رَسولون اَعمال 26
26
پولوسی دفاع آگْریپاسی ناری کا
1آگْریپاس پادیشا پولوسیش واتَه: «ایجازَر هِستَه بَشتَنکا دیفا کردِ خونه گَف بِژَنی.»
اَموقه پولوس اِشتَن بالی راست آکَردِشَه و بَشتنکا دیفا کردِ خونِه اِنتَرَ دمندَ گَف ژِ: 2«اَی آگْریپاسِ پادیشا، اَز بَشتَن بَرک خَسمَند بَموستیم کن اُومروج شِمَه حِضوریکا پامَندیم، تا یَهودیون گِردِ شَکایَتون ناریکا، بَشتنکا دیفا بِکَم. 3بخصوص اِمکن بَموستیم شِمَه یَهودیون رَسمونَّه و چَوون ایختلافونَّه کامیلَا آشنایی دارَ. ایسَه، خاشتوخازِمَه صَبرینَه چمن گَفون گوش آکَرَ.
4«یَهودیِن گِرد چمن زندَگی جَوانگیریکا بَموستین، هَه اَوَلیکا کن اِشتَن قامی دِلَکا و اورشَلیمیکا زندَگی اَکَریم. 5اَیِن قَبَلَنَه کا خَبر دارین و اَگَم بِخان، بَشانَه شاهیدی بِدَرن کن اَز ایلَه فَریسی بیمَه واِشتَن دینی سَختگیرترین فِرقَکا پیرَوی اَکَریم. 6و اُمروج، اَ اومیدی خونه کن خدا چَمَه بابا اِنِش وعدَ آدوعَیَه مُحاکیمَه بَبیم. 7اِم هَه وَعدَ اییَه کن چَمَه دانزَ قام اِشتَن صِدقِه دِلینَه، شَو و روج چَی بِدَست وَردِ اُومیدیکا پرستش بَکَن. اَی پادیشا هِم اومید داشتِه خونه اَ کن یهَودییِن بَمن موتَّهَم بَکَن. 8چیرا شِمَرا کن اِم جِگاکا مَندینَه، عجیب بومَی کن خدا مَردَ اون زِندَ آکَرِ؟
9«مِرا نی یَقین بَه کن پی هر کاری عیسای ناصری زِرَبَرا اَنجوم بدَرِم و کوتاهی نِکَرم. 10و اِم دِرِست هَه کاری بَه کن اورشَلیمیکا اَکَریم. اَز سَران کاهِنون کا ایختیار ویگَتِم و خَیلی موقدسون زیندانیکا دَرَفَندِم، و وَقتی مَرگیرا مَحکوم آبینَه، چَوون زِرَبَرا رای اَدَریم. 11چَندین کَرَ چَوون مُجازات کَردِرا، عیبادَتگا ایکا دییَرَ عیبادَتگا ایرا اَشیمَه و تَقلا اَکَریمَه و اَوون دیم پِرَنَریم تا کِفر بِواجِن. چمن غَضَّب چَوونرا اَدَ وِر بَه کن حتی تا دورَ شَهرونرا چَوون دوملَه اَشیمَه.
12«ایلَه اِم سَفَرونکا، کامیلَه زاکینینَه کن سَران کاهِنونکا ویگَتَم بَه، کایبیم شهر دَمِشقیرا شِه. 13اَی پادیشا، آختاو ویگِنی موقِه، رادِلَکا ایکَرَایی نوری کن آختاوی نوریکا ویشتَر بَه، آستامونیکا چمن و چمن هَمراهوون دوور شپَق ژِشَه. 14وقتی گِرد زَمینی سَر بَرگِنِستیمون، اَز سَسی دَرَستِم کن عِبرانیون زَبانینَه بَمن اَواجی: ”شائول، شائول، چیرا بَمن اَیذَت آزار بَکَش؟ تِرا چَتینَه کن مِخون سَردِرِ پا بِژَنی، تاکَه بَشتن اَیذَت بَکَش!
