lekhabū kēng ei siar tī a va riat a. Hatuka Filip-in a kōma, “Hava nei siar ha imo a omzia na riatthei mo?” a tī na. 31Hatuka Ethiopia mi hān, “Mī khat peiin a na ril a, a na manthiang vang nōk ten, hontin mo kei riatthei rang?” a tī na. Hasikhan Filip chu ama bila avā chuonga ānsutpui ranga a mathēm a. 32Pathian lekhabū a lei siar chu hiva hi a ni,

“Ānthat ranga bera anga ama chu aruoi u na.

Mul anchēppū makunga beratē anga a dāirek a.

Ama chu a mūr malong mak.

33Annuoia a om lāi han, ama āsanpū ranga tūtē om mak.

Ama a chī le a khūk rui tū mo āpuong rang?

Ramuol ātā ama ei damna chu ei lākpē u,” (Isa 53:7-8) tī hi a ni.

34Hatuka thāidōrin Filip kōma: “Dearī'n hiva hi tū ruia mo ei ril? Ama atheia rui mo ole mītei ruia mo ei ril? Hiva rui hi anā ril ranga kei na rakel,” a tī na. 35#Mt 5:2; Lk 24:27Hankēng Filip chu hiva Pathian lekhabūna chong ātā aphuta Isuo ruia thangahui a kōma a rilpē na. 36Hatuka amāni ha lampuia a sē susūng u na, tī ei omna mun khat a hong suok u na. Hasikhan thāidōrin, “Entā, hiva hin tī a om hile, baptisma kei lākna ranga hong mo a na khār?” a tī na. 37Hatuka Filip-in a masang a: “Na malung dōra le na iam ten, na lāk thei,” a tī na. Hatuka thāidōrin a masang a: “Isuo Khristā chu Pathian Nāipasal a ni tī ka iam zei,” a tī na.#8:37 Grik Bāibul senkhatin hiva kam hi a pei u na. 38Hatuka sakortolāi chu pōngansa ranga a tī na. Filip lē thāidōr chu tīna a vā chum rit u na, Filip-in ama chu baptisma a pēk a. 39#1Rē 18:12; 2Rē 2:16; Izk 3:12, 14; 2Ko 12:2; 1Th 4:17; Anl 12:5Hatuka tī nātā a hong kal suo phing u le, Puma Rathā'n Filip chu anlāiseka aruoi viak len a. Thāidōrin Filip chu a mēl a mū lāi nōkā'm ni sela rāisān hieia a lampui a pan a. 40Tenchu Filip chu Azota khuona a vā'n lang rēt a. Hatuka ei sē balam han Kaisaria khuo tenpei khuo tina thangahui a ril titir a.

Currently Selected:

Kuitīr Ngāi Sinthō 8: RNL

Highlight

Copy