EXODUS 21
21
1Me suh oonoo tebahkoonegawinun kapuhgedenuhmuhwudwah anahsuhmewaud.
2Kishpin kishpenuhnud Hebrew buhmeetahgun, ningoodwahsoopepoon tuhbuhmeetahga: uhpe dush weneenzhwahsoopepoonuhguk tuhpeneshemahjah chedebanindezood dush.
3Kishpin ween atuh goo kahbeëzhahgoobunan, tuhnezhekamahjah: kishpin wahdegagoobunan, me suh wewun cheweejewegood uhpe mahjaud.
4Kishpin oodoogemaumun kahmenegoopuneen enewh wewun, oonoo dush kenegetuhmahgood quewezansun kuhya equazansun: owh equa kuhya egewh wanejahnesemindjig oogahdebanemegoowaun enewh oodoogemaumun, tahnezhekamahjah dush ween.
5Kishpin dush owh buhmeetahgun wawane oo‐oo ekedood, Ninsahgeäh nindoogemaum, neweedegamahgun, kuhya nenejahnesug; kahween ningahmahjahse chedebanindezooyaun:
6Me suh dush enewh oodoogemaumun chëezhewenegood emah uhyahnid enewh tebahkoonega‐wenenewun; oogahezhewenegoon dush kuhya ishquaundaming, gamah kuhya emah puhduhkezoonid ishquaundamahtigoon; oodoogemahmun dush oogahbuhgoonahtuhwugaäoogoon uhyoonid megoos; kahgenig dush oogahbuhmeetuhwaun.
7¶ Kishpin kuhya ahweyah enene uhdahwad oodahnun chebuhmeetahgunequawenid, kahween tuhmahjahsewun debishkoo azhemahjahwaud egewh buhmeetahga‐wenenewug.
8Kishpin minwanduhmeähsig oodoogemahmun, kahwahweenduhmahgoojin cheweedegamegood, me dush chepuhgedenegood chekeeshpenuhnind: kahween tuhkushkeäwezesewun cheühdahmahnid enewh muhyug‐ahnishenahban ooweyowh, wayazhengangin mah oogedoodahgoon.
9Kishpin dush kahwahweenduhmahgoogwan cheweedegamaud enewh oogwissene, oogahuhyindoodahgoon debishkoo koo ayindooduhwindwah oodahnesemaug.
10Kishpin oodahpenahnid bakahnezenid equawun; ewh oomeejim, ooduhgwewin, kuhya ewh kaühyindoodahwindebun keweedegad, kahween oogahoodahpenuhmahgooseen.
11Kishpin dush oonoo neswe uhyindoodahgoosig, me suh chepeeneshemahjaud shooneyah chemeegewasig.
12¶ Owh paketawaud enenewun, neboonid e‐dush, ahbedakummig tahnesah.
13Kishpin dush ahweyah uhkundoosig, Kesha‐Muhnedoon dush ween puhgedenuhmahgood enewh; me suh cheënahkoonuhmoonaun ewh emah kaëzhenezhemood.
14Kishpin dush ween ahweyah oonjeduh naunzekuhwaud weej‐duhnuhkeewamahgunun, wegeemenuhnaud; nesahsahgewejegun‐ahbikooming kegahoonjeëkoonah, chenebood dush.
15¶ Owh kuhya paketawaud enewh oosun, gamah kuhya enewh oogeen, ahbedakummig tahnesah.
16¶ Owh kuhya kamoodid enenewun; adahwad dush enewh, gamah kuhya kishpin mekuhwemind emah uhyaud, ahbedakummig tahnesah.
17¶ Owh kuhya maje‐guhnoonaud enewh oosun, gamah kuhya enewh oogeen, ahbedakummig tahnesah.
18¶ Kishpin kuhya enenewug megahdewaud, pazhig dush uhsineen puhketawaud enewh pazhig, gamah kuhya pekwah-kooninjetuhwaud, neboosenid dush, shingeshenenid atuh oonebahguning;
19Kishpin menuhwah oonishkahnid, kuhya puhpahmoosanid suhkuhoonid, me suh dush owh kahpuhketaöowad chepuhgedenind: tahtebuhuhmahga dush ween egoo ewh menik kahwuhnetahsoonid keühnookesenid, kuhya tahuhnooke wawane chenuhnaunduhweëmind.
20¶ Kishpin kuhya ahweyah puhketawaud; oobuhmeetahga‐wenenemun, gamah guhya oobuhmeetahgun‐equamun, metigoons uhyood, neboonid dush magwah puhketawaud; ahbedakummig tahpuhshunzhawah.
