Kuitīr Ngāi Sinthō 10
10
Peter lē Kornelia
1Hatuka Kaisaria khuona mī khat a om a, a raming chu Kornelia a ni, ama hi Itali Sipaiphom ngāi bila sipai razaruoipū a ni. 2Ama lē a insūng mi ngāi dōra Pathian andon mi lē Pathian anchi mī a ni u na. Mī ānriang ngāi chu anphal taka a pēk chachak. Pathian kōma mongluia zār a zong chachak. 3#Sām 55:17Nikhat chu chonūk dar anthum dāma anlārna a mū na. Pathian vānpalāi khat ina a hong ālūt a mū na. Amā'n, “Kornelia,” a tī na. 4#Sām 20:3; Mt 10:42; Anl 8:4Hatuka Kornelia-in ama tiang a en chian a, a rathā a tā na, amā'n, “Puma, hong mo?” a tī na. Vānpalāiin a kōma, “Na zārzongna ngāi lē ānriang ngāi nuompēk nei pēk chachak ngāi chu riattitna anga Pathian makunga a vā tung zei. 5Atun len Zopa khuona mi tīr tānla, mī'n Peter ei ti Simon ha va manlāk ro. 6Ama ha mevun ānchi chachak Simon atei ina atunga a om a ni. Ama a in omna chu tipui kōl tak nī'n ti. Amā'n nei thō rang chu aloma na rilpē zit in ti,” a tī na. 7Hatuka ama a chongpui vānpalāi a sē suole han, Kornelia'n a insūnga a suok dōn anni lē Pathian andon mi ama āngāk ngāi bila sipai khat a kui a. 8Hatuka Kornelia'n a kōm una aloma chong ā ril zit suole han Zopa khuona a tīr a.
Peter-in Anlārna a Mū
9 #
Mt 24:17
Hatuka zīngkhuovāra ei pan una rang a sē una khuo a vā suok vit u le Peter chu zār azong ranga insūnga chung ansānga a vā kal a, hava lāitaka hun ha sūnchim lāitak a ni. 10Hankēng chu a von a hong ānchām a, ānēk a zōt a, tenchu ei nēk rang chu a mansūkpē u lāitak han anrālna a mū na. 11#Mt 3:16Chungvān anlong a, hong lek mo puon alianpā anga achuma, kil manlina rī ankhita, phila ansuma om chu a mū na. 12Hava puon sūnga han phila sakemanlī ran chi tin, ramsa ngāi, nukanei alōn ngāi lē chunga va ngāi a om u na. 13Hatuka a kōma hē a hong āsuok a: “Peter, anthui tānla hiva ngāi dōra hi thata sak ro,” a tī na. 14#Lev 11:4-8; Dān 14:3-20; Izk 4:14Tenchu Peter-in: “Puma, havan tin han chu ni nō rase ba. Asik chu ānnim le ānthiang lui ītē nēk sāk ngāi mak ung hile,” a tī na. 15#Aph 9:3; Mt 15:11; Lk 11:41; Rōm 14:14, 17, 20; 1Ko 10:25; 1Ti 4:3-4; Tit 1:15Voi annina a kōma hē a hong rēt a: “Pathianin ei manthiang suo chu nangin ānthiang nōk ti nō ro,” a tī na. 16Hantin chian han voi anthum hē a hong āom a. Hava suole chu anlāiseka hava neinun ha chung tiang ankhal vat rēt a.
17Havan tin han Peter ramang anga anrālna ei mu ngāi a omzia riatthei mak. Athei daka a mandon chian lāitak Kornelia a mi tīr ngāi chu a hong tung u na. Simon a in chu a hong tok u na, bēr panga makot kōla ānding chian u na. 18Amānī'n apāia, hava han Peter ei ti u Simon ha ei om lē om nōk a rakel u na. 19Hava tak han Peter chu ramang anga anrālna hong zazāt mo ei mu ngāi ha a mandon lāitak Rathā'n a kōma: “Entā, pasal anthumin a na hong ravān u so. 20Hasikhan anthui tānla, thuoia va chum ro. Hatuka amāni bila sē tānla ītē malung antholna dōn nō ro. Asik chu hiva ngāi hi kei hong tīr u kēng,” a tī na. 21Hatuka Peter chu thuoia a chum a, hava mi ngāi kōma a sē na, “Nei hong ravān u miring ha koi hi kā ni zei, hong mo asik nei hong u na?” a tī na. 22Hatuka amānī'n: “Vānpalāi Ānthiang khat amanga sipai razaruoipū Kornelia kōma Pathianin a manthei a. Amā'n nang na chong anngāi ranga a ina ei na mankuina ranga ei na tīr nā ni. Ama chu mi diktak le Pathian ānchi mi le Zehudi nam pumpuiin um achān lalchi ei thō mī a ni,” a ti u na. 23Hatuka Peter-in hava ngāi ha insūnga a kui a, a ina a manriak a.
