Pahayag 8

U Kapitto a Selyo

1Nadid, nikuna a ibutan nu Tupa u kapitto a selyo ay awan ti hehaw ti langet tu alay nu kahalate a odas. 2Káttapos ay netan ko u pitto a anghel a mágtaknág tu atubang nu Diyos. Sakay u balang essa nide ay inatádden ti trumpeta.

3Sakay te essa pa a anghel u dummemát sakay angay timmaknág tu atubang nu altar. Te tatawed siya a ginto a malukung a págtutudan ti insenso. Inatádden siya ti makpal a insenso para iyalay tu ginto a altar tu atubang nu trono, kaguman nu dasal nu atanan a pinile nu Diyos. 4U asok a gábwat tu págtutudan ti insenso a táttawidan nu anghel ay immontok a patamo tu atubang nu Diyos, kasabay nu dasal nu pinile hide nu Diyos. 5Káttapos ay nangalap u anghel ti genggeng tu altar sakay indátton na tu págtutudan ti insenso, tulos na a imbudas tu luta. Pagdaka a nagkádduh, te galungogung, nagkilat, sakay naglinog.

U Pitto a Trumpeta

6Nadid, himmanda dán u pitto a anghel para patánnugán u trumpeta de hide.

7Nikuna patánnugán nu purumero a anghel u trumpeta na ay naguden tu luta ti iyelo sakay apoy a te kahalo a dige. Kaya natutod u katállo a parte ni lutaáy, u katállo a parte nu kakayowan, sakay u atanan a lamon.

8Nikuna a patánnugán nu kaduwwa a anghel u trumpeta na ay timmáppel tu diget u kumán a dakál a buked a magapoy-apoy, kaya u katállo a parte nu diget ay nagin dige. 9Sakay minágkatay u katállo a parte nu tehhod hide a biyag a katoy hod, sakay minágkasida u katállo a parte nu atanan a kalase a barko a katoy tu diget