St Matthew 7
7
1Kagoo tebahkoonegakagoon, kenuhwah dush ween chetebahkoonegoosewag.
2Me mahween ewh tebahkoonegawin kaëzhetebahkoonegawagwan, me nahsaub kaëzhetebahkoonegooyag: kuhya ewh tebahegawin kaëzhetebahegawagwan, me suh nahsaub kaëzhetebahahmahgooyag.
3Ahneshwin wahbunduhmoowud ewh panzeneëgood owh kejekewa, kah dush kenahnahgahdahwandunse ewh metik pamahkoomook emuh tebenuhwa keshkinzhegoong?
4Gamuh ahneen oo‐oo kaëzheguhnoonud owh kejekewa, Tuhgah nengahkejepetoon ewh kepezenewin? benuh suh ween metik pemahquahmoo emuh tebenuhwa keshkenzhegoong.
5Anuhmeäkahzooyun, netum wabenun ewh metik pamahquahahmook emuh tebenuhwa keshkinzhegoong; me dush uhpe chemenwahbeyun chekechepetoowud owh kejekewa oopezenewin.
6Kagoo meenahkagoon uhnemoog ewh kachetwahwandahgwuk, kagoo kuhya ahpuggedahmahwahkagoon enewh pearlun egewh kookooshug, koonemah oogahtuhtuhkookahdahnahwaun emuh ahnahmesit, tahquakekah-bahwewug dush chepegwuhmenagwah.
7Nundoodahmahgayook, kegahmeenegoom dush; undooneëgayook, kegahmekaum dush; pahpahguhegayook, kegahpahkahkoonahmahgoom dush:
8Ahwagwan nandoodahmahgagwan meenah; ahwagwan dush nandooneëgagwan oomekaun; kuhya dush ahwagwan puhyahpahguhegagwan pahkahkoonuhmahwah.
9Ahwanan dush owh enene kenuhwah menik anduhcheyag, keshpin enewh oogwissun nundoodahmahgood buhquazhegun, ahsin nuh oodahmeenaun?
10Gamuh keshpin dush gegooyun nundoodahmahgood, kenabegoon nuh oodahmeenaun?
11Keshpin dush kenuhwah majeëzhewabezeyag, kekanduhmag wanesheshengin meegewawinun chemeenagwah egewh kenejahnesewaug, keche ahwahshema suh ween owh Koosewah keche‐kezhegoong ayaud wanesheshingin oogahmeenaun enewh nandoodahmahgoojin.
12Kuhkenuh enewh nanduhwanduhmagoon chedoodoonagwah egewh enenewug, me nahsaub kuhya kenuhwah kadoodahwagwah: me gooshah maunduh ahyahwung tebahkoonegawin kuhya aunwahjegawinun.
13Peendegayook suh emuh ewh agahsahdayaug eshquaundam: keche‐munguhdayah muh ewh eshquaundam, kuhya munguhdamoo ewh meekun emuh neshwahnahdezewining aneenuhmoog, bahtuhyenoowug dush egewh paundegajig emuh:
14Ahgahsahdayah mahween ewh eshquaundam, kuhya ahgahsahdamoo ewh meekun emuh bemahdezewining anenuhmoog, pungeshawuggezewug dush egewh makungig.
15Meweshkahwik egewh wuhyazhenga‐aunwahjega‐wenenewug, pahmahneshtahnesheweöojig pahnaunzekoonagoog, peenjenah dush muhkundwashke‐maheengunewewug.
16Azhemeenewewaud suh kegahoonjekekanemahwaug; Shooweminun nuh oodoondenahnahwah egewh enenewug emuh menasuhgahwunzheeng, gamuh enewh figoominun emuh muzzaunushkoong?
17Anduhchid suh wanesheshid metik menoo‐meenewe, mujje metik dush ween mujje‐meenewe.
18Kahween owh wanesheshid metik ookushketooseen chemujje‐meenewid, kah kuhya owh mujje metik ookushetooseen chemenoo‐meenewid.
19Anduhchid metik manoo‐meenewesig kahwahegahzoo, eshkootang dush ahpuggenegahzoo.
20Azhemeenewewaud suh dush kegahoonjekekanemahwaug.
21Kahween kuhkenuh anduhchewaud egewh Tabanengayun, Tabanengayun azheguhnoozhejig, tahpeendegasewug emuh keche‐kezhegoong duhzhe oogemahwewining; wah‐owh suh atuh mahkindung ewh azhemenwandung owh Noos keche‐kezhegoong ayaud.
22Ewh uhpe kekezheguk nebewah oo‐oo nengahegoog, Tabanengayun, Tabanengayun, kah nuh nengeäunwahjegasemin emuh kedezhenekahzoowining? kuhya emuh kedezhenekahzoowining nengeoonjesahgechewabenahnahnig mujje‐muhnedoog? kuhya emuh kedezhenekahzoowining nebewah mahmaundahwejegunun nengëezhechechegamin?
23Me dush uhpe kawahweendahmahwugwah, Kah wekah kegekekanemesenoonim; ahwus nuhguhzheshig, kenuhwah mahkenduhmag ewh mujje‐ezhewabezewin.
24Ahwagwan suh dush nwaunduhmoogwan oonoo nendekedoowinun, azhechegad dush ewh akedoomahguk, nebwahkah‐weneneeng nengahezheähwaäh, kahoozhetood oowegewaum emuh oogedahbik:
25Kekemewun dush, kuhya kemooshkuhun, kuhya kepuhgummahnemud emuh atag ewh wegewaum; kah dush kekahwesasenoon; oogedahbik muh kemenjemoosechegahda.
26Anduhchid dush nwaundung oonoo nendekedoowinun, azhechegasig edush, kuhkebahdeze‐weneneeng tahezheähwah, kahoozhetood oowegewaum emuh metahdahwung;
27Kekemewun dush, kuhya kemooshkahun, kuhya kepuhgumahnemud emuh atag ewh wegewaum; kekahwesamahgud dush: kekeche‐kahwesamahgud dush.
28Uhpe dush owh Jesus kaheshquah‐kekedood oonoo ekedoowinun, oogekeche‐mahmahkahdandahnahwah egewh ahneshenahbag ewh ookuhgequawin:
29Kache‐enandahgoozingin oogeëzhekekenooähmahwaun, kahween goo oozhebeëga‐weneneeng.
Currently Selected:
St Matthew 7: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
