โรม 15
15
กือนา ตูโรจ ฮาตี นะ กาวัด_ บูกัด ฮาตี ตะอาซิก
1กีตา นู ปือจายา กือฌะ กือมัซ เตอ_ ฌางัน ซือมาตา ตูโรจ กะ ฮาตี นะ ตะอาซิก_ ตาปี กีตา ปาโตจ นะ ตูโลก โกะ ซือมียา นู เตด กือฌะ_ เดะ ลาฆู นู กูญา ลือมัฮ. 2บรี กีตา ซือมูฮา บูวัจ ตูโรจ กะ ฮาตี นะ กาวัด_ บรี ญา ซูกา ฮาตี_ บีดา นะ บูวัจ บาฌิ ฌางัน ญา_ บรี ญา นะ ปือจายา กะ ตูฮัด_ กือฌะ บาญะ ซือรูโลยํ เลอ. 3ซาเบะ จะ_ เยซู คริด โปด_ ญา เตด บือเลฮ ตูโรจ กะ ฮาตี นะ ญา ตะอาซิก. ตาปี บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ “โอ ตูฮัด_ นู โกะ ซือมียา อูจะ มือฌัฮ กะ เกา เตอ_ โงฮซูโงฮ ปือมือเลา มือฌัฮ อีตู_ กือนา กะ กู เลอ#มปต 69.9.” 4กรานา ลาฆู ซือมูฮา นู อาดา ฆาแรฮ ดูลู ดัฮ_ เดะ ซูรัจ ปือมือเลา นะ ตูฮัด เตอ_ อาดา ดัฮ_ บีดา นะ อาฌัยํ กีตา. ซูรัจ ปือมือเลา นะ ตูฮัด อีตู_ ญา ตูโลก บรี กีตา ตาฮัด ฮาตี ลามา_ ตูโลก ปูโฌะ ฮาตี นะ กีตา ฌูฆา เตอ. ซาเบะ กะฆีเตอ เลอ_ กีตา อาดา ตือปัจ นะ ฮาระ. 5มีตา ตูฮัด เดะ อาตัซ_ ญา เลอ_ นู บรี กีตา ตาฮัด ฮาตี ลามา_ นู ปูโฌะ ฮาตี นะ กีตา เตอ_ มีตา เดะ ญา_ นะ บรี กาเญา บือปาคัจ บรี บาฌิ บือซามา_ ตูโรจ บือกะ เยซู คริด เลอ_ 6บีดา กาเญา นะ บือซามา ฮาตี_ ปาคัจ มือเลา ปูฌี กะ ตูฮัด บือซัยํ เดะ อาตัซ_ นู อาโปก นะ เยซู คริด_ ตูฮัด นะ กีตา เลอ.
บรีตา นู บาฌิ นะ ตูฮัด_ อาดา บีดา ซือมียา ราตา
7กะฆีเตอ_ บรี กาเญา ซาโมจ กาวัด บือซามา-ซามา_ บีดา นะ บรี ปูฌี กะ ตูฮัด เลอ_ บือกะ ซือรูปา นู เยซู คริด บือเลฮ ซาโมจ กาเญา ฌูฆา ดัฮ. 8ซาเบะ กู มือเลา ฌางัน กาเญา จะ_ เยซู คริด เตอ_ ญา มาแรฮ ฌาดี ซือมียา บือกรือฌา มือนูโลก ลูมอฮ บักซา อิซราเอน_ บีดา นะ บรี ลีฮัจ จะ_ นู ตูฮัด เดะ อาตัซ ญา รือมัก ซูโงฮ_ บีดา นะ บูวัจ บรี โกะ ปือมือเลา_ นู ตูฮัด บือเลฮ บือฌาญี ฌางัน โกะ บีลาแก นะ กูญา_ นะ ซุจ รือมัก ดัฮ เลอ. 9กะฆีเตอ ฌูฆา_ ญา บูวัจ บรี โกะ ซือมียา บักซา อาซิก บือเลฮ ปูฌี กะ ตูฮัด_ กรานา ญา ตือจีฮัด บาฌิ เตอ_ บือกะ นู อาดา เดะ ซูรัจ ปือมือเลา นะ ตูฮัด นู จะ
“ซาเบะ กะฆีเตอ_ กู นะ บรี ซือลามัจ กะ เกา_
เดะ ตืองัฮ ลูมอฮ ซือมียา บักซา อาซิก_
กู นะ มือญาญี ปูฌี กะ ปือนามา นะ เกา เลอ #
2ซม 22.50; มปต 18.49 .”
