ปือบูวัจ 19
19
เปาโล มือญาเระ ลาฆู นะ ตูฮัด เดะ นังฆรี เอเฟซัด
1กาลา อะโปโล อาดา เดะ นังฆรี โกริน_ เปาโล ฌาลัด ปี เดะ นังฆรี โซะ ตารา_ มาแรฮ รอจ กะ นังฆรี เอเฟซัด. ปัจ อีตู_ ญา ดาปัจ มูเระ ซือตืองัฮ_ 2ตาญา กูญา จะ_ “กาลา กาเญา ปือจายา_ กาเญา ซาโมจ ซือมืองัจ นะ ตูฮัด เฆอ เตด?”
กูญา ตีกัฮ จะ_ “นู อาดา ซือมืองัจ นะ ตูฮัด เตอ_ กามี เตด ดือละ ดืองัยํ เลอ.”
3เปาโล ตาญา จะ_ “ดัฮ ฌาดี กะฆีเตอ_ กาเญา ซาโมจ ลาฆู ซือลับ เดะ อาเย มาจับ นามา?”
กูญา ตีกัฮ จะ_ “ฌาดี มาจับ นู โยฮัน บรี ซือลับ เดะ อาเย.”
4เปาโล มือญาเระ จะ_ “โยฮัน บรี ซือมียา นู บราเลฮ ฮาตี_ นะ ซาโมจ ลาฆู ซือลับ เดะ อาเย เตอ. ญา มือญาเระ กะ ลูมอฮ ซือมียา จะ_ นู กูญา กือนา ปือจายา กะ ซือมียา_ นู นะ มาแรฮ เดะ บลากัก#มก. 1.4-8 ฌาดี เยซู เลอ.”
5ตานา กูญา ดืองัยํ ลาฆู กะฆีเตอ_ กูญา ซาโมจ ลาฆู ซือลับ เดะ อาเย_ เดะ ปือนามา นะ ตูฮัด เยซู. 6ตานา เปาโล ตืองะ ตางัน เดะ ญาวา กูญา_ ซือมืองัจ นะ ตูฮัด_ ญา ตูโรด มาแรฮ เดะ อาตัซ กูญา. กูญา มือเลา ฌาดี ปือมือเลา บาซา แนฮฌือแนฮ_ กูญา ตูโดฮ ลาฆู นะ ตูฮัด. 7ลูมอฮ กีลากี อีตู_ อาดา กีรา บือเลฮ ซือมูฮา_ ฆามะ จะ ดูวา บือลัซ อูรัก.
8กือมูฮา ตีฆา บูลัด_ เปาโล ปี มาโซะ เดะ รูมัฮ บือมุน นะ บักซา ยิว_ ญา ฮาตี บรานี มือเลา บือตีกัฮ-ตีกัฮ ฌางัน ลูมอฮ ซือมียา_ กือวาซา นะ บรี กูญา ตาฮู ตือตู จะ_ นู ตูฮัด เดะ อาตัซ นะ ปือบือลา ฌาดี ราฌา นะ ฌาดี กะฮามี. 9ตาปี อาดา ซือมียา ซือตืองัฮ นู บาตัฮ_ ตีเมา ปือจายา. กูญา มือเลา กาซัยํ_ ปาซัน ฌาลัด นะ ตูฮัด_ โซะ ฮือลด ลูมอฮ ซือมียา. กะฆีเตอ_ เปาโล ตีงัน กูญา ดัฮ_ บาวา ลูมอฮ มูเระ ปี ซามา. บีลัก อารี#19.9 ซูรัจ ลามา ซือตืองัฮ ตามัฮ ปือมือเลา จะ “ตะเดะ ปูโกยํ ซือบือลัซ ปาฆี_ ตือดะ ปูโกยํ ปัจ โซะ ปะฮือญา”. ญา มือเลา บือตีกัฮ-ตีกัฮ_ เดะ รูมัฮ นู ซา_ ตือปัจ ซือมียา ปือนามา ทีรันนัด บียาซา อาฌัยํ. 10ญา บูวัจ กะฆีเตอ_ กือมูฮา ดูวา ตาโฮด. กะฆีเตอ_ ลูมอฮ ซือมียา เดะ นังฆรี เอเซีย ราตา_ กูญา ดืองัยํ ปือมือเลา นะ ตูฮัด เยซู ดัฮ_ เตด จะ ลูมอฮ บักซา ยิว เตอ_ ลูมอฮ บักซา กรีก ฌูฆา.
