رَسولون اَعمال 27
27
پولوس، رومی را بَشی
1وَقتی اَپیشون بَه کن اَمه دَیرا راه نَه ایتالیا را بِشَم، پولوس و بَعضی دیَرَ زیندانیون ایلَه افسَری یولیوس نوم تحویل داشون. یولیوس، رومی ایمپراطوری گوردانی کا بَه. 2پس کَشتی ایکا کن شهر اَدرامیتینوسیکا آمَه بَه و وِلَته آسیا کا بَندَرونرا اَشیَه، دَنِشتیمون و رونَه بیمون. آریستاخوسِ مَقدونی نی، کن تَسالونیکی آدَمونکا بَه، اَمَنَه دَرِ بَه.
3اَ روجی سَوسَه شهر صِیدونیرا آرَستیمون و یولیوس پولوسی لُطف کَردِش، و ایجازَ آداشَه اِشتَن رَفِقون وَر بِشو تا چَی نیازون چَیرا ویگِرِن. 4اَ جِگاکا هَنی دَیرا راه نَه رَونَه بیمون ولی برعَسکَه وا خونِه، مجبور آبیمون قِپرِسی اَطَرَفیکا کن برعَسکَه وا نِبَه، بشَم. 5کیلیکیَه و پامفیلیَه بَندَرونکا دَیوَردِ بَه دوملَه، میرا بَندَریکا، کن لیکیَه منطقَکا بَه، ویرمیمون. 6اَ جِگاکا رومیَه اَفسر، کَشتیی پَیدا کَردِش کن اِسکَندَریَکا ایتالیا را اَشیَه، و اَمَش چَی سَریکا دَنِشامونیشَه. 7چَن روجی یَواشَلِه نار شیمون و سَختینَه کنیدوسیرا آرَستیمون. اِمی خونِه کن برعَسکَه وا بَه مجبور آبیمون اِشتَن مسیری عَوَض آکرَم، و کرتی جزیرَ طَفیرا کن وا نِبَه بشَم، و تا شهرِ سالمونی ناریرا، نار شیمون. 8چَتین دَیرا کَناری وَریکا دَیوَردیمون و جِگایی ایرا کن بَی ’قشنگَ بندَرِن‘ اَواجینَه، آرَستیمون کن شهرِ لاسائیَه کا نِزِک بَه.
9اِمی خونه کن وِرَ زَمانی هیچ برشَه بَه، ایسَه دَیرا نَه سَفر کَردِ خطر ناک بَه، و اَ روجِنی کن روجَه اَگِرینَه دَیوردَ به، اِمی خاطِر، پولوس اَیِنِش نَصیحَت کردَ و واتِش: 10«سَروَرِن، بَشامَه ویندِ کن پُر خَطَرَ سَفری بَداشتیمون و وِرَ ضَرَری نِه تاکَه کَشتی و چَی باری بَژَی، بَلکَم چَمَه جان نی خَطَریکارَ.» 11اَمّا رومیَه افسر، کَشتی ناخدا و صاحیبی ویشتَر گوش اَکَریَه تا پولوسی گَفون. 12چون اَ بَندَر زِمِستونی گِذِرامونیِه را چاک نِبَه، ویشتَریین تصمیم گَتِشون کن اِم سَفَری ایدامَه بِدَرَم، اِم اُمیدینَه کن فینیکسی بَندَریرا آرَسَم و زِمِستونی اَجِگاکا بِومونم. اِم بَندَر کَرتیکا و جنوب غَربی طَرَف بَه.
دَیرا کولَک
13وَقتی جِنوبیَه وا یَواشَلِه راست آبَه، گَمون اَکَرینَه کن اِشتَن مقصَدی آرَستین؛ پس لَنگَری پِراکِنیشون و کَرتی راستَه، دَیرا کَناری نِزِک، اِشتَن راه ایدامَه آداشون. 14ولی چیی دَنِه کَشیستَه کن تِندَ وایی، کن بَی شُمالِه شَرقیَه وا اَواجین، جَزیرَ طَرَفیکا چَمَه سَمت آمَه. 15کَشتی کولَکیکا ویلاخیستَه و نِشاستِش، وا خَلاف نار بِشو؛ اِمی خاطِر، بَشتَن وا دَست آدامون و وا نَه شیمون. 16گِچَه جَزیرَه ایی کن کُدا نوم داری پِشتیکا پناه گَتمون و خَیلی چَتین بَشتِنمون گِچَه لاتیکَه ایی کن کَشتی پِشتیکا بَه، آراستِنِستِمون. 17وقتی ملوانن لاتکَه کَشتی عَرشَه سَر وَردِشون، لافِندونَّه، کَشتی دووری محکم دَبَستِشون تا مَویرَنجنی، وکَشتی سیرتیسی شِنزاریکا نشتِه تَرسیرا، لَنگَرون بِنیرا آداشون و کشتی وا مَسیرکا آهَشتِشون. 18اِمی خونِه کن کولَک سَنگینَه ضَربَه اِنی اَمه اَژَنیَه، سَو سَرا مَجبور بینَه کَشتی باری دَیرا کا ویکَرِن. 19سِوومَه روجیکا، اِشتَن بالینَه کَشتی اَساسون دَیرا کا ویکَردِشون. 20روجِن هِنتَه اَگذِریَه و اَمه آختاو و اِستَرَ اون رَنگی نَوینیمون و کولَک نی نِه ویکِشته، اَدَ کن اَمه گِرد، وازنِستِرا اُمیدی نِداریمون.
