ปือบูวัจ 18
18
เปาโล ปี กะ นังฆรี โกริน
1ลือปัซ อีตู_ เปาโล ตรือเบะ เดะ นังฆรี เอเทน_ ปี กะ นังฆรี โกริน. 2โซะ อีตู_ ญา ดาปัจ ซือมียา บักซา ยิว ซืออูรัก_ นู ปือนามา จะ อาควีลา. อาควีลา ฌาดี ซือมียา นังฆรี ปอนโตด. กาลา อีตู_ ราฌา คลาวดียัด ซูดัฮ ปือซัด_ บรี ลูมอฮ บักซา ยิว ตรือเบะ เดะ นังฆรี โรม_ ซือมูฮา ดัฮ. กะฆีเตอ_ อาควีลา ฆาโดฮ ตีงัน นังฆรี อิตาลี_ ญา บารู มาแรฮ รอจ กะ นังฆรี โกริน_ ฌางัน บีนี นะ ญา_ นู ปือนามา จะ ปริซีลา. เปาโล ปี ฌือเงาะ ลีฮัจ กูญา ลากี บีนี_ 3ดูโดะ บือกรือฌา บือซามา ฌางัน กูญา_ ซาเบะ ญา ฌาดี ตูกัก บูวัจ กาฌัก_ ซือรูปา กูญา. 4เดะ อารี บราดู กรือฌา บีลัก มีงู_ ญา ปี กะ รูมัฮ บือมุน นะ บักซา ยิว_ มือเลา บือตีกัฮ-ตีกัฮ ฌางัน กูญา_ กือวาซา นะ ปรีงัจ กะ ลูมอฮ บักซา ยิว_ ฌางัน ลูมอฮ บักซา กรีก บรี กูญา ปือจายา.
5ตานา ซีลา ฌางัน ทิโมที มาแรฮ ดาตัก เดะ นังฆรี มาซิโดเนีย ดัฮ_ เปาโล บือกรือฌา ซา ลาฆู_ ซือมาตา มือญาเระ ปือมือเลา นะ ตูฮัด_ มือเลา ฌาดี ซะซรี กะ ลูมอฮ บักซา ยิว จะ_ เยซู เลอ_ ฌาดี ราฌา นู บรี ซือลามัจ. 6กาลา กูญา บือลาวัด ฌางัน ญา_ มือเลา ตะอารัฮ กะ ญา_ เปาโล กือพุจ ฮาบู ตานัฮ เดะ กาเยด นะ ญา_ มือเลา ฌางัน กูญา จะ_ “นู กาเญา นะ ฌาฮานัม เตอ_ บูกัด ซาลัฮ นะ กู_ ตาปี ฌาดี บือกะ ฮาตี นะ กาเญา เลอ. บอฮ_ ตะเดะ อีนี_ กู นะ ปี ซารี ลูมอฮ บักซา อาซิก.” ญา จะ.
7กะฆีเตอ เปาโล ตีงัน ลูมอฮ กูญา ดัฮ_ ญา ปี มาโซะ เดะ รูมัฮ นะ ซือมียา ซืออูรัก_ ปือนามา จะ_ ทิทียัด ยูซะตัด. ญา เตอ_ ฌาดี ซือมียา ตูเฮะ กะ ตูฮัด. รูมัฮ นะ ญา_ อาดา โซะ บีดิก รูมัฮ บือมุน_ นะ บักซา ยิว. 8คริซือปัด_ นู ฌาดี กือปาลา รูมัฮ บือมุน อีตู_ ญา ปือจายา กะ ตูฮัด เยซู ดัฮ_ ฌางัน โกะ ซือมียา ซือรูมัฮ นะ ญา_ ซือมูฮา. อาดา ซือมียา นังฆรี โกริน บาญะ อูรัก_ นู มือนีงัย ดัฮ_ นู ปือจายา_ ซาโมจ ลาฆู ซือลับ เดะ อาเย ฌูฆา.
