I. CORINTHIANUN 15
15
1Menuhwah dush, nejekewaëdoog, kewahweenduhmoonenim ewh minwahjemoowin kahkuhgekemenuhgoogebun, ewh kahoodahpenuhmag, kuhya emuh anduhzhe‐nebahweyag;
2Mesuh kuhya ewh wanje‐bemahjeëgooyag, kishpin minjemanduhduhmag enewh kahkuhgekemenenuhgoogebun, kishpin ahneshah kedabwayanduhsewagwan.
3Ewh suh ahpeche netum kegepuggedenuhmoonenim ewh neen kahmeenegooyaun, owh Christ kenebood kemujje‐ezhewabezewinenahnin oonje, debishkoo ekedoomahguk enewh kechetwah‐oozhebeëgunun;
4Kuhya emuh chebaguhmigoong keähsind, nasuhgoonuhgudenig dush keähbejebaud, debishkoo akedoomahguk enewh kechetwah‐oozhebeëgunun:
5Kewahbuhmegood enewh Cephasun, me pe dush enewh matahswe‐ahshe‐neezhenejin;
6Bahnemah nahguj, oogewahbuhmegoon ahwahshema kahnaunwaukoozenejin wejekewaëmaun mahmahwe; egewh dush gagah kuhkenuh noongoom kayahbe bemahdezewug, ahnind dush ahzhuh kenebahwug.
7Menuhwah dush nahguj, oogewahbuhmegoon enewh Jamesun; me pe kuhkenuh enewh Apostleün.
8Ahpeche dush isquauj kuhya neen ningewahbuhmah, debiskoo ahweyah nahgid chepwah oojechesanig.
9Ahpeche muh noondaush nindahpeetandahgooz dush ween apeetandahgoozewaud kuhkenuh egewh Apostleüg, kah suh dush nintaähpeetandahgoozese Apostle cheëzheweenegooyaunbaun, ningekooduggetoon muh oodahnuhmeähwin owh Kesha‐Muhnedoo.
10Oonje ewh ooshahwanjegawin owh Kesha‐Muhnedoo nindezheähyah noongoom azheähyahyaun: kuhya dush ewh ooshahwanjegawin kahmeenegooyaun kahween keäunwawezemahgussenoon; ahwahshema suh ningekeche‐ahnooke dush ween kuhkenuh wenuhwah; kahween ahnahwe neen tebenuhwa, ewh suh ween Kesha‐Muhnedoo ooshahwanjegawine‐weedookahgawin kahweejewegooyaun.
11Benuh dush mesuhwah neen ahweyaun gamuh wenuhwah ahwewaud, me oo‐oo azhekuhgequayaung nenuhwind kuhya dush kenuhwah oo‐oo kahezhedabwayanduhmag.
12Kishpin dush enahjemind owh Christ ewh keähbejebaud oonje neboong, ahneeshwin ahnind kenuhwah ekedooyag, kahween gagoo ahbejebahwin duhgoomahgussenoon?
13Kishpin duhgoomahgussenook ewh ahbejebahwin, kahween keähbejebahse owh Christ:
14Kishpin dush keähbejebahsig owh Christ, kah ningood enahbuttussenoon nekuhgequawinenaun, kah kuhya ningood enahbuttussenoon kedabwayanduhmoowinewah.
15Menungakah, kuhya nenuhwind nindezhekekanemegoomin kekuhkenuhwishke‐wahjemungid owh Kesha‐Muhnedoo ewh keähbejebahaud enewh Christun: kah muh oogeähbejebahahseen, kishpin kagate ahbejebahsigwah naboojig.
16Kishpin muh ahbejebahsigwah egewh naboojig kahween keähbejebahahse owh Christ:
17Kishpin dush keähbejebahahsewind owh Christ, kah ningood enahbuttussenoon kedabwayanduhmoowinewah; kayahbe kedahyaum emuh kemujje‐ezhewabezewinewaung.
18Egewh dush kahnebahjig emuh Christing kebahnahdezewug.
19Kishpin oomah atuh bemahdezewining ahpanemooyaung owh Christ, nenuhwind nemahmahwe‐ketemahgezemin anduhshewaud kuhkenuh enenewug.
20Ahzhuh dush ween keähbejebah owh Christ, kuhya keëzheähyah debishkoo owh netum sagukkenegahzood anduhshewaud egewh kahnebahjig.
21Ewh dush oonje owh enene ketuhgwishenoomahguk ewh neboowin, mesuh goo kuhya oonje owh enene ketuhgwishenoomahguk ahbejebahwin.
