PSALMS 115
115
1Kahween nenuhwind, Jehovah, kahween nenuhwind ningahwahwezhanemegoosenaun, keen atuh kedezhenekahzoowin tahwahwezhandahgwud: oonje keshahwanjegawin kuhya oonje kedabwawin.
2Ahnishwin kaöonjeëkedoowaud egewh mayugahnishenahbag: Ahneende dush ooKesha‐Muhnedoomewaun?
3Ishpeming suh ahyah keKesha‐Muhnedoomenaun: kuhkenuh menik anandung keëzhechega.
4Oomuzzenenechegunewaun suh shooneyahwewun kuhya oosahwah‐shooneyahwewun: oogeöozheëgoowaun enewh enenewun.
5Ooodoonewug kah dush kekedoosewug: ooshkinzhegoomewug kah dush wahbesewug.
6Ootahwugahwug kah dush noonduhsewug: oochaunzewug kah dush minaunjegasewug.
7Ooneenjewug kah dush taungenegasewug: oosittahwug kah dush bemoosasewug: kah dush noondahgoozesewug oonje oogoondahgunewaung.
8Mesuh nahsaub azhewabezewaud egewh wazheähjig: egewh apanemahjig.
9O Israel Ahpanim Jehovah: ooweedookahgoowinewaun ahwe kuhya oodushwewinewaun.
10O kenuhwah wagwissemenag Aaron ahpanemik Jehovah: ooweedookahgoowinewaun ahwe kuhya oodushwewinewaun.
11Kenuhwah quasag Jehovah, ahpanemik Jehovah: ooweedookahgoowinewaun ahwe kuhya oodushwewinewaun.
12Kegemequanemegoonaun Jehovah: oogahshahwandaun oogahshahwandaun Israel oowegewaumun: oogahshahwandaun Aaron oowegewaumun.
13Oogahshahwanemaun enewh wahdookahgoojin Jehovah: enewh agahsheenejin kuhya kacheahyahenejin.
14Mahnoo ashkum kegahmeshenooëgoowah Jehovah: kenuhwah kuhya kenejahnesewaug.
15Keshahwanemegoowah Jehovah owh wazhetood kezhig kuhya uhkee.
16Jehovah oodebandaunun kezhigoon: oogemeenaun dush enene oonejahnesun ewh uhkee.
17Kahween Jehovah oowahwezhanemegooseen enewh kahneboonejin: kah kuhya enewh chebaguhmigoong kahezhahnejin.
18Kegahwahwezhanemahnaun dush ween Jehovah: noongoom kuhya kahgenig. Hallelujah.
Currently Selected:
PSALMS 115: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