21Kishpin dush ween bemahdezenid ningookezhig gamuh kuhya neenzhoogoon, kahween tahpuhshunzhawahse: ooshooneyahmun mahween enewh.
22¶ Kishpin enenewug megahdewaud, gezhikuhwahwaud dush equawun uhbenoojeeyun kagishkuhwahnejin, wuhneähnid dush enewh, ningoodenoo dush ween ezheühyahsenid; ahbedakummig tahtebuhuhmahga, menik egoo kanunduhwanduhmahgood enewh equawun oonahbamene; tahtebuhuhmahga dush menik akedoonid enewh tebahkoonewa‐wenenewun.
23Kishpin dush ningoodenoo ezhewabezing, me suh bemahdezewin chemeegewayun mashquud bemahdezewin.
24Ooshkeenzhegoomah mashquud ooshkeenzhegoomah, webedahmah mashquud webedahmah, ooninjemah mashquud ooninjemah, oosidahmah mashquud oosidahmah.
25Chahgezoowin mashquud chahgezoowin, mahkegunaungawin mashquud mahkegunaungawin, puhshunzhaöowawin mashquud puhshunzhaöowawin.
26¶ Kishpin kuhya ahweyah puhketaühmuhwaud oobuhmeetahga‐wenenemun ooshkeenzhigoone, gamuh kuhya oobuhmeetahgun‐equamun ooshkeenzhigoone, buhnahduhdenig dush; oogahpuhgedenaun chedebanindezoonid ooshkeenzhegoone oonje.
27Kishpin kuhya puhquahbedagunahmaud oobuhmeetahga‐wenenemun, gamuh kuhya oobuhmeetahgun‐equamun; ooguhpuhgedenaun chedebanindezoonid, oowebedahne oonje.
28¶ Kishpin uhnooke‐pezheke puhzhebuhwaud enenewun gamah kuhya equawun, neboonid e‐dush: me suh owh uhnooke‐pezheke ahbedakummig chepemwussenuhind, ewh dush ooweyaus kahween tuhmeejeseem; enewh dush ween kahtebanemegoojin tahpuhgedenahwaun.
29Kishpin dush ween owh uhnooke‐pezheke natahpuhzhe-buhoowagoobunan wuhyashkud, kuhya keweenduhmuhwemindebun enewh dabanemegoojin, kekebahquuhoogoosig dush, kenesaud dush egoo enenewun gamah kuhya equawun; owh uhnooke‐pezheke tuhpemwuhsenuhah, kuhya dush enewh dabanemegoojin tuhnesahwun.
30Kishpin nunduhwandahgoozid chetebuhuhmahgad, mesuh chemegewad menik azhenunduhwanemahwindan cheöonjekeeshpenuhtood oobemahdezewin.
31Kepuhzhebuhwahnegwan kwewezansun, gamah kuhya equazansun, nahsaub azhesing oo‐oo tebahkoonegawin tahdooduhwah.
32Kïshpin enewh uhnooke‐pezhekewun puhzhebuhwahnid buhmeetahga wenenewun gamah kuhya buhmeetahgunequan; oogahmeenaun enewh oodoogemahmene nesemeduhnuh duswahbik shooneyah, owh kuhya uhnooke‐pezheke tuhpemwuhsenuhah.
33¶ Kïshpin kuhya ahweyah pahkesedood wahnekaun, gamah kuhya kishpin ahweyah wahnekad, kepuhunjig dush ewh, uhnooke‐pezheke dush gamah kuhya mamaungesha peenjesad emah;
34Owh dabandung ewh wahnekaun tahtebuhuhmahga, oogahmeenaun shooneyaun enewh dabanemahnejin enewh: enewh dush kahneboonejin ween oogahdebanemaun.
35¶ Kïshpin kuhya ahweyah enene ooduhnooke‐pezhekemun puhzhebuhwahnid bakahnezenejin uhnooke‐pezhekewun, neboonid e‐dush, me dush cheühdahwawaud enewh bamahdezenejin uhnooke‐pezhekewun, kuhya chenanahwenuhmahdewaud enewh shooneyaun kashkeähwaud; enewh dush kuhya naboonejin uhnooke‐pezhekewun tuhnanahwenuhmahdewug.
36Gamah kïshpin kekanememind enewh uhnooke‐pezhekewun netahpuhzhebuhoowanepun wuhyashkud, owh kuhya dabanemaud enewh kekebahquuhwahsigoobun; ahbedakummig tuhtebahuhmahga uhnooke‐pezhekewun mashquud uhnooke‐pezhekewun; enewh dush naboonejin ween oogahdebanemaun.
Currently Selected:
EXODUS 21: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
