Kuitīr Ngāi Sinthō 27
27
Paul Rakuongpuia Rōm-a ei Ānzinna
1Rakuongpuia anveia Itali rama koini nei pan rang chong a masat suo u le, Paul lē atei ānkhum ngāi senkhat ngāi ha Augusta Sipaiphoma sipai razaruoipū khat a raming Zulia kōma a betōk u na. 2Hatuka Adramutenos khuona rakuongpuia koinī'm nā chuong a. Hava rakuongpui ha Asia ram tipui makapa mun āom dōra ei pal rang a ni. Tipui kāra nei āntol a ni zei. Hatuka Thesalonika khuona Aristarka, Makedonia rama mī chu koini bila om a ni. 3#Mt 11:21Zīng khuovāra Sidon khuona na vā'n bē na, Zulia chu lungkhamna le han Paul a ompui a. Ama ei nāng dōra ei zon thei una ranga a mal ngāi bila ānchel rang a phal a. 4Hava nātā tipuiliana nā'n vei rēt a. Tenchu thīnthī na maton changa a lei om sika Saipras muolanlān ralī songa nei ānvei. 5Hatuka Kilikia ram lē Pamfulia ram ādēp tipui makapa tipui anzara nei ānvei a ni. Hatuka Lukia ramte sūnga Mura khuo tiang nā'n vei a. 6Hava muna han sipai razaruoipū han Aleksandria khuona rakuongpui khat Itali ram āpan rang chu a mū na. Hava han koini a na manchuong a. 7#Tit 1:5Hatuka nikhuo sōtpā tīna zāmzāma nā'n vei a, Kinidos khuo kōla tirakham chu antak chunga na vā tung thei a. Thīnthī'n ei na khār sika ālā anvei thei mak mē na, Salmone khuo radīna Krīt muolanlān ralī song nei ānvei a ni. 8Antak chunga hava rauop chu nā'n vei a, mī'n Rakuongpuikātī Munhui ei ti u muna nā'n bē na. Hava mun ha Lasaia khopui kōla a ni.
9 #
Lev 16:29-31; Atl 29:7 Hun asōtpā a theng suona, rakuongpuia ānvei um anchina om a. Asik chu ngoina pānta#27:9 ngoina pānta: Anthiarna nikhuo tīna, Erthā-Rūtlāi hun a ni. Nūdin thīnthī ei ānrik hun ei ni sika tipuia ānzin hi antak a. nikhuo um anzui suo zei a. Paul-in amāni kōma anrēngna chong a ril a, 10“Pū ngāi, hiva nei ānzin rang hi siatna lē chānna lian sabak ātong ranga ka mū. Neinun ngāi lē rakuongpui rong ni mak, nei damnā'n kēng,” a tī na. 11Tenchu sipai razaruoipū chu Paul-in ei ril nēka, rakuongpuipū lē rakuongpui puma hē chu a iam uol a. 12Asik chu hava rakuongpui anbēna mun ha nūdina āom ranga chu ei ānsūk nōk sika ātam rieiin chu nei lā'n vei sā ranga a masuk u na. Asik chu Foinika khuona a vā tung zāma hava han nūdin āmang ranga ei sabei u a ni. Foinika khuo chu Krīt muolanlāna rakuongpui mun khat a ni. Hava ha mārtāklam lē simtāklam māi athak rit a ni.
Phāivuo Ānrikpā
13Hatuka sim thīnthī chu a hong phiphiei le chu a derdīn u ha a suok u zei ti anriat u na, rakuongpuia thīrchingki chu a makhal u na, Krīt muolanlān rakham kokōla anvei u na. 14#Mk 4:37Tenchu hun la sōt rei mak muolanlān tiang ātā phāivuo ānrikpā'n a hong suk u na. Hava phāivuo ānrikpā ha a chong una “Eurakulon” a ti u na. 15Hatuka rakuongpui chu phāivuo'n a hong suk a. Thīnthī tianga maton nei song thei lāi nōk sika nei mathān rak a ni zei. Hatuka thīnthī'n a na vei titir a. 16Hatuka Kloda ei ti u muolanlān āsīntē ralī songa nā tān a, antak sabak chunga ansanna rakuongtē chu na mazōk zām thei a. 17Hatuka ansanna rakuongtē chu chung na makhal suole han rakuongpui athuoi tiang rīza le han a khit u na. Hatuka Surtis ei ti u suor muna phil avā suk rang ei chi u sika rakuongpuia puon anzar chu a masum u na. Hatuka thīnthī'n a na malīm titir a. 18#Zon 1:5Hatuka zīng khuovāra chu phāivuo'n ei na suk sabak sika rakuongpuia neinun aliak ngāi ānsul a phut u na. 19Hatuka nīnthum changnāna chu koini na kut len le rakuongpuia tinratuo ngāi chu nei pei a ni zei. 20Nikhuo tampā chu ani mēl lē ārsi ngāi um anlang mak. Phāivuo chu ei lā'n rik chian a ni. Nei damna azōk rang reng chu ansabeina nei dōn lāi nōk a ni.
