มัดทัย 2
2
โกะ ลูมอฮ ซือมียา ปานัย มาโซะ ซารี เยซู
1ตานา เยซู ดูโดะ เดะ อาปี_ เดะ ตูโปะ เบดเลเฮม_ โซะ นังฆรี ยูเดีย_ เฮโรด ญา ฌาดี ราฌา เดะ นังฆรี อีตู. ลีฮัจ เลอ_ อาดา ลูมอฮ ซือมียา ปานัย_ มาแรฮ ดาตัก โซะ ตีมอยํ_ มาแรฮ รอจ กะ นังฆรี เยรูซาเลม_ 2ตาญา จะ_ “ปัจ ดีฮา เลอ_ นานะ นู ดูโดะ เดะ อาปี_ ฌาดี ราฌา บักซา ยิว? กามี ลีฮัจ บีตัก นะ ญา_ ญาแญะ โซะ ตีมอยํ ดัฮ. กะฆีเตอ_ กามี ปาคัจ มาแรฮ_ นะ มือญือมัฮ กะ ญา เลอ. ” กูญา จะ.
3ตานา ราฌา เฮโรด ดืองัยํ ลาฆู กะฆีเตอ ดัฮ_ ญา ฆาโดฮ ฮาตี บาญะ. โกะ ลูมอฮ ซือมียา เดะ นังฆรี เยรูซาเลม_ ปาคัจ ตูโรจ ฆาโดฮ ฮาตี ซามา. 4ราฌา เฮโรด บลาโลก โกะ ลูมอฮ ซามี ซัยํบือซัยํ_ ฌางัน โกะ ลูมอฮ ซือมียา อาฌัยํ ลาฆู ปือมือซัด นะ ตูฮัด มาแรฮ บือมุน บือกีรา. ญา ตาญา จะ_ “ ราฌา นู บรี ซือลามัจ เตอ_ ญา นะ ดูโดะ เดะ อาปี ปัจ ดีฮา?”
5กะฆีเตอ_ โกะ ลูมอฮ อีตู ตีกัฮ กะ ญา จะ_ “ญา นะ ดูโดะ เดะ อาปี_ เดะ ตูโปะ เบดเลเฮม_ นังฆรี ยูเดีย. กรานา อาดา ซือมียา ตูโดฮ ลาฆู นะ ตูฮัด_ ซืออูรัก_ นู ฆาแรฮ ดัฮ จะ
6 “ ‘โอ ตูโปะ เบดเลเฮม_ เดะ โซะ นังฆรี ยูเดีย เออ
โบะ เกา เตด ฌาดี ตูโปะ นู ดือมิ เดะ กาวัด เตอ
เดะ มาตา นะ ลูมอฮ ซือมียา บือบือลา นังฆรี ยูเดีย.
กรานา อาดา ซือมียา ซืออูรัก_ นู นะ ตรือเบะ เดะ เกา เตอ_
ญา เลอ_ นู นะ บือบือลา อิซราเอน_ บักซา นะ กู.’ ตูฮัด ญา จะ. ” #
มคา 5.2
7กะฆีเตอ_ ราฌา เฮโรด_ ญา จูรี บลาโลก ลูมอฮ ซือมียา ปานัย อีตู มาแรฮ_ ตาญา ลาฆู แนฮฌือแนฮ จะ_ “กาเญา ลีฮัจ บีตัก อีตู_ ตรือเบะ ญาแญะ_ วะตู ดีฮา?”
8กะฆีเตอ_ ญา บรี ลูมอฮ อีตู ปี_ กะ ตูโปะ เบดเลเฮม_ ปือซัด จะ_ “ปี มือโซะ ตาญา ปาซัน นานะ ดือมิ อีตู เลอ. ดาปัจ ดัฮ_ บาลิ มาแรฮ_ มือญาเระ บรี กะ กู ตาฮู_ บีดา กู นะ ปี มือญือมัฮ กะ นานะ ดือมิ อีตู ฌูฆา เลอ. ” ญา จะ.
9ลูมอฮ ซือมียา ปานัย_ กูญา ปี ตูโรจ กะ ปือมือซัด นะ ราฌา. ลีฮัจ เลอ_ บีตัก อีตู_ บีตัก นู กูญา ลีฮัจ โซะ ตีมอยํ ซีงี เตอ_ ญา ปี โซะ ฮือลด กูญา_ มาแรฮ บราดู_ เดะ อาตัซ ตือปัจ นานะ ดือมิ ดูโดะ. 10ตานา ลีฮัจ บีตัก อีตู ดัฮ_ กูญา ซูกา ฮาตี บาญะ ซูโงฮ เลอ. 11กะฆีเตอ_ กูญา มาโซะ ปี กะ ดาลับ รูมัฮ อีตู_ ดาปัจ นานะ ดือมิ_ ฌางัน มารียา_ มะ เดะ ญา. กูญา ปาคัจ ตือมะ มือญือมัฮ กะ นานะ ดือมิ อีตู. กูญา บูกา ปือตี นะ กูญา_ อาเมด กลือกะ นู บรือฆา มาแรฮ_ มือญือมัฮ กะ นานะ ดือมิ. อาดา มัซ_ อาดา กือมียัน_ อาดา มีญะ บาวู มดยอบ กูญา มือญือมัฮ กะ ญา.
12ลือปัซ อีตู_ ลูมอฮ ซือมียา ปานัย_ กูญา ตือลีนา มีปี_ ดืองัยํ ลาฆู ปรีงัจ กะ กูญา_ ตีเมา บรี กูญา บาลิ ปี ดาปัจ ราฌา เฮโรด เลอ. กะฆีเตอ_ กูญา บาลิ กะ นังฆรี นะ กูญา_ ปี กะ ฌาลัด อาซิก.
