มัดทัย 3
3
โยฮัน นู บรี ลาฆู ซือลับ เดะ อาเย
(มาระโก 1.1-8; ลูกา 3.1-18; โยฮัน 1.19-28)
1กาลา อีตู_ อาดา โยฮัน นู บรี ลาฆู ซือลับ เดะ อาเย เตอ_ ญา มาแรฮ รอจ กะ ปาดัก ตานัฮ ตูโฮยํ นู ลือฆา_ เดะ นังฆรี ยูเดีย 2มือญาเระ จะ_ “กือนา บราเลฮ ฮาตี เลอ_ ซาเบะ จะ_ เตด ลามา ลาฆี_ ตูฮัด เดะ อาตัซ นะ มาแรฮ ฌาดี ราฌา#3.2 ซูรัจ ลามา จะ “นังฆรี โซะ ลาแงะ นะ มาแรฮ รอจ”. นะ ปือบือลา อูมัจ ซือมียา ดัฮ เลอ. ”#มท. 4.17; มก. 1.15
3ปาซัน โยฮัน อีนี เลอ_ อิซายา ซือมียา ตูโดฮ ลาฆู นะ ตูฮัด_ บือเลฮ ตูโดฮ_ มือเลา จะ
“อาดา ซือวารา ซือมียา บือซูระ_ เดะ ปาดัก ตานัฮ ตูโฮยํ นู ลือฆา_ มือเลา จะ_
กือนา ซียะ ฌาลัด บรี ซุจ_ บีดา ตูฮัด นะ มาแรฮ เลอ.
กือนา บือกรือฌา ฌาลัด นะ ญา_ บรี รือมัก ปี เลอ. ” #
อซย 40.3 ญา จะ.
4กาเยด บาฌู นะ โยฮัน_ บูวัจ ฌางัน บูลู อูตัย. ญา อาดา กูเละ บือนาตัก_ ฌาดี ตาลี ปีงัก นะ ญา. ญา มากัด โกะ บลาลัก ฌางัน อาเย มีซัด มาทู. #2รฌ 1.8 5วะตู อีตู_ อาดา ลูมอฮ ซือมียา_ ดาตัก เดะ นังฆรี เยรูซาเลม_ เดะ นังฆรี ยูเดีย ราตา_ เดะ โซะ บีดิก ซูงัย จอแดน ราตา เตอ_ กูญา ปาคัจ ตรือเบะ ปี ซารี โยฮัน ซือมูฮา. 6กูญา ซาโงะ ลาฆู ดูซา นะ กูญา. กะฆีเตอ_ โยฮัน บูวัจ บรี กูญา ซาโมจ_ ลาฆู ซือลับ เดะ อาเย เดะ ซูงัย จอแดน.
7โยฮัน ลีฮัจ บือฆารี ลูมอฮ ฟาริซี ฌางัน ลูมอฮ ซะดูซี มาแรฮ บาญะ_ บีดา นะ ซาโมจ ลาฆู ซือลับ เดะ อาเย. กะฆีเตอ_ ญา มือเลา ฌางัน กูญา จะ_ “กาเญา บักซา อูลัยํ ฌาฮัจ เลอ. ซาปา บือเลฮ ปรีงัจ กะ กาเญา_ บรี กาเญา ลารี บูวัก_ เดะ ลาฆู นู ตูฮัด นะ มูซัยํ กรัจ ฮูโกบ เตอ?#มท. 12.34; 23.33 8กะฆีเตอ_ ดัฮ กาเญา บราเลฮ ฮาตี ซูโงฮ ดัฮ เตอ_ กือนา ปลีฮัจ เดะ ลาฆู ปือบูวัจ นะ กาเญา เลอ_ ซือรูปา ปูโฮด กายู นู บือบูวัฮ บาฌิ. 9ฌางัน อีงัจ มือเลา เดะ ฮาตี จะ_ ‘กีตา อาดา อับราฮัม ฌาดี อาโปก เลอ.’ ซาเบะ กู มือญาเระ กะ กาเญา จะ_ ตูฮัด เดะ อาตัซ ญา นะ บูวัจ บรี โกะ บีฌี บาตู อีนี_ ฌาดี นานะ นะ อับราฮัม บือเลฮ. #ยน. 8.33 10วะตู อีนี_ กาเญา ซือรูปา โกะ ปูโฮด กายู_ นู อาดา กาปะ ตืองะ เดะ ปรือดู เตอ. ราตา ปูโฮด_ นู บือบูวัฮ เตด บาฌิ_ นะ กือนา ตือบัก_ บูวัก ตูนู เดะ อาปี เลอ. #มท. 7.19 11โซะ กู นี_ กู บูวัจ บรี กาเญา ซือลับ เดะ อาเย_ บีดา นะ บรี ลีฮัจ_ นู กาเญา บราเลฮ ฮาตี ดัฮ. ตาปี อาดา ซือมียา ซืออูรัก นะ มาแรฮ เดะ บลากัก กู เตอ_ ญา เลอ_ นู มือฆัฮ ลือเบฮ เดะ กู. ปะตาปะ นะ ญา โปด_ กู เตด บือฆูนา นะ บาวา เลอ. ซือมียา อีตู เลอ_ ญา นะ บูวัจ บรี กาเญา_ ซือรูปา ซือลับ เดะ ซือมืองัจ นะ ตูฮัด เตอ_ ซือลับ เดะ อาปี ฌูฆา เลอ. 12ซือมียา อีตู_ ญา อาดา ปือญูเดาะ เดะ ตางัน นะ ญา_ บีดา นะ ซูเดาะ ปาดี. ญา นะ บูวัจ บรี ลามัน ปาดี นะ ญา จรัฮ บาฌิ. โกะ บรัซ นะ ญา เตอ_ ญา นะ ตาโรฮ เดะ ดาเงา. ตาปี กูเละ ปาดี อีตู_ ญา นะ ตูนู เดะ อาปี_ นู เตด ดือละ ปาดับ ลาลู เลอ. ” โยฮัน ญา จะ.
เยซู ซาโมจ ลาฆู ซือลับ เดะ อาเย
(มาระโก 1.9-11; ลูกา 3.21-22)
13วะตู อีตู_ เยซู มาแรฮ ดาตัก เดะ นังฆรี ฆาลิลี_ ซารี โยฮัน เดะ ซูงัย จอแดน_ บีดา นะ ซาโมจ ลาฆู ซือลับ เดะ อาเย_ เดะ โยฮัน เตอ. 14ตาปี โยฮัน_ ญา นะ บลารัก กะ เยซู_ มือเลา จะ_ “กู ฆาโดฮ นะ ซาโมจ ลาฆู ซือลับ เดะ เกา เลอ. ตาปี เกา ฆามะ นะ มาแรฮ ซาโมจ เดะ กู เฆอ?”
15ตาปี เยซู ตีกัฮ กะ ญา จะ_ “วะตู อีนี_ เกา กือนา บูวัจ เลอ. บือฆูนา เลอ_ นู กีตา นะ บูวัจ ลาฆู บาฌิ ตือปัจ_ ราตา ลาฆู. ” กะฆีเตอ_ โยฮัน ญา บรี กะ ญา ดัฮ.
16ตานา เยซู ซาโมจ ลาฆู ซือลับ เดะ อาเย ดัฮ_ ญา ญาแญะ เดะ อาเย ดัดดัด. ลีฮัจ เลอ_ ลาแงะ ตือบูกา ดัฮ. เยซู ลีฮัจ ซือมืองัจ นะ ตูฮัด_ ซือรูปา บูโรก ปาตี_ ตูโรด มาแรฮ มืองาตอจ เดะ อาตัซ ญา. 17ลีฮัจ เลอ_ อาดา ซือวารา นะ ตูฮัด_ ดาตัก เดะ ลาแงะ_ มือเลา จะ_ “ซือมียา อีนี เลอ_ ฌาดี นานะ นะ กู_ นู กู ซายัก. กู ซูกา ฮาตี กะ ญา_ บาญะ เลอ. ” ญา จะ. #ลมล 22.2; มปต 2.7; อซย 42.1; มท. 12.18; 17.5; มก. 1.11; ลก. 9.35