21Nēksāk thō luia āsōtpā a om suo u na, Paul chu amāni lāia anding a, “O lōko ngāi, ka chong nei rangāi u na, Krīt muolanlān ātā nei hong suok u nōk ni sela chu, hiva siatna lē chānna hi ei om nōk rang ke ba. 22Atun um ni sela malung arāttita āom ranga kei na mathēm u. Asik chu tūtē'n nei dam una machān u nō ta ni. Tenchu rakuongpui rong kēng koinī'n nei machān rang. 23#Rōm 1:9; 2Ti 4:17Asik chu avian zāna han Pathian vānpalāi khat ka kōla a hong āndinga Ama tā kei ni le ama dorbō kei dom babang Pathian kōm ātā a hong ānī na. 24Amā'n ka kōma: ‘Paul, āchi nō ro, Kāisar matona nei la vā'n ding ngēt rang a ni. Hanūk chu en ro, rakuongpuia miring nei ānveipui ngāi dōra ei dam una ranga Pathianin ei na pēk kēng,’ a tī na. 25#Rōm 4:20-21Hasikhan lōko ngāi, na malung manrāt u ro. Asik chu Pathian ka iam, amā'n ei na ril ang taka ei chuk rang kēng. 26Tenchu muolanlān angkhat peia chu nei vā'n bē rang a nāng,” a tī na.
Rakuongpui ei Ānletna
27Zān sōmleimanli changna zāna Adriatik tipuia thīnthī'n a na la malīm chian a. Hatuka zānchim ripa chu rakuongpu ngāiin hova mun khat leka mo a hong āsuok kēng nā ni zei tīna a mandon u na. 28Hatuka tī ei ānthūk a mankhī u na, fīt 120 anthūk a ni tī a riat u na. Hanūk chu a sē uol u le a mankhī rēt u na, fīt 90 ānthūk tī a riatthei u na. 29Asik chu lungpui va suk lam ving ma ni a tī na a rathā ei ta u a ni. Hasikhan rakuong nūk tiang ātā thīrchingki manlī a masul u na. Hatuka khuovār rang chu a maruong u na. 30Hatuka rakuongpu ngāi chu ārot rang ei zōt u sika han rakuongpui a lu tianga thīrchingki ānsul rang om athō u na. Tenchu sanna rakuongtē kēng tipuiliana ei masul zēt u na. 31Paul-in sipai razaruoipū lē sipai ngāi kōma, “Hiva mi ngāi hi rakuongpuia a om chian u nōk ten, nangni chu zōk u nō ta ni,” a tī na. 32Hankēng sipai ngāiin sanna rakuongtē khitna rī chu a āt pita, a māk u na.
33Hatuka anrapa khuo a hong āvār rang vit le han Paul-in mi ngāi kōma nēk sāk athō lak u ranga achālaka a mathēm a. Amā'n: “Aviana le hin ni sōmleimanli ei changna nikhuo a ni zei, ītē nēk sāk abuia lunghāng chunga nei ngāk chian u. Ītē nēk sāk thō u mak chē na. 34#Mt 10:30Hasikhan nēk sāk athō lak ranga achān kei na mathēm u a ni zei. Asik chu na taksā damna ranga hava ha nei nāng u a ni. Nangni bila tūtē na lūna samsang khat ngal anpei rang om u mak chē,” a tī na. 35#Mt 14:19Hava ngāi a ril suole han amā'n vāipōltāp a lāk laka lōkō matona Pathian kōm rāisānchong a mantung a. Hatuka hava ha a khiak a, āsāk rang a phut u na. 36Hava chong hān alom una ranga lungngamna a pēk a, hatuka amānī'm vāipōltāp a sāk u na. 37Hava rakuongpui sūnga han koini na loma miring 276 nā ni. 38#Zon 1:5Hatuka akhopa a nēk suo u le gōm chu tipuiliana ānsul rang a phut u na, rakuongpui chu ei manzāng bet u a ni.
39Hatuka sūn a hong āvār suole han hava mun ha a raming riat u lāi mak. Tenchu tipuikam siatsāi omna mun khat a mū u na, a thō thei u ten hava muna a rakuongpui chu avā bē ranga a masuk u na. 40Hatuka rakuongpuia thīrchingki dōra a āt u na tipuia a māk u na. Hava bibila rakuongpui veina a tizāp ankhitna rīza a sūt u na. A lu tianga puon anzar chu thīnthī'n ei veina changa a zar u na. Rakuongpui chu siatsāi tiang matona mansong u na. 41#2Ko 11:25Tenchu tipui ei ānchunna āsuo anni ei omna taka tipui sūnga lung apō khatin rakuongpui chu a man-ōk tit a. Hasikhan rakuongpui a lū chu sīngansa thei lāi mak. Kiang khat tiang rēta anūk tiang ātā tiduar ansokin ei hong suk sika a kui rang a ni zei a. 42Sipai ngāiin ankhumna-ina ānkhum ngāi chu āthat ranga a val u na. Hanoten, tī anlieia a rot u thei a. 43Tenchu sipai razaruoipū hān Paul chu āndam rang ei zōt sika hava ei mansūk u anga athō ranga ei khār a ni. Hatuka tī ānliei thei dōra chu rakuongpui ātā antōm mānsāna anlieia tānga avā kal ranga chong a pēk a. 44Hatuka atei nūka āom ngāi chu rakuong sūnga āom tak mo ole thingpēk rakuonga āom abong abui angkhat pei ei man takpei asūra ankān ranga chong a pēk a. Havan tin han alom una azōkhieia tānga ei ānkān kiar thei u a ni.
Bible in Ranglong, © Bibles International, the Bible society of Baptist Mid-Missions, 2024.