22Adam wanje‐neboowaud kuhkenuh, me suh kuhya owh Christ kaöonje‐bemahdezewaud kuhkenuh.
23Kuhkenuh egewh enenewug tebenuhwa azhetebandahgoozewaud; Christ suh netum sagukkenegahzood; me pe dush egewh dabandahgoozejig emuh Christing uhpe tagwishing.
24Me dush cheïshquah‐uhkeewung, uhpe pagedenuhmahwaud oogemahwewin enewh Kesha‐Muhnedoon Wayoosemindjin; uhpe dush kemahmaunzhetood kuhkenuh enahkoonegawin kuhya kuhkenuh oogemahkundahgawin kuhya kushkeäwezewin.
25Ween muh nundahwandahgooze cheöogemahwid, peenish egoo ahnahmesit keähsaud kuhkenuh mahgahnegoojin.
26Owh ishquauj kabahnahjeïnd mahgahzood me suh ewh neboowin.
27Kuhkenuh mahween uhyeëen ahnahmesit oogahahtoonun. Uhpe dush oo‐oo akedood, kuhkenuh uhyeëen kemahmauzhechegahdanewun, kekandahgwud suh ewh owh kahmahmahzhetahmahwaud kuhkenuh uhyeëen, kahween ween kemahmahzheëgoozese.
28Uhpe dush kemahmauzhechegahdanig kuhkenuh enewh uhyeëen, me dush ewh uhpe owh Wagwissemind chetebanemegood enewh kahmahmauzhetahmahgoojin kuhkenuh enewh uhyeëen, ween dush owh Kesha‐Muhndoo chekeche‐tebandahsood.
29Kishpin dush oo‐oo ezhewabussenook, ahneen kaezhechegawaud egewh kahbaptizooïndjig oonje ewh neboong, kishpin egewh naboojig kuhnuhga ahbejebahsigwah? ahneeshwin dush baptizooïndwah oonje ewh neboong?
30Ahneeshwin dush kuhya anduhsoo tebahegunag nebahweyung emuh nuhneezahnezewining?
31Kagate ninkekid oonje ewh kedoonahnegoozewinewah ayahmaun emuh Christ Jesusing Tabanemenung, nenib suh andussoo‐kezheguk.
32Kishpin anahdezewaud enenewug kemegahnugwah egewh ahwaseeyug emuh Ephesusing, wagoonan dush wandezeyaun, kishpin ahbejebahsigwah naboojig? umba wesenedah kuhya menequadah; wahbung muh keneboomin.
33Kagoo wuhyazhindezookagoon: mujje‐guhnoonindewin oonje bahnahjechegahda ewh menoo‐ezhewabezewin.
34Ezhekooshkooseyook emuh quuhyuk‐ezhewabezewining, kagoo dush mujje‐ezhechegakagoon; ahnind muh kahween ookekanemahsewaun enewh Kesha‐Muhnedoon: cheähgujjeëgooyag oo‐oo nindoonje‐ekid.
35Ahweyah dush ween oo‐oo tahekedoo, Ahneen azheahbejebahindwah egewh naboojig? Ahneen kuhya azheöoweyowewaud uhpe ahyahbejebahwahjin?
36Keen kakebahdezeyun, ewh suh ween kategahduhmun kahween sahgukkeemahgussenoon, me atuh kaneboomahguk.
37Ewh dush kategahduhmun, kahween kepuggedenunseen ewh weyowemah pecheenug kanetuhwuggemahguk, me atuh pezheshigoo‐menekaunewung, koonemah baquazhegunoowunoogwan, gamuh pakaunudoogwan:
38Kesha‐Muhnedoo dush ooweyowetoon ewh suh azheminwandung, kuhya anduhshing menekaun ewh tebenuhwa azheweyowemahguk.
39Kuhkenuh weyaus kahween nahsaub ahwunsenoon: pazhigwun suh goo enene‐weyaus, pukkaun menuhwah ezheweyausewewug ahwaseeyug, pukkaun kuhya egewh gegooyug, kuhya dush pukkaunud ewh penase‐weyaus.
40Ahyahmahgudoon kuhya keezhegoong duhzhe‐weyowemaun, kuhya oomah uhkeeng duhzhe weyowemaun: egewh kezhegoong duhzhe weyowemaug pazhigwun pezhegandahgoozewin, kuhya uhkeeng duhzhe weyowemaug pazhikwun ewh pakahnuk peshegandahgoozewin.