Kornelia ina Peter a Vā Om
Zīngkhuovār le Peter anthuia amāni bila a sē na. Hanūk chu Zopa khuona paruol senkhat um amāni bila a va zī u na. 24Hatuka hanūka nikhuona chu Kaisaria khuona a vā lūt u na. Hatuka Kornelia'n a unāi ngāi dōra lē a mal madit tatak ngāi aloma a ina a kui kiara a lei maruong u na. 25Hatuka Peter avā lūt rang vit le han Kornelia a sē na a lei va zong a, a kekunga anbok laka a mōk a. 26#Anl 19:10; 22:8-9Tenchu Peter-in a mathui a: “Ānding ro, koi um nang na anga miring kā ni,” a tī na. 27Hatuka a chong chuchunga ina a lūt u na, mī tampā a lei ānchun a va mū na. 28#Zn 4:9Hatuka Peter-in a kōm u na: “Zehudi nam ngāi chu namtei le ānlop lē a bil una āsē hi nam kal dānin phal mak ti ha na riat kiar u na. Tenchu Pathianin mī tūkareng ranga anthiang mak le ānnim kei ti nōkna ranga a na manmū na. 29Hasikhan nei na hong mankui le bāi mankham luia kei hong len a ni. Hanle hong sik mo nei na hong mankui, ka na rakel?” a tī na.
30 #
Zn 20:12
Hatuka Kornelia'n a tī na: “Hiva hun ātā ni manlī māna a ni zei angoia kei om a, chonūk dar anthuma ka ina zār kei zong chian a ni. Hatuka entā, mī khatin puon ālang sabak antianga ka matona a hong ānding a. 31Amā'n: ‘Kornelia, Pathianin na zārzong ngāi dōra a na lei riatpē tit zei. Hatuka mi ngāi kōma na nuompēk ngāi um a na lei riattitpē zei. 32Hasikhan Zopa khuona mi tīr tānla Peter ei ti u Simon chu va mankui ro. Ama chu tipui kōla mevun ānchīpū Simon a ina ātung a ni. Ama a hong tikle aloma na hong ril zit in ti,’ a na tī na. 33Hasikhan na kōma mi kei hong tīr len a ni. Nei hong thei hi asa sabak zei. Atun chu na kōma Pathianin chongpēk ei na pēk ngāi dōra anngāi ranga Pathian makunga na loma nei hong suok a ni zei,” a tī na.
34 #
Dān 10:17; 2Kh 19:7; Zōb 34:19; Mk 12:14; Rōm 2:11; Gal 2:6; Efe 6:9; Kol 3:25; Zak 2:1; 1Pe 1:17 Hankēng Peter chu chong aril ranga a phut a: “Pathianin a mimandangna manlang mak tī hi adik taka ka hong riat zei. 35Tenchu nam tin kāra miring Pathian anchī le dikna om athō tak chu amā'n ei pom a ni. 36#Mt 28:18; Lk 2:14; 1Zn 1:5Pathianin Israel nāi ngāi kōma chong ei hong ril ha na riat u na. Hava ha Isuo Khristā zāra anngoina thangahui a ni. Ama chu alompei chunga Puma a ni. 37Hava ha Zohan-in baptisma pēk ruia chong ei ril ha a ni zei. Hava ha Galili ram len ātā anphuta Zudāi ram pumpuia ei ānthek ha na riat u na. 38#Mt 4:23; Zn 3:2Hanūk chu Pathianin Nazaret Isuo ha hontin mo Rathā Ānthiang le thōtheina ranaka sariak ei manthi, hanūk chu sin āsa thō chunga mun atei ateia asuoka, Diabol-in ei sinsak ngāi dōra ei mandam ha na riat u na. Asik chu a bila Pathian a om a ni. 39#Lk 24:48Hanūk chu Zudāi ram le Zerusalem khopuia aloma a sinthō ngāi dōra āriatpui ngāi chu koini hi nā ni zei, ama ha mī'n thinga ei tāra ei that u a ni zei. 40Tenchu Pathianin āthī nātā nīnthum nikhuona a hong mathui rēt a. Mipui vāntāng mitmūna a manlang a. 41#Lk 24:43; Zn 14:17, 22; 21:13Tenchu aloma mitin kōma ni mak. Pathianin ei na thang sā āriatpui koini ngāi kōma, hanūk chu āthī nātā anthuirēt suole han ama bila a na nēkpui le anā sākpui koini ngāi kōma ei hong anlang a ni. 42#Mt 28:19-20; Zn 5:22; Rōm 14:9; 2Ko 5:10; 2Ti 4:1; 1Pe 4:5Ama hi athi le ādam ngāi chunga rui arilpū ranga Pathianin ei ruot a ni ti mi ngāi kōma aril rang le āriatpui ranga koini na kōma chong ei na pēk. 43#Isa 53:11; Lk 24:27; Zn 3:15Tūkareng ama zāra a raming āiam tak chu āsia sāina man in ti, tī hi deari ngāi dōrā'n ei riatpui u kēng,” a tī na.
Namtei ngāiin Rathā Ānthiang a Man u
44 #
Lk 1:15
Hatuka Peter-in chong a la ril kār han hava chong ariat ngāi dōra chunga Rathā Ānthiang a hong āchul a. 45Hatuka sertan Zehudi āiam ngāi, Peter a hong āzī ngāi dōra chu achālaka a boi a dong u na. Asik chu namtei ngāi chungā'm Rathā Ānthiang bōrsāng ei chul a ni zei a. 46#Mk 16:17Asik chu amāni ngāi ha chong ateia a chong u na, Pathian ei manpāk u chu a riat u na. Hatuka Peter-in, 47#Zn 20:22“Hiva mi ngāi hī'm koini ngāi anga Rathā Ānthiang a chang u kēng, hasikhan tia baptisma apēk ranga tū mo a na khār thei rang?” a tī na. 48Hatuka Puma raminga baptisma ālāk ranga chong a pēk a. Hatuka Peter chu amāni bila ni hotuk mo chu a ompui ranga a mathēm u na.
Bible in Ranglong, © Bibles International, the Bible society of Baptist Mid-Missions, 2024.