اوّلین نامَه قورَنتیانیرا 4
4
رسولون خیدمت
1پس گِرد، پی اَمه هنته مسیح پاسَرییِن و دَستَکونی شیوار کن خدا رازِن، اَیِنِشون اَمانت دوعَیَه، دَیسِن. 2غَیرَاَز اِم، دَستَکیکا اینتظارِشونَه کن وفادار ببو. 3ولی مِرا دِ شِمَه قیضاوت کَردِ یا هر دییَرَ اینسانیَه محکمه کا قیضاوت، موهیم نیَه. بَسکم اَز حتی اِشتَنرا نی قیضاوت نِمَکرد. 4اِمی خاطر کن خبَرِم نییَه چِه چیی ایی چمن زِرَبرایَه و اِم بَمن تبرئَه نییَکرد. بَسکم خداوندَ کن چمن سَردِرِ قیضاوت بَکَی. 5پس هیچ چیی خونه، چَی وقتی بَه نَه قیضاوت مَکَرَ، تا اِمکن خداوند با. اَ خداوندی کن اَچیی ایی کن ایسَه ظلَماتیکا جیخِتَه یَه، رِشونیکا اَیر آرَکَرد و دِلی نیَّتون دیار آرَکَرد. اَموقه هر کَمی اِشتَن تَرییفی، خِداکا ویرَگَت.
6برااِن، اَز اِم گفون گردی، اِشتَن خونه و آپولوسی خونه، شمه خیر و صلاح خاطر واتم تا شمَه اَمَکا اِم گَفون مَعنی آموج بیگِرَ کن: «اَ چیی ایکا کن نوشتَه آبَه یَه، کفاتر مشَه.» تا هیچ کِرَم شِمَکا دییَری سَردِرِ، پوز نِدَرِ. 7اِمی خونه کن، کی بَتِه، ایی جور دییَر کا ویندِ؟ چِرهِستَه، کن بَتِه بَخشِستَشون نیه؟ پس اَگَم بتِشون بَخشِستَه یَه، پس چیرا هنته ایفتخار بَکَشه کن اینگار اِنتَرَ نی؟
8اینگار کن شِمَه هَر چیی ایی کن اَپیرون بَه، آرَستَه ایرون! اینگار کن هم ایسَه پولدار آبَه ایرون! و پادشاهی بَکَرون، اَ نی بی چَمه! و کاش کن واقییَن پادیشاهی اَکَریرون تا اَمه نی شِمَنه پادیشاهی اَکَریمون! 9چون اَز اِم فکریکام کن خدا اَمه رسولِنِش گِردیکا بَه آخیر، هنتَه اَیِنی کن مَردِرا محکوم بَه اینَه، تَمشا دوعه خونه را نوعَشَه. چون کن اَمه دنیارا، فرشتَه اونرا، تَمشا خانه آبَه ایمون. 10اَمه مَسیح خونه نادانیمون، ولی شمَه مَسیح دِلَکا حیکیمیرون! اَمه عِجِزیمون، اَمّا شمَه قودوریرون! اَمه گِچیمون، ولی شمه حورمت بداشتیرون! 11اَمه تا هِم ایسَه اَنشتا و تِشیمونه، و اَمه گیدَلیون شِندِری دَکَردَمون. لِسِمون هردیَه و آوارَ ایمون. 12اِشتَن بالینَه کار بَکَمون زَمَت بَکَشتیمون. اَگَم اَمه نفرین بِکَن، چَوونرا خَیرَ دِوا بَکمون؛ و اَگَم اَیذَت آزار بکَن، تاو بوعَردیمون؛ 13وقتی اَمه ایتهام بَژَن، چاکینه جواب بَدامون. هِم تا ایسَه، اَمه دِنیا تِفالَه و هَمَه چییون، اَشغال آبَه ایمون.
14اِمی شِمَه شَرمندَ کَردِ خونه نِمَنوشت، بَسکم اِمی خونه کن بَشِمَه هنته، چمن خاجَتییَه خِردَنون شیوار نصیحَت بکَم، بَنوشتیم. 15چون حتی اَگَم مسیح دِلَکا هَزار گِلَه موعَلیم نی بِدارَ، ولی وِرَ دَدَرون نییَه، اِمی خونه کن اَز مَسیح عیسی دِلَکا، اِنجیلی واسیطَنه شِمَه دَدَ آبیم. 16پس شمَکا خاشتو خازِمه کن بَمنکا سرمشق بیگِرَ. 17اِمی خاطر، چمن خاجَتیَه بَله تیموتائوسی کن خداوندی دلَکا وفادارَشِمَه وَر رَونَه بَکم. اَ چمن زندَگی کَردِ راههون مسیح عیسی دِلَکا، هَتَه کن اَز گِردِ کلیسا اونکا اَ راهون آموج اَدَریمه، شِمَه گِردیرا یاد آرَفند.
18بعضی شِمَکا اِم گَمونیَنه کن اَز دِ شِمَه وَر نیام، یالَه نار آبَه اینَه. 19ولی اَگَم خدا بِپیا هِم زودییِن شِمَه وَر آم و سَر آمَگِنِست کن اِم یالَه نارِن تاکَه گَف ژَشونَه یا اِم کن چَی اینجاری نی بَداشتین. 20اِمی خونه کن خدا پادیشاهی، گَفینه نیَه بَسکم اینجاریکارَ. 21کِرَم گِلَه بَپیرون؟ چوو نَه شِمَه وَر بام یا موحبتو و آلاویستَه روح نَه؟
Currently Selected:
اوّلین نامَه قورَنتیانیرا 4: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
