Iba 21

IJerosalin ofufɛ

1Ani di di esho ofufɛ yi ɛsɛ ofufɛ, lubana esho ongwi ababɔ bɛyi ɛsɛ ongwi ababɔ nyɛ wa, ekyoo okwukwo kpaa di dzɛma wuba. 2Ani di Ogalu Osaan, iJerosalin ofufɛ nani, tɔ mbi Imgbasho kyɛ esho le ba esɛ, a man dafi ongyaa ofufɛ ngwu meewo sunse saan mi ikye oban mani. 3Man ani fwo ela okwukwo kyɛ mi itsuutɔ na gbɛɛ, <<Onɛnɛ osɔɔsɔ mgbi Imgbasho dzɛ yi inggisɛ, o dika dzɛ yi ama. A ka li emidan, Imgbasho abuon ka dzɛ yi ama dika li Imgbasho mgbi ama. 4O ka kyi fwɔlu ma etse mi inɛ duu. Ikwongye ka dzɛma wuba naadi elela okyɔɔkyɔ hona akwɔ omaama naadi owulu-wulu, ikyesinɛ ungwɔ ama ogbugbe nyɛ wa.>>

5Ongwu nsɔdzɛ itsuutɔ ma gbɛɛ, <<N le nu alungwɔ duu yɛɛ ofufɛ!>> Ta o gbɛɛ, <<Kyi lɔlu ungwɔnɛ wokɛ esɛ, ikyekyɛ elodzɛ ntonɛ li elodzɛ ogbekabyi ele, a di li otsitsi kpaa.>>

6O nya ani gbɛɛ: <<I ngyɛ wa. Ani li Ababɔ yi Olɛlɛ, Owita-wita bɛyi Ongyɛɛngyɛ. Ali inggisɛ ngwu ekweni kwun duu, n ka nun eni mi ibu, eni oshishe non wa ayayi. 7Inggisɛ ngwu ngha yɔ, ka gyokwudɛ ungwɔnɛni, ani ka li Imgbasho mgban o dika li ongwani. 8Kpaa ama omio yi ama onoyɛyɛ ba yi ama ngbe abɔ wo idza yi ama ongwɔ inggisɛ yi ama okyɔ amah yi ama okyɔ obudei yi emi angwula bɛyi ama omwonya duu, imbe mgbi ama ka li mi utɔ ofufu odaka ogbɛ-gbɛ. Nɛnɛ li ikwongye ongwu fan waani.>>

9Nɛ onyi mbi engyesɔ egyafa ama ndzɛ yi uga nmbwo yi isɔ ongwi olɛlɛ egyafa ntona ba wa nya ani gbɛɛ, <<Kwa, n ka tso abu ongyaa ofufɛ, owa Ongwummala mani.>> 10Ta Onodzi kye ani teyi lu mi unggwɔ okwukwo oshigbo, si tso ani Ogalu Osaan, iJerosalin, tɔkyɛ mbi Imgbasho mi esho le ba esɛ. 11I kwɔ yi okwɔkwɔ mgbi Imgbasho, ma okwɔkwɔ mgban dzɛ dafi mgbi ashua owo onbukwɔ, dafi ikwutsɛ onyina-nyina, gbosa saan dafi idzinggi nle dzɛ nyina-nyina mani. 12Dzɛ yi oka ogbagbadzidzi, nshigbo yi onufɛ ogalu nghi iwyodefa, bɛyi engyesɔ iwyodefa le ngyo onufɛ ogalu ntonani. Mi onufɛ ogalu ntona, a lɔ iyi agwɔ mgbi emi iSrai iwyodefa ntonɛ onyonyi mi ali onufɛ duu. 13Onufɛ ogalu li nghi eta mi onosa yi eta mi aca yi eta mi agwudu bɛyi eta mi onɔdɛ. 14Ikpishi mgbi ogalu na dzɛ yi akwutsɛ nghi iwyodefa ngwi a wo itozu mi ele, mi ali ikwutsɛ itozu na, a lɔ iyi mgbi ama ogbikye Ongwummala iwyodefa ntona onyonyi mi ele. 15Ongyesɔ ngbɔdzɛ yi ani ma dzɛ yi agida abashi omba ungwɔ ikye omba ogalu nani, yi onufɛ mgban bɛyi ewishi mgban. 16A mbɛ ogalu na dafi ayɛ enɛ mani, dafi ngwi i tunto ma, li ngha ngwi i tsɛɛ kpaa aali. O mba ogalu yi okwuta na si difwi gbɛɛ di li imai idubu onyi yi ideli enɛ mi unto, i tsɛɛ di shigbo kpaa ngha. 17O kye mbalu ikpishi mgban man i shigbo dafi okwubɔ ideli onyi ngwusefa dɔn enɛ mi ombaamba mgbi inggisɛ owamyɛ, ngwi ongyesɔ na le kyidɔ ele mani. 18A mbɛ ikpishi na gbosa dafi ikwutsɛ onyina-nyina, bɛkɛ yi ogalu abashi kyoon, gbosa dafi idzinggi mani. 19A mɛ ita ikpishi mgbi ogalu na ingwinda yi ali itɔ ikwutsɛ osunse duu. Ita ongwi ababɔ li ikwutsɛ onyina-nyina, ongwu fan li onbyinbyi vluvlu, ongwu ta li onzundzɛ puu, ongwu nɛ li enotse indrakpakpa otsururu, 20ongwu da li akpalɔ opuu, ongwu gyin li akpalɔ ogloglo, ongwu gyafa li indrakpakpa onyina-nyina, ongwu gyata li enotse ama nkwakye nyina-nyina, ongwu gyanɛ li enotse ndigyɔ nyina-nyina, ongwu iwyo li indrakpakpa odzakpakpa, ongwu iwyodonyi li ayakwule onzundzɛ, ongwu iwyodefa li omuma vluvlu. 21A mɛ onufɛ ogalu iwyodefa ntona mi enotse mgbangyilole, ali onufɛ duu a man mi mgbangyilole onyi. A mɛ onɔɔfɛ mi ogalu na mi abashi kyoon, gbosa le dzɛ dafi idzinggi mani.

22Ani di ozu okwukwo osunu Imgbasho onyi mi ogalu na ba, ikyekyɛ Otsɛ Imgbasho onghaangha bɛyi Ongwummala li ozu okwukwo mgban. 23Ogalu na mina onɔ naadi ofyia gbɛɛ no tsɛ hona fyia mi ele ba, lubana okwɔkwɔ mgbi Imgbasho li nun osa, Ongwummala di li ipitila mgban. 24Ɛsɛ ka kyikyɛ mi osa mgban, utɔ emi ɛsɛ dika gbe okwɔkwɔ mgbi ama ba ele. 25Egbe onyi kpaa a ka yile onufɛ ogalu mgban tukwu ba, ikyekyɛ otu ka dzɛ imbe na ba. 26Ɛsɛ duu ka gbe okwɔkwɔ yi mmwɛ mgbi ama ba ele. 27Akponyi kpaa ungwɔ okpɛkpɛ ka kaka ele naadi inggisɛ nkyungwɔ ayiwi hona ungwɔ onya ba. Nghaduu li ama a lɔ ma iyi mi afɛ oshishe mgbi Ongwummala ma ta ka kaka ele.

Currently Selected:

Iba 21: UTR

Highlight

Compare

Copy