21چون خَیلی وقت بَه غذا هَردشون نِبه، پولوس چَوون دِلَکا پامَندَ و واتِش: «اَی مِردِن، شِمَه پی چمن گَفون قِبول اَکَریرون و کَرتیکا نَشیرون تا اِم هَمَه و ضَرَر نِوینَه. 22ایسَه نی شِمَه تشویق بَکمه دلی زبق غَم برَ، اِمی خونِه کن بَشِمَه چیی ایی نیَب؛ فقط کَشتی نیفیت آرَبن. 23چون ایزِرَ شَویرا خدا ایلَه فرشتَه کن اَز چَی شِنیمَه و بَی خیدمَت بَکَم، چمن وَریکا مَندَ 24و واتِش: ”پولوس مَتَرس. تِه پی مُحاکیمَرا، ایمپراطوری ناریکا حاضیر آبی، یَقین بزون کن خدا گِردِ اِشتِه هَمسَفرون جانی، بَتِه بَخشِستَشَه.“ 25پس اَی مِردِن، دِلی زِبق غَم بَرَ، چون خدا کا ایمان دارِم کن هَتَه کن بَمن واتَشَه، یقین هَتَه آرَبن. 26ولی چَمَه کَشتی پی جَزیرَه ایکا گیلی سَر بِنِشِه.» 27چاردَ هومین شَویکا، هَنوزَنی وا اَمَش آدریاتیکی دَیرا کا اِم وَر اَ وَر اَبَریَه کن نیمَه شَوَی نِزِک، مَلَوانِن گَمون اَکَرینَه خِشکی نِزِک بَبین. 28پس آوی دول گیری اَندازَ ژِشون و فَهمِستِشون چِل مِترَ. تَلَکَه ایی به دوملَه، ایکَرَ دییَر آوی دول گیری اَندازَ گَتِشون و ویندِشون سی مترَ. 29و اِمی خونِه کن اَتَرسینَه کازَ مَغاری بِگِنَم، چار گِلَه لنگر کَشتی پِشتیکا ویداشتِشون، و دِوا اَکَرینَه زو روج آبو. 30مَلَوانِن کن اَپیشون بَه کَشتیکا بیوریجِن، اِم رِقینَه کن اَپیشونَه کَشتی ناریکا چَن گِلَه لَنگر دَیراکا ویدارِن، اَ گِچه لاتیکَه دَریاکا ویرَفندِشون. 31پولوس افسَر و سَربازون واتِشَه: «اَکَم اِم مِردِن کَشتیکا نِمونِن، نینَّشا بَروَشتِه.» 32پس سَربازِن لافِندونی کن لاتیکه غَم هَرینَه آبیردِشون و لاتکَشون وَر آدوعَه.
33تَلَکَه ایی مَندَ بَه آختاو پِرا، پولوس گِردیش تشویق کردَ چیی ایی بَرِن، و واتِش: «اُمروج چاردَ روجُه کن اینتِظاریکاینَه، و چیی ایی نَردِرون و بی غَذا مَندَرون. 34پس خاشتو خازِمَه غَذایی بَرَ، چون بَشِمَه قِوَت دَرِ. اِمی خونه کن شِمَه هیچ کِرَمی کَلَّه کا، ایی تا مو کَم آنیَبن.» 35وَقتی پولوس اِمِش واتَه، نونی پِگَتِش گِردی ناریکا خدا شِکر کَردِش و نونی پِزارنِستِش، و هَردِشون. 36گِرد دلگرم آبین و غذا هَردِشون. 37کَشتیکا، اَمه گِرد دِویستو هَفتادو شَش نَفَر بیمون. 38وقتی اَیِن غَذاشون هردَ و سیر آبین، قَلَه بَقیَه دَیراکا ویکَردِشون و کَشتیشون سبِک آکردَ.
39وقتی روج آبَه، خِشکی نِه آزنِستِشون، اَمّا گِچَه خَلیجی کن چَی ساحل فوشینَه پتلمَه بَه ویندِشون. پس اَپیشون بَه کن اَگَم ببو کَشتی اَجِگاکا گیلی سَر بِنشامونِن. 40پس لَنگَرون لافِندی آبیردِشون و اوون دَیرا دِلَرا وَر آداشون و لافِندِنی کن سوکانی غَم هَرینَه آج آکَردِشون. چَی بَه دوملَه، کَشتی ناری بادبانون، وا مَسیری طَرَف پِرا کِنیشونَه و ساحِلی طَرَف شین. 41ولی کشتی، آوی بِنی ایلَه کولَه اون گِنَه و گیلی سَر نِشتَه. کَشتی نار دَمَندَ و بی حَرَکَت مَندَ، اَمّا کَشتی پِشت موجون ضَربَه خونِه ویرَنجَنیستَه.
42سربازِن اَپیشون به زیندانیون بِکِشِن تا نِکَرِ کَسی سیناوینَه بَروَزِ. 43ولی رومیَه افسر کن اَپیش بَه پولوسی جانی بَروازونِه، چَوون ناری گَتِشَه، و فِرمون آداشَه اَوَل اَیِنی کن بَشان سیناو کَردِ، اِشتَن دَیرا دِلَه بَرَفَنِن و خِشکیرا آرَسونِن. 44بَقیَه نی پی اِشتَن اَلوارون یا کَشتی پِسَه اون سَر، بَشتَن خِشکیرا آرَسونِن. اِنتَرَکِه گِرد سَقه جان خِشکیرا آرَستینَه.
Currently Selected:
رَسولون اَعمال 27: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