ลูมอฮ นานะ นะ เซวา
11ตูฮัด เดะ อาตัซ บูวัจ บรี เปาโล บูวัจ ปือนานา ซีดี นู ปือและ ซูโงฮ. 12อาดา ซือมียา อาเมด กาเยด อีซุจ มูคา ซือตืองัฮ_ โกะ กาเยด มานามา โปด_ นู เปาโล บือเลฮ ซูโรฮ ดัฮ_ บาวา ปี ตืองะ เดะ ซือมียา ซาเกะ_ บูวัจ บรี ปือญาเกะ นะ กูญา ลือฆา บาฌิ ดัฮ_ บรี ฮาตู ฌาฮัจ นู มาโซะ เดะ กูญา_ ตรือเบะ ดัฮ.
13อาดา ซือมียา บักซา ยิว ซือตืองัฮ_ นู ฌาลัด ปี มาแรฮ_ ฌาดี บูมอยํ โปรฮ ฮาตู. กูญา กือวาซา นะ ซูโรฮ ปือนามา นะ เยซู_ นะ มือเลา ฌางัน ฮาตู จะ_ “เดะ ปือนามา นะ เยซู_ นู เปาโล มือญาเระ อีตู_ กู ปือซัด เกา_ บรี ตรือเบะ ปี เลอ.”
14อาดา เซวา นู ฌาดี ซามี บือซัยํ เดะ บักซา ยิว ซืออูรัก. ญา อาดา นานะ กีลากี_ ตูโฌฮ อูรัก_ นู บูวัจ กะฆีเตอ. 15ตาปี ฮาตู ฌาฮัจ อีตู ตีกัฮ กะ กูญา จะ_ “เยซู กู กราลา. เปาโล โปด กู กราลา ฌูฆา. ตาปี โซะ กาเญา อีนี_ กู เตด กราลา. กาเญา เตด ซีดี เลอ.”
16กะฆีเตอ_ ซือมียา นู อาดา ฮาตู มาโซะ อีตู_ ญา มือลูปัจ เดะ อาตัซ กูญา_ บือลาวัด บรี ฌือนัฮ เดะ กูญา. ญา กาเตาะ กูญา บาญะ กาลี_ บรี กูญา ลารี ตรือเบะ เดะ รูมัฮ_ ฌู ญาวา นะ กูญา ตือตลาญัก_ อาดา ลียัก เดะ ญาวา ฌูฆา. 17กาลา ลูมอฮ บักซา ยิว_ ฌางัน ลูมอฮ บักซา กรีก เดะ นังฆรี เอเฟซัด_ ดืองัยํ ลาฆู กะฆีเตอ_ กูญา ปาคัจ ตาโกจ โตระ_ ซือมาตา มือโอจ กะ ปือนามา นะ ตูฮัด เยซู.
18อาดา บาญะ ซือมียา_ นู บือเลฮ มาแรฮ ปือจายา กะ เยซู ดัฮ_ กูญา ซาโงะ ปือบูวัจ นู ฌาฮัจ นะ กูญา_ บรี ราตา ซือมียา ตาฮู. 19อาดา บาญะ_ นู ฌาดี ซือมียา มากัย อาเย ลือมู ดัฮ. กูญา อาเมด ซูรัจ บือฆูรู นะ กูญา มาแรฮ_ ตูนู เดะ อาปี_ โซะ ฮือลด ลูมอฮ ซือมียา บาญะ. กูญา บือกีรา รือฆา ซูรัจ อีตู_ ฆามะ บือเลฮ ลีมา ละซา รีเงะ ปีระ#19.19 ฮาดัจ อีตู_ ซือมียา บือกรือฌา นะ บือเลฮ รือฆา อูปัฮ_ ซืออารี ซือรีเงะ ปีระ. ลีฮัจ มท. 20.2 กือมูฮา. 20กะฆีเตอ_ ลาฆู ซีดี อีนี_ บูวัจ บรี ลาฆู ปือมือเลา นะ ตูฮัด งรือลา บาญะ. อาดา ซือมียา นู ปือจายา พรัด บาญะ.
ลาฆู ฆาโดฮ เดะ นังฆรี เอเฟซัด
21วะตู ลาฆู อีนี ซุจ ฮาบิฮ ดัฮ_ เปาโล กีรา ตือตู เดะ ฮาตี_ นะ ลาลู ปี เดะ นังฆรี มาซิโดเนีย_ ฌางัน นังฆรี อาคายา_ บารู นะ ปี กะ นังฆรี เยรูซาเลม ดัฮ. ญา มือเลา จะ_ “วะตู กู ปี ปัจ อีตู ดัฮ_ กู ฆาฆัฮ นะ ปี กะ นังฆรี โรม ฌูฆา.” 22อาดา ซือมียา ตูโลก ญา_ ดูวา อูรัก_ ฌาดี ทิโมที ฌางัน เอรัดตัด. ญา ซูโรฮ กูญา ปี กะ นังฆรี มาซิโดเนีย_ ตาปี อีซี ญา ตะอาซิก_ ดูโดะ เดะ นังฆรี เอเซีย ลาฆี ซือตืองัฮ.