10อาดา ฌูฆา นู จะ
“โอ โกะ ลูมอฮ ซือมียา บักซา อาซิก
บรี กาเญา บรามัย บือซามา ซูกา ฮาตี
ฌางัน ลูมอฮ นะ ตูฮัด เลอ #
ปฮก 32.43
.”
11อาดา ปูลัก นู จะ
“ลูมอฮ ซือมียา ราตา บักซา เออ
ปูฌี กะ ตูฮัด บือซัยํ เดะ อาตัซ เลอ.
ลูมอฮ ซือมียา ซือมูฮา เออ
มือโอจ กะ ตูฮัด เตอ เลอ #
มปต 117.1
.”
12นู อิซายา ญา มือเลา ปูลัก จะ
“บือแนฮ นะ เจซี # 15.12 เจซี อีนี ฌาดี อาโปก นะ ราฌา ดาวิด. นะ มาแรฮ ซืออูรัก
ญา นะ กือนา ตืองะ ดัฮ
บรี ฌาดี ซือมียา ปือบือลา ลูมอฮ บักซา อาซิก
ญา เลอ_ นู นะ ฌาดี ตือปัจ ฮาระ
นะ ลูมอฮ บักซา อาซิก #
อซย 11.10
.”
13มีตา เดะ ตูฮัด_ ญา นู บรี ฌาดี ตือปัจ ฮาระ นะ กีตา เตอ_ มีตา เดะ ญา นะ บรี กาเญา ซูกา ฮาตี_ ซือนัง ซือลามัจ_ ปือนอฮ บาฌิ ดัฮ_ บือกะ กาเญา อาดา ปือจายา กะ ญา. บรี ญา บูวัจ กะฆีเตอ_ บีดา ซือมืองัจ นะ ตูฮัด นะ บูวัจ บรี กาเญา จาดัก กะ ตูฮัด บาญะ ซือรูโลยํ เลอ.
ซาเบะ นามา เปาโล บือเลฮ ฆาแรฮ กะฆีนี
14โกะ ดีบราดี นะ กู เออ_ อีซี กู ตะอาซิก ตือตู เดะ ฮาตี ปาซัน กาเญา จะ_ กาเญา บาฌิ ปือนอฮ ดัฮ เตอ_ ตาฮู ราตา ลาฆู ปือนอฮ ดัฮ_ ปานัย นะ อาฌัยํ_ ปรีงัจ กะ กาวัด บือซามา-ซามา_ บือเลฮ ฌูฆา เลอ. 15ตาปี เดะ ซูรัจ อีนี_ กู อาดา ฮาตี บรานี ซูโงฮ_ บือเลฮ ฆาแรฮ ปรีงัจ กะ กาเญา_ ปาซัน ลาฆู ซือตืองัฮ. นู กู ฮาตี บรานี กะฆีเตอ_ ซาเบะ ตูฮัด ญา ฮาลัย บรี ซือลามัจ กะ กู_ 16บีดา กู นะ ฌาดี ซือมียา บือกรือฌา นะ เยซู คริด_ นู บือกรือฌา ตูโลก ลูมอฮ บักซา อาซิก. กู บูวัจ ซือรูปา ฌาดี ซามี_ นู มือญาเระ บรีตา นู บาฌิ นะ ตูฮัด กะ ลูมอฮ กูญา เตอ_ บีดา นะ บาวา ลูมอฮ บักซา อาซิก อีตู มาแรฮ_ ฌาดี ซือรูปา ซือบารัก มือญือมัฮ_ นู กือนา เดะ ฮาตี นะ ตูฮัด_ ซาเบะ ซือมืองัจ นะ ตูฮัด บือเลฮ ตืองะ กูญา_ ฌาดี ซือมียา นะ ตูฮัด. 17กะฆีเตอ_ นู กู ลือกัจ บือซามา ฌางัน เยซู คริด เตอ_ กู งันตืองัน บือเลฮ_ เดะ ลาฆู นู กู บูวัจ บือกรือฌา นะ ตูฮัด. 18ซาเบะ กู เตด บรานี นะ มือเลา ปาซัน ลาฆู นามา_ ลือเบฮ ซา ลาฆู อีตู_ นู เยซู คริด บือเลฮ บือกรือฌา ฌางัน กู_ บีดา กู นะ บาวา ลูมอฮ บักซา อาซิก มาแรฮ มือนีงัย กะ ตูฮัด. กู บูวัจ กะฆีเตอ ฌางัน ปือมือเลา มือญาเระ_ ฌางัน ลาฆู ปือบูวัจ ฌูฆา_ 19ฌางัน ปือนานา ซีดี_ นู มือฆัฮ_ นู ปือและ ซูโงฮ_ ฌางัน ปือบูวัจ นู มือฆัฮ เดะ ซือมืองัจ นะ ตูฮัด เลอ. กะฆีเตอ_ ฮึนตะ เดะ นังฆรี เยรูซาเลม_ บือฌาลัด ปี ราตา_ ตือดะ รอจ กะ นังฆรี อีลีริคุม เตอ_ กู บือเลฮ มือญาเระ บรีตา นู บาฌิ_ ปาซัน เยซู คริด_ บรี ปือนอฮ ฮาบิฮ ดัฮ. 20โงฮซูโงฮ เตอ_ กู ตือตู จะ_ ตือปัจ ดีฮา นู กูญา เตด บือเลฮ ดืองัยํ_ ลาฆู นะ เยซู คริด ลาฆี เตอ_ กู ซือมาตา กือวาซา นะ ปี มือญาเระ บรีตา นู บาฌิ_ เดะ ตือปัจ อีตู เลอ. กู ตีเมา นะ บูวัจ รูมัฮ_ เดะ อาตัซ จาวัก นะ กาวัด เลอ. 21ตาปี บือกะ ซูรัจ ปือมือเลา นะ ตูฮัด มือเลา จะ
“โกะ ซือมียา อีตู_ นู ฮอย ซาปา ดือละ ปี
มือญาเระ กะ กูญา ปาซัน ลาฆู นะ ญา_
กูญา เลอ_ นะ บือเลฮ ลีฮัจ.
โกะ ซือมียา นู เตด ดือละ ดืองัยํ ลาฆู นะ ญา เตอ_
กูญา เลอ_ นะ บือเลฮ มาโซะ เดะ ฮาตี #
อซย 52.15
.”
เปาโล อีงัจ นะ บือฌาลัด ปี กะ นังฆรี โรม
22ซาเบะ ลาฆู กะฆีเตอ เลอ_ กู กือนา ซือกัจ บาญะ กาลี_ เตด ราซา มาแรฮ มียา กาเญา. 23ตาปี วะตู อีนี_ กู ฮอย ตือปัจ นะ บือกรือฌา ลาฆี เดะ โซะ ซือบือลัฮ อีนี. บาญะ ตาโฮด อีนี_ กู บือเลฮ บือคานะ ซูโงฮ จะ_ นะ มาแรฮ มียา กาเญา. 24กะฆีเตอ_ ตืองัฮ กู บือฌาลัด ปี กะ นังฆรี ซะเปน_ กู จาดัก จะ_ นะ บือเลฮ ซีงัฮ ฌือเงาะ ลีฮัจ กาเญา เลอ. ซูดัฮ กู ดูโดะ ซือนัง บาฌิ ฌางัน กาเญา_ ซา วะตู เตอ_ กาเญา นะ บือเลฮ ตูโลก อาตัจ กู_ บือฌาลัด ปี ปูลัก เลอ. 25ตาปี วะตู อีนี เลอ_ กู ตืองัฮ ปี กะ นังฆรี เยรูซาเลม_ บีดา นะ ปี ตูโลก โกะ ซือมียา นะ ตูฮัด ตือปัจ อีตู. 