9อาดา ซา มาลับ_ ตูฮัด ญา มาแรฮ ปลีฮัจ กะ เปาโล_ มือเลา จะ_ “ฌางัน ตาโกจ เลอ_ กือนา มือญาเระ ลาฆู นะ กู_ กะ ลูมอฮ อีนี ลาฆี. ฌางัน นะ ซืองะ เลอ. 10กรานา จะ_ กู นี เลอ_ อาดา บือซามา ฌางัน เกา. ฮอย ซาปา_ นะ บือเลฮ บือลาวัด ฌางัน เกา_ นะ บูวัจ ฌาฮัจ กะ เกา. กรานา เดะ นังฆรี อีนี_ กู อาดา โกะ ซือมียา นะ กู_ บาญะ อูรัก.” ตูฮัด ญา จะ.
11กะฆีเตอ เปาโล ดูโดะ ปัจ อีตู_ ซา ตาโฮด_ นัม บูลัด. ญา อาฌัยํ กูญา ลาฆู ปือมือเลา นะ ตูฮัด.
12กาลา ฆาลีโย ฌาดี ฮูลู บาลัก ปือบือลา นังฆรี อาคายา_ โกะ บักซา ยิว ปาคัจ บือลาวัด ฌางัน เปาโล_ รีฆะ ญา_ บาวา บือปี ญาแญะ กะ ซัน. 13กูญา อาดู เปาโล จะ_ “ซือมียา อีนี เตอ_ ญา บืออาฌะ ลูมอฮ ซือมียา_ บรี มือญือมัฮ กะ ตูฮัด_ บือกะ ซาลัฮ เดะ ฮูโกบ เลอ.” กูญา จะ.
14ตานา เปาโล ฆามะ นะ ตีกัฮ กูญา_ ฆาลีโย มือเลา ฌางัน โกะ บักซา ยิว จะ_ “กาเญา บักซา ยิว เออ_ ดัฮ ปาซัน อีนี ฌาดี ลาฆู ซาลัฮ_ ลาฆู ฌาฮัจ มานามา_ นู ญา บูวัจ ดัฮ_ กู นะ ตาฮัด มือนีงัย กะ กาเญา. 15ตาปี นี เลอ_ ฌาดี ปาซัน ลาฆู ปือมือเลา ซือตืองัฮ เตอ_ ปาซัน ปือนามา อีนี_ ปือนามา อีตู_ ปาซัน ปือมือเลา ฮูโกบ นะ กาเญา โปด. ปาซัน อีนี_ กาเญา ปี ฮัจลีฮัจ ตะอาซิก เลอ. โซะ กู นี_ กู ตีเมา นะ ฌาดี ซือมียา กรัจ ฮูโกบ ลาฆู กะฆีนี ลาลู เลอ.” ญา จะ. 16กะฆีเตอ ญา โปรฮ กูญา_ บรี ตรือเบะ เดะ ซัน. 17อาดา ลูมอฮ ซือมียา ซือมูฮา ปาคัจ บือลาวัด ฌางัน โซซะเทเน_ นู ฌาดี กือปาลา รูมัฮ บือมุน นะ บักซา ยิว. กูญา รือเปะ ญา เดะ ลามัน ซัน. ตาปี โซะ ฆาลีโย_ ญา เตด ปือดูลี ลาลู.
เปาโล บาลิ ปี กะ นังฆรี อันตีโยก
18เปาโล ดูโดะ เดะ นังฆรี โกริน_ บาญะ อารี ลาฆี. กะฆีเตอ_ ญา ตีงัน ลูมอฮ ดีบราดี. ญา ญาแญะ กาปัน บลายัยํ ปี_ กะ นังฆรี ซีเรีย. ปริซีลา ฌางัน อาควีลา ปี ซามา. ดูลู เดะ ญาแญะ กาปัน เดะ ตือเปด เคนครียา_ เปาโล บือเลฮ ฆูติก โบะ นะ ญา_ ฌาดี ลาฆู ปือมือเลา บือฌาญี ฌางัน ตูฮัด.#18.18 ตูโรจ กะ ฮาดัจ นะ บักซา ยิว_ นู ซือมียา กูโกยํ ปาลา_ เฆอ จะ ฆูติก โบะ_ ฌาดี ปือนานา บรี ลีฮัจ จะ_ ลาฆู นู ญา บือเลฮ บือฌาญี ฌางัน ตูฮัด เตอ_ ญา บูวัจ ซุจ ดัฮ. ลีฮัจ กีรา 6.18
19กูญา มาแรฮ รอจ กะ นังฆรี เอเฟซัด. เปาโล ตีงัน ปริซีลา ฌางัน อาควีลา ปัจ อีตู ดัฮ. ญา ปี มาโซะ เดะ รูมัฮ บือมุน นะ บักซา ยิว_ มือเลา บือตีกัฮ-ตีกัฮ ฌางัน กูญา. 20กูญา มีตา กือมัซๆ เดะ ญา_ บรี ดูโดะ ลามา ฌางัน กูญา_ ตาปี ญา ตีเมา. 21ตาปี ดูลู ญา นะ ปี ดัฮ_ ญา มือเลา จะ_ “ดัฮ ตูฮัด บือคานะ กะฆีเตอ_ กู นะ บาลิ มาแรฮ ซารี กาเญา ปูลัก.”