23กาลา อีตู_ อาดา ลาฆู ฆาโดฮ โตระ_ ซาเบะ ฌาลัด นะ ตูฮัด. 24อาดา ตูกัก ปีระ ซืออูรัก_ ปือนามา เดเมตรีโย. ญา บียาซา อาเมด ปีระ มาแรฮ_ บูวัจ บาลัย มิดือมิ_ ซือรูปา กะ บาลัย นะ พระอาเทมิด.#19.24 พระอาเทมิด ฌาดี บือกะ ดาโตะ นีบีนี นู ซัยํบือซัยํ นะ โกะ ซือมียา บักซา กรีก_ ฌาดี ดาโตะ นู กูญา ตูเฮะ_ อีงัจ นะ บือเลฮ โกะ ปาดี_ โกะ บูวัฮ_ โกะ นานะ โปด. บาลัย มือญือมัฮ กะ ญา เดะ นังฆรี เอเฟซัด ฌาดี บาลัย นู บือซัยํ โตระ_ นู ซือมียา ราตา ดือนียา มาแรฮ ลีฮัจ_ มาแรฮ มือญือมัฮ. นู บูวัจ กะฆีนี_ บูวัจ บรี ลูมอฮ ตูกัก ปีระ_ อูโตก บาญะ. 25กะฆีเตอ ญา บลาโลก ลูมอฮ ตูกัก ปีระ มาแรฮ บือซามา_ ฌางัน ลูมอฮ ซือมียา นู บือกรือฌา ลาฆู กะฆีเตอ ซือมูฮา. ญา มือเลา ฌางัน กูญา จะ_ “กาเญา ซือมูฮา_ กาเญา ตาฮู จะ_ นู กีตา กรือฌา กะฆีนี_ กีตา บือเลฮ อูโตก บาญะ ดัฮ. 26กาเญา ลีฮัจ ดัฮ_ ดืองัยํ ดัฮ_ นู ปือบูวัจ นะ อูรัก อีนี_ เปาโล เตอ. ญา มือเลา กือมัซๆ จะ_ บราลา นู บูวัจ ฌางัน ตางัน นะ ซือมียา_ เตด ฌาดี ตูฮัด นู ซูโงฮ. บูกัด เดะ เอเฟซัด ซา นังฆรี_ ญา มือเลา กะฆีนี_ ตาปี เดะ นังฆรี เอเซีย ราตา_ ญา บูวัจ บรี ซือมียา บาญะ ซือซัจ ดัฮ_ อาเลฮ ปี ตูโรจ ลาฆู อีตู. 27ตาโกจ จะ_ บูกัด ซา ลาฆู_ นู กรือฌา นะ กีตา นะ รูฆี ดัฮ_ ตาปี นะ บูวัจ บรี บาลัย นะ พระอาเทมิด นู บือซัยํ_ นะ กือนา มือฌัฮ ฌูฆา_ นะ บูวัจ บรี บือซรี นู บาฌิ นะ ญา_ นะ ลือแงะ ฮาบิฮ ดัฮ. ญา เลอ_ นู ซือมียา ซือมูฮา มือญือมัฮ_ เดะ นังฆรี เอเซีย ราตา_ เดะ ดือนียา ราตาๆ โปด.” ญา จะ.
28ตานา ลูมอฮ ซือมียา บาญะ ดืองัยํ ปือมือเลา อีนี_ กูญา มูซัยํ โตระ_ ปาคัจ บือซูระ จะ_ “เฮย_ พระอาเทมิด นะ ลูมอฮ เอเฟซัด_ ญา บือซัยํ โตระ เลอ.”
29บารู ฌาดี ลาฆู ฆาโดฮ ซูโงฮ_ ราตา เดะ นังฆรี. กูญา ฆรูมง รีฆะ ฆาโย ฌางัน อาริดตาคัด_ ซือมียา เดะ นังฆรี มาซิโดเนีย_ นู บือฌาลัด มาแรฮ ฌางัน เปาโล ดัฮ. กูญา ซา ฮาตี บาวา กูญา ดูวา อูรัก บือปี_ บลารี มาโซะ กะ ตือปัจ บือมุน. 30เปาโล อีงัจ นะ มาโซะ ปี ดาปัจ ลูมอฮ ซือมียา บาญะ อีตู_ ตาปี ลูมอฮ มูเระ ตีเมา บรี ญา มาโซะ. 31ลูมอฮ ซือมียา ซัยํบือซัยํ เดะ นังฆรี เอเซีย ซือตืองัฮ_ นู ฌาดี ซาบัจ นะ เปาโล_ กูญา ซูโรฮ ซือมียา ปี มือเลา กือมัซๆ ฌางัน ญา จะ_ “ฌางัน นะ มาโซะ เดะ ตือปัจ บือมุน เลอ.” ญา จะ.