26ซาเบะ จะ_ โกะ ลูมอฮ นะ ตูฮัด เดะ โซะ นังฆรี มาซิโดเนีย_ ฌางัน นังฆรี อาคายา เตอ_ กูญา ซูกา ฮาตี บือกีรา จะ_ นะ มืองูเตะ ดูเวะ_ อาตัจ ปี ตูโลก โกะ ซือมียา นะ ตูฮัด_ นู ฮาฌะ_ เดะ นังฆรี เยรูซาเลม. 27กูญา ซูกา ฮาตี บือกีรา กะฆีเตอ. ตาปี โงฮซูโงฮ_ กูญา ตือฮูตัก_ เดะ โกะ ซือมียา ฮาฌะ อีตู. ซาเบะ จะ_ ลูมอฮ ซือมียา บักซา อาซิก บือเลฮ บาฮาเฆด บือซามา_ ฌางัน ลูมอฮ บักซา ยิว เดะ ลาฆู บาฌิ นู ตูฮัด บรี ดัฮ. กะฆีเตอ เลอ_ บือฆูนา ดัฮ นะ บรี กูญา ปาฮาฆิ โกะ บือนา บารัก นู บาฌิ โซะ ดือนียา_ บรี กะ ลูมอฮ ยิว ฌูฆา. 28ตานา กู บูวัจ ลาฆู อีนี บรี ซือลือซัย ดัฮ_ จะ_ กู บือเลฮ ซรัฮ โกะ ดูเวะ มืองูเตะ_ บรี กะ กูญา อีตู ฮาบิฮ ดัฮ เตอ_ กู นะ บือฌาลัด ลาลู นังฆรี นะ กาเญา_ ปี รอจ กะ นังฆรี ซะเปน. 29กะฆีเตอ_ กู ตาฮู จะ_ วะตู กู มาแรฮ รอจ กะ กาเญา_ กู นะ มาแรฮ ปาฮาฆิ บรี กะ กาเญา_ ลาฆู นู เยซู คริด นะ บรี ซือลามัจ กะ กาเญา_ ปือนอฮ มีแม เลอ.
30โกะ ดีบราดี เออ_ นู กีตา ปือจายา กะ เยซู คริด_ ตูฮัด นะ กีตา เตอ_ นู ซือมืองัจ นะ ตูฮัด บรี กีตา ซายัก บือซามา-ซามา ฌูฆา_ กะฆีเตอ เลอ_ กู มีตา กือมัซๆ จะ_ บรี กาเญา นะ ปาคัจ ตูโลก บือซาโวจ_ บือซามา ฌางัน กู_ ฌางัน ฮาตี งูฆางู_ บือซาโวจ กะ ตูฮัด เดะ อาตัซ_ ปาซัน ลาฆู นะ กู เลอ. 31บือซาโวจ เลอ_ มีตา บรี กู นะ บือเลฮ ลือปัซ_ เดะ ตางัน นะ โกะ ซือมียา นู ตีเมา ปือจายา_ เดะ นังฆรี ยูเดีย_ มีตา บรี โกะ ซือมียา นะ ตูฮัด เดะ นังฆรี เยรูซาเลม นะ ลีฮัจ จะ_ นู กู บือกรือฌา ตูโลก กูญา_ ฌาดี ลาฆู บาฌิ ซูโงฮ เลอ. 32กะฆีเตอ_ ดัฮ กือนา เดะ ฮาตี นะ ตูฮัด_ กู นะ บือเลฮ มาแรฮ รอจ กะ กาเญา_ อาดา ลาฆู ซูกา ฮาตี ซูโงฮ_ นะ บือเลฮ ดูโดะ บรี ซือนัง บาฌิ ฌางัน กาเญา เลอ. 33ตูฮัด เดะ อาตัซ_ ญา นู บรี กีตา ดูโดะ ซือนัง ซือลามัจ เตอ_ มีตา บรี ญา นะ ดูโดะ บือซามา ฌางัน กาเญา ซือมูฮา เลอ. อาเมน.
Currently Selected:
โรม 15: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