กะฆีเตอ ญา ญาแญะ กาปัน_ บลายัยํ ปี ตีงัน นังฆรี เอเฟซัด. 22ตานา รอจ กะ นังฆรี ซีซาเรีย ดัฮ_ ญา ฌาลัด ปี กะ นังฆรี เยรูซาเลม_ มืองา ลูมอฮ นะ ตูฮัด ลาลู ปี กะ นังฆรี อันตีโยก. 23ตานา ญา ดูโดะ เดะ นังฆรี อันตีโยก_ ซือตืองัฮ ดัฮ_ ญา ตรือเบะ ปูลัก_ บือฌาลัด ปี ราตา เดะ นังฆรี ฆาลาเตีย_ ฌางัน นังฆรี ฟรีเจีย. โซะ อีตู_ ญา ตูโลก ลูมอฮ มูเระ ซือมูฮา_ บรี กือฌะ กือมัซ.
อะโปโล มาแรฮ อาฌัยํ ปือมือเลา นะ ตูฮัด
24อาดา ซือมียา บักซา ยิว ซืออูรัก_ ปือนามา อะโปโล. ญา บือฌาดี เดะ นังฆรี อาเลกซันดรียา ดัฮ_ ฌาดี ซือมียา ปานัย มือเลา_ ตาฮู ซูรัจ ปือมือเลา นะ ตูฮัด บาฌิ ซูโงฮ. ญา เตอ_ มาแรฮ รอจ กะ นังฆรี เอเฟซัด. 25ญา บือเลฮ บลาฌัยํ ลาฆู นะ ตูฮัด ดัฮ. กะฆีเตอ_ ญา มือญาเระ ลาฆู อีตู_ ฮาตี ฮางัจ. ญา อาฌัยํ ลาฆู นะ เยซู กือนา ดัฮ_ ตาปี ปาซัน ลาฆู ซือลับ เดะ อาเย เตอ_ ญา ตาฮู ซา ลาฆู อีนี_ นู โยฮัน บือเลฮ บรี ซือมียา ซือลับ เดะ อาเย ดัฮ. 26ญา ฮาตี บรานี_ ฮึนตะ นะ อาฌัยํ เดะ รูมัฮ บือมุน นะ บักซา ยิว. กาลา ปริซีลา ฌางัน อาควีลา ดืองัยํ ญา ดัฮ_ กูญา บาวา ญา_ บือปี กะ รูมัฮ นะ กูญา. กูญา อาฌัยํ ญา บรี ตาฮู ลาฆู นะ ตูฮัด_ บรี บาฌิ เดะ ดูลู.
27วะตู อะโปโล ซูกา ปี กะ นังฆรี อาคายา_ ลูมอฮ ดีบราดี ตูโลก ญา_ ฆาแรฮ ซูรัจ บรี กะ ลูมอฮ มูเระ โซะ อีตู_ บรี กูญา นะ ซาโมจ ญา. ตานา รอจ ดัฮ_ ญา บือเลฮ ตูโลก บาญะ_ กะ โกะ ซือมียา นู ตูฮัด ฮาลัย บรี ซือลามัจ_ บรี กูญา ฌาดี ซือมียา ปือจายา ดัฮ.
28โซะ ฮือลด ซือมียา บาญะ_ ญา ฮาตี งูฆางู มือเลา บือตีกัฮ_ บีดา บรี ฌือนัฮ เดะ ลูมอฮ ยิว. ญา บาจา ซูรัจ ปือมือเลา นะ ตูฮัด_ บรี ลีฮัจ จะ_ เยซู เตอ เลอ_ ญา ฌาดี ราฌา นู บรี ซือลามัจ.
Currently Selected:
ปือบูวัจ 18: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