32โซะ ซือมียา นู บือมุน ดัฮ เตอ_ กูญา ฆาโดฮ โตระ. อาดา ซือมียา บือซูระ กะฆีนี กะฆีเตอ. ซือมียา นู บาญะ เตอ_ กูญา เตด ตาฮู จะ_ ปาซัน นู กูญา บือมุน ดัฮ_ ฌาดี ลาฆู นามา เลอ.
33โกะ ซือมียา ซือตืองัฮ อาคา จะ_ อาเลกซันเดอ ฌาดี ซือมียา นู บูวัจ ลาฆู ฆาโดฮ_ ซาเบะ ลูมอฮ บักซา ยิว ซูโรฮ ญา_ ปี บือดีรี โซะ ฮือลด. โซะ อาเลกซันเดอ ญา ลามัย ตางัน_ อีงัจ นะ ตีกัฮ กูญา. 34ตาปี ตานา กูญา ลีฮัจ จะ_ ญา ฌาดี ซือมียา บักซา ยิว_ กูญา ซือมูฮา ปาคัจ บือซูระ บือซามา_ กีรา บือเลฮ ฆามะ ดูวา ฌับ_ ซือมาตา มือเลา จะ_ “เฮย_ พระอาเทมิด นะ ลูมอฮ เอเฟซัด_ ญา บือซัยํ โตระ เลอ.”
35กะฆีเตอ_ กือปาลา นังฆรี มาแรฮ ซืออูรัก. ญา บูวัจ บรี ลูมอฮ ซือมียา ซืองะ ดัฮ_ ญา มือเลา ฌางัน กูญา จะ_ “ลูมอฮ ซือมียา นังฆรี เอเฟซัด เออ_ โกะ ซือมียา ราตา ตาฮู จะ_ นู ลูมอฮ ซือมียา เดะ นังฆรี เอเฟซัด_ ฌาดี ซือมียา ปือบือลา บาลัย นะ พระอาเทมิด นู บือซัยํ โตระ_ ปือบือลา บาตู กรามัจ_ นู ฆูโฆยํ เดะ ลาแงะ ดัฮ ฌูฆา. 36ฮอย ซาปา นะ บือเลฮ กีปัซ ลาฆู อีตู. กะฆีเตอ กาเญา กือนา ซืองะ เลอ. ฌางัน บูวัจ ลาฆู เตด บือฆูนา. 37กาเญา ซูดัฮ บาวา ซือมียา ดูวา อูรัก อีนี มาแรฮ ดัฮ_ นู เตด ฌาดี ซือมียา ปือญามุน ซือบารัก เดะ รูมัฮ มือญือมัฮ เตอ_ นู เตด บือเลฮ มือเลา ตะอารัฮ กะ ดาโตะ นะ กีตา. 38ดัฮ เดเมตรีโย_ ฌางัน อานะ กูลี นะ ญา_ อาดา ลาฆู นะ อาดู ซาปา_ อาดา อารี นู ซัน นะ ซาซัจ ลาฆู มานามา เตอ_ อาดา ซือมียา กรัจ ฮูโกบ ฌูฆา. บรี กูญา อาเมด ปาซัน นะ กูญา_ ปี อาดู ตือปัจ ซัน เลอ. 39ดัฮ อาดา ลาฆู นามา อาซิก_ บรี ลาฆู อีตู นะ ซือลือซัย_ เดะ ตือปัจ บือมุน บือกีรา_ บรี กือนา ลาฆู. 40ตาโกจ จะ_ กีตา นะ กือนา อาดู_ ซาเบะ นู บือมุน ฆาโดฮ เดะ อารี อีนี ดัฮ. กรานา ฮอย ลาฆู นะ ตีกัฮ_ นู กีตา ฆรูมง บือมุน ฆาโดฮ กะฆีนี ดัฮ.” ญา จะ.
41ซูดัฮ มือเลา กะฆีเตอ ดัฮ_ ญา ซูโรฮ ลูมอฮ บือมุน_ บรี กูญา ปาคัจ บาลิ เลอ.
Currently Selected:
ปือบูวัจ 19: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
