Iba 22
22
Ekyoo mgbi oshishe
1Nɛ ongyesɔ ma tso ani ekyoo mgbi eni oshishe, gbosa dafi idzinggi mani, le fɛ kyɛ mi itsuutɔ mgbi Imgbasho bɛyi mgbi Ongwummala 2nyɛ lu idzidzɛ angbodzi ingɔfɛ mgbi ogalu nani. Mi ali ayɛ mgbi ekyoo na ekwɔ mgbi oshishe kwodzɛ ele, nli wa owawa ita iwyodefa, di li wa owawa mgban ali ofyia du. Afɛ mgbi ekwɔ na di dzɛ mi ikye ongyɛlu ɛsɛ ootse. 3Ikamba onyi ka dzɛ ogalu na wuba. Itsuutɔ mgbi Imgbasho bɛyi Ongwummala ka dzɛ mi ogalu nani, engbidɔ mgban dika sunun. 4A ka di inɛ mgban, ma iyi mgban ka dɔ ebeshu mgbi ama. 5Otu ka dzɛma wuba. A ka mina osa mgbi ipitila hona mgbi onɔ wuba, ikyesinɛ Otsɛ Imgbasho ka nu ma osa. A dika kyuutɔ nghataa gyegwu. 6Ongyesɔ ma nya ani gbɛɛ, <<Elodzɛ ntonɛ li elodzimɔ di li otsitsi. Otsɛ, Imgbasho mgbi onodzi mgbi ama ogbɛɛsɛ, dɔ ongyesɔ mgban gbɛɛ no kwulu iba tso engbidɔ mgban ungwɔ ama nka kyɔ dzikan-dzikan kyɛmɛ mani.>>
IYesu yɛ kyɛma
7<<Wɛ gbɛɛ, Ani yɛ kyɛma dzikan-dzikan! Ikyese no dzɛ yi inggisɛ ngwu ngyo elodzɛ ama nto afɛ nɛ mani.>>
8Ani, iJɔn, li ani fwo di di ungwɔ ntonɛ aani. Onɔ ngwi ani fwo di di ma ma, ani lakɛ esɛ mi iyayi ongyesɔ ongwu nkye ungwɔ ntonɛ le tso ani ma ikye osunun. 9Nghaduu o nya ani gbɛɛ, <<Ka kyɔ ngha ba! Ani kpaa li ongbidɔ ungwonyi yi abu yi ama ogbɛɛsɛ bɛyi ali inggisɛ ngwu ngyo elodzɛ mgbi afɛ nɛ duu. Sunu Imgbasho yuon!>>
10Nɛ o nya ani gbɛɛ, <<Ka kye elodzɛ ngwi a yegbɔ mi afɛ nɛ nɛ da ba, ikyekyɛ onɔ ma dzɛ kwɛkwɛ. 11Inggisɛ okyɔ obube no kiyayi okyɔ obube, ongwu itukwu le kplɛkplɛ no kiyayi odzɛ yi itukwu kplɛkplɛ. Nghaduu inggisɛ ama okyɔ osuse ka kiyayi okyungwɔ osuse, inggisɛ ndile saan no kiyayi ole saan.>>
12<<Dii, ani yɛ kyɛma dzikan-dzikan! Umba mgbi ani dzɛ yi ani, n dika kye nu ali inggisɛ mi odzɛɛdzɛ ungwɔ ngwi otsungwɔn kyɔ mani. 13Ani li Owita-wita yi Ongyɛɛngyɛ, Ababɔ yi Olɛlɛ, Otiita yi Odondu.
14<<Mse no bɛ ama nkyi salu angwuto mgbi ama, ikyegbɛɛ nu ma wa tu ofɛ ogye ekwɔ mgbi oshishe di tu ofɛ onyɛ mi onufɛ lu ifu ogalu na ewo. 15Ama nto ogalu mi esɛ ma, li obwe yi ama okyɔ obudei yi amah ibwubwe yi ama ogbɔngwɔ inggisɛ yi ama ola angwula bɛyi ama ngwu onya omwaamwa kpa ma di li kyungwɔ ama ntishi ba mani.
16<<Ani, iYesu, dɔ ongyesɔ mgbi ani esɔ ikye okye obwɛndɛ nɛ nu ema mi ikye okwakye mgbi ama onoyɛyɛ. Ani li akpa yi etɔ mgbi iDevedi, di li oshɛbɛ ongwi ikyegbe nani.>>
17Onodzi bɛyi ongyaa ofufɛ gbɛɛ, <<Kwa!>> Ma ali inggisɛ nfwo odzɛ nɛ no gbɛɛ, <<Kwa!>> Ali inggisɛ ngwu ekweni dɔn, no ba; inggisɛ ndi mina, no gbɛ umba mgbi eni oshishe ayayi.
18Ani iJɔn kwo ali inggisɛ nfwo elodzɛ ngwi a yegbɔ mi afɛ nɛ adɔ: Ni inggisɛ ta mbwo ungwɔ mi ele, Imgbasho ka mbwo otsungwɔn isɔ ngwi a lɔ mi afɛ nɛni. 19Ma inggisɛ ta ndi mwa elodzɛ mi afɛ ngwi a yegbɔ nɛ ngwuta, Imgbasho ka kyi kyelu ayɛ umba mgbi ekwɔ mgbi oshishe bɛyi ogalu osaan mgban, ngwi a lɔ ma mi afɛ nɛ mbon.
20Ongwu nkyɔ obwɛndɛ mi ungwɔ ntonɛ ma gbɛɛ, <<Ɛɛn, ani yɛ kyɛma dzikan-dzikan.>> No dzɛ ngha. Ba, Otsɛ iYesu.
21Elela mgbi Otsɛ iYesu no dzɛ yi emi ongwɛ Imgbasho duu.
Currently Selected:
Iba 22: UTR
Highlight
Share
Compare
Copy
Want to have your highlights saved across all your devices? Sign up or sign in
©2024 Initiative for the Translation and Development of African Languages