15«دَپَرسِستیم: ”خِداَوندا تِه کیشَه؟ “
«خداوند واتِش: ”اَز هَه عیسا ایمَه کن تِه بَی اَیذَت آزار بَکَشَه. 16پِب و اِشتَن لِنگون سَر پا بِمون. اَز اِمی خاطر تِرا اَیر آبیمَه تا بَتِه اِشتَن پاسَری و شاهید آکَم، تا اَ چیی ایی دِلَکا کن بَمن ویندَرَ و اَچی ایی را کن تِرا اَیر آبیمه، شاهیدی بِدَری. 17اَز بَتِه اِشتِه قامی بالیکا و غَیرِ یَهودیون بالیکا کن بَتِه چَوون وَر رَونَه بَکَم بَراخِمونِستیم. 18تا چَوون چَمون آج آکَری، اَتَه کن ظِلَماتیکا نوریرا، و شَیطونی اینجاریکا خدا طَرَف آگَردِن، تا چَوون گِناخِن بخشیدَ آبو، و اَ ایمانی خونه کن بَمنکا بَداشتین، اَیِنی دلَکا کن موقدَّس آبَه اینَه، جِگا ایی بدارِن.”
19«پس اَی آگِریپاس پادیشا، اَموقه اَز، اَ آستامونیَه رویا کا کن ویندِم، نافِرمونی نِکَردِمَه. 20بَسکَم اَوَل دَمِشقیون دِلَکا، چَی بَه دوملَه اورشَلیمیکا و گِردِ یهودی وِلَتیکا، و هِنتَه غَیر یَهودیون دِلَکا اِم پَیغومی اِییلام کَردِمَه کن پی توبَه بِکَن و خدا طرَف آگَردِن و اِشتَن رفتارینَه آمونن کن توبَشون کردیَه. 21اِمی خونِه بَه کن یَهودییِن بَمن معبَدیکا ویلاخِنیشونَه و اَپیشون بَه بَمن بِکِشن. 22ولی تا اُمروج، خدا مِرا آرَستَه یَه و ایسَه اِم جِگاکا پامَندیمَه و گِردی، گِچ و یالیکا، کام شاهیدی دوعِه. چیی ایی کن باتیم چیی ایی غَیراَز موسی و پَیغَمبرون واتَه گَف کن پی اَنجوم ببو، نییَه: 23اِمکن مَسیح پی رَنج بِکَشِه و اَوَلین کَسی ببو کن مَردَاونکا زندَ آبو، تا نوری، اِم قام و دییَرَقامون دِلَکا اییلام بکَرِ.»
24وَقتی پولوس اِم گَفونَّه بَشتَنکا دیفا اَکَری، فِستوس لَسَّه ژِشَه: «پولوس، اِشتَن عَقلی هیچ آکردَرَ! وِرَ زونِستِه، بَتِه تور آکَردَشَه.»
25ولی پولوس جواب آداشَه: «عالیجناب فِستوس، اَز تور نیم، بَسکَم عقلینَه حَییقتی کا باتیم. 26اِمی خونه کن پادیشا اِشتَن، اِم چییون بَموستی و اَز نی جورئَتینَه بَینَه گَف بَژَم، چون یَقین بَموستیم هیچ کِرَم اِمِن چَی نَظَریکا دور مَندَ نیَه، چون چییی ایی نِبَه کن خَلَوتیکا ایتفاق دَگِنِستَه ببو. 27اَی آگْریپاسِ پادیشا تِه بَه پَیغمبَرِن ایتقاد بَداشتیشَه؟ بَموستیم کن هِستِرَ.»
28آگْریپاس، پولوسیش واتَه: «بَه هِم زودی اَپیرَ بَمن قانع آکَری کن مسیحی آبوم؟»
29پولوس جوابیکا واتِش: «خداکا اَپیمَه کن زو یا عَری نِه تاکَه شِمَه، بَلکَم گِردِ اَیِنی کن اُمروج بَمن گوش بَدان، چمن شیوار آبون، اَلبت نِه زِنجیلیکا!»
30چَی به دوملَه پادیشا راست آمَندَ و بَینَه فرماندار و بِرنیکی و بَقیَه اِ مَجلِسیِ آدَمِن راست آمَندین، 31و هِنتَه کن گَفَه ژِنَه اَکَرین بِرنیرا شین، و یَندِ اَواجینَه: «اِم مِرد هیچ کاریش کَردَ نیَه کن چَی سِزا مَردِ یا زیندان ببو.»
32آگریپاس فِستوسیش واتَه: «اَگَم اِم مِرد اَپیش نِبَه کن ایمپراطوری مَحکَمکا اِم مَسئَلَه خونه رسیدَگی ببو، هِم ایسَه بیستِه اَی آزاد آکَردِ.»
Currently Selected:
رَسولون اَعمال 26: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