โกะ โยเซบ ลารี เดะ ราฌา
13ตานา ลูมอฮ ซือมียา ปานัย ปี ดัฮ_ ลีฮัจ เลอ_ อาดา ฮูลู บาลัก นะ ตูฮัด_ ญา ปลีฮัจ กะ โยเซบ เดะ ลาฆู มีปี_ มือญาเระ จะ_ “บีกัซ เลอ. บาวา นานะ ดือมิ_ ฌางัน มะ เดะ ญา_ ลารี ปี กะ นังฆรี อียิบ. ดูโดะ นาตี ปัจ อีตู_ ตือดะ กู นะ จาเระ ซือกาลี ปูลัก. กรานา จะ_ ราฌา เฮโรด นะ ซารี นานะ ดือมิ อีนี_ บีดา นะ บูนอฮ ญา บูวัก. ” ญา จะ.
14กะฆีเตอ_ มาลับ อีตู_ โยเซบ บีกัซ_ บาวา นานะ ดือมิ_ ฌางัน มะ เดะ ญา_ บือปี กะ นังฆรี อียิบ. 15กูญา ดูโดะ ปัจ อีตู_ ตือดะ ราฌา เฮโรด มาตี ดัฮ_ บีดา นะ ฌาดี รือมัก_ บือกะ ปือมือเลา นะ ตูฮัด_ นู ญา บรี ซือมียา ตูโดฮ มือเลา ดูลู จะ “กู บลาโลก นานะ นะ กู_ บรี ตรือเบะ เดะ นังฆรี อียิบ. ”#ฮชย 11.1
ราฌา เฮโรด ซูโรฮ กูญา บูนอฮ โกะ นานะ
16ตานา ราฌา เฮโรด ลีฮัจ จะ_ ลูมอฮ ซือมียา ปานัย อีตู_ กูญา ตีปู ญา_ ญา โปด_ มูซัยํ โตระ. ญา ซูโรฮ ซือมียา ปี กะ ตูโปะ เบดเลเฮม_ ปี กะ ตูโปะ ปิกดาปิก ซามา_ บรี กูญา ปี บูนอฮ โกะ นานะ กีลากี ซือมูฮา_ ตะเดะ ดูวา ตาโฮด ตูโรด มาแรฮ_ บือกะ วะตู นู ญา บือเลฮ ตาฮู เดะ ลูมอฮ ซือมียา ปานัย.
17วะตู อีตู_ ฌาดี รือมัก ดัฮ_ บือกะ ปือมือเลา นู เยเรมียา ซือมียา ตูโดฮ ลาฆู นะ ตูฮัด บือเลฮ มือเลา จะ
18 “เดะ ตูโปะ รามา #2.18 ตูโปะ รามา ฌาดี ซือตูโปะ นู ดาปิก เดะ ตูโปะ เบดเลเฮม. ราเชน_ บีนี นะ ยาโกบ_ ญา มาตี ดาปิก ตือปัจ อีตู. ลีฮัจ ลมล 35.16-21. อาดา ซือวารา ซือมียา มือนาแงฮ_ บือปาโตด บาญะ.
ฌาดี นีบีนี ราเชน เตอ_ ญา มือนาแงฮ_ กรานา ลูมอฮ นานะ นะ ญา.
ญา ตีเมา นะ บรี ซาปา ปูโฌะ ญา_ กรานา โกะ นานะ อีตู_ ฮอย ดัฮ เลอ. ” #
ยรม 31.15
ญา จะ.
โกะ โยเซบ บาลิ มาแรฮ เดะ นังฆรี อียิบ
19ตานา ราฌา เฮโรด มาตี ดัฮ_ ลีฮัจ เลอ_ อาดา ฮูลู บาลัก นะ ตูฮัด ปลีฮัจ กะ โยเซบ เดะ ลาฆู มีปี_ เดะ นังฆรี อียิบ_ 20มือเลา จะ_ “บีกัซ เลอ. บาวา นานะ ดือมิ_ ฌางัน มะ เดะ ญา_ ตรือเบะ ปี กะ นังฆรี อิซราเอน เลอ. กรานา โกะ ซือมียา นู นะ บูนอฮ นานะ ดือมิ เตอ_ กูญา มาตี ดัฮ. ” ญา จะ.
21กะฆีเตอ_ โยเซบ ญา บีกัซ_ ญา บาวา นานะ ดือมิ_ ฌางัน มะ เดะ ญา_ บือปี กะ นังฆรี อิซราเอน. 22ตานา โยเซบ ดืองัยํ จะ_ อาเคเลา ฌาดี ราฌา เดะ นังฆรี ยูเดีย_ ฆาตี เฮโรด_ อาโปก เดะ ญา เตอ_ ญา ตาโกจ นะ ปี โซะ อีตู เลอ. ตานา ญา มีปี_ ฌาดี ลาฆู ปรีงัจ กะ ญา เตอ_ ญา ลาลู ปี กะ โซะ นังฆรี ฆาลิลี. 23ญา ปี ดูโดะ_ เดะ ตูโปะ นาซาเรด. กะฆีนี_ ฌาดี รือมัก ดัฮ_ บือกะ ปือมือเลา นะ โกะ ซือมียา ตูโดฮ ลาฆู นะ ตูฮัด นู บือเลฮ มือเลา จะ_ กูญา นะ บลาโลก ซือมียา อีตู จะ_ อูรัก นาซาเรด เลอ. #มก. 1.24; ลก. 2.39; ยน. 1.45