41Pazhikwunene suh ewh oopezhegandahgoozewin kezhike‐keezis, kuhya pukkaun ezheähyahne oopezhegandahgoozewin owh tebike‐kezis, kuhya pukkaunudene oopezhegandahgoozewinewah ahnungoog: papukkaun suh ezhepezhegandahgoozewug egewh ahnungoog.
42Me suh nahsaub azheähyahnig oodahbejebahwinewah naboojig. Puggedenegahzoo emuh bahnahdezewining, ahbejebah dush wekah chebahnahdezesig:
43Puggedenegahzoo emuh dahbussandahgoozewining, ahbejebahah dush emuh pezhegandahgoozewining: puhgedenegahzoo emuh shahgwewewining, ahbejebahah dush emuh mushkahwezewining.
44Puggedenegahzoo weyausewe‐weyowemah, ahbejebahah dush oojechaugoowe‐weyowemah. Ahyahmahgud suh weyausewe‐weyowemah kuhya dush ahyahmahgud oojechaugoowe‐weyowemah.
45Debishkoo goo azhebeëgahdag, Owh netum enene Adam keëzheäh oojechaug bamahdezid, owh dush ishquauj Adam keëzheäh oojechaugoomah bamahjeëwad.
46Kahween gooshah netum keähyahsenoon ewh wajechaugwandahgwuk, ewh suh atuh weyausemaung anandahgwuk; bahnemah dush ween owh wajechaugwandahgwuk.
47Owh netum enene uhkeeng keöonjee uhkeewandahgooze dush: owh dush pazhik enene mesuh owh Tabaningad keche‐kezhegoong wanjeed.
48Azheähyaud owh akeewandahgoozid, me nahsaub azheähyahwaud egewh akeewandahgoozejig: kuhya dush azheähyaud owh keche‐kezhegoong wanjeed, me suh kuhya nahsaub azheähyahwaud egewh dabandahgoozejig ewede keche‐kezhegoong.
49Kahezheähyahyung dush oodezhenahgoozewin owh akeewandahgoozid, me suh kuhya kaëzheähyahyung oodezhenahgoozewin owh keche‐kezhegoong kahoonjeed.
50Oo‐oo dush nindekid, nejekewaëdoog, ewh weyausemah kuhya misque kah suh kushketoomahgussenoon chetebandahsoomahguk Kesha‐Muhnedoo oodoogemahwewin; kah kuhya ewh natuh‐bahnahduk tahtebandahsoomahgussenoon ewh natuh‐bahnahdussenook.
51Benuh, kewahbunduhenim ewh mamaundahwuk; Kahween kuhkenuh kegahnebahsemin, kuhkenuh kegahdaunjeëgoomin.
52Shasekah, ningoo‐puhsungahbing, uhpe ishquauj pootahjegang: tahmuhtwawamahgud ewh pootahjegun, kuhya dush egewh naboojig tahahbejebahahwug wekah chebahnahdezesigwah, kenuhwind kegahdaunjeëgoomin.
53Oo‐oo mahween natuh‐bahnahdussenook nundahwandahgwud chepesekung ewh kabahnahdussenook, kuhya oo‐oo natuh‐neboomahguk chepesekung ewh natuh‐neboomahgussenook.
54Uhpe dush oo‐oo natuh‐bahnahduk kepesekung ewh natuh‐bahnahdussenook, kuhya oo‐oo natuh‐neboomahguk kepesekung ewh natuh‐neboomahgussenook, me dush ewh uhpe chedebishkoosag ewh ekedoowin wazhebeëgahdag, Neboowin kekoonjegahda emuh mahmauzhetwahwining.
55Oh neboowin, ahneende ewh keshemahgun? Oh chebaguhmig, ahneende ewh kemahmauzhetwahwin?
56Oshemahgun ewh neboowin me suh ewh mujje‐ezhewabezewin; kuhya wanje‐mushkahwezemahguk mujje‐ezhewabezewin me suh ewh tebahkoonegawin.
57Tahmahmooyahwahmah suh owh Kesha‐Muhnedoo, mahnenung ewh mahmauzhetwahwin oonje owh Tabanemenung Jesus Christ.
58Tuhguh dush, suhyahgeënenuhgoog nejekewaëdoog, aungwahmezik, soongekahbahwik, moonzhug chekeche-ahnookeetuhwag owh Tabaningad, kekekandahnahwah gooshah ahneshah ahnookeetahwahsewag owh Tabaningad.
Currently Selected:
I. CORINTHIANUN 15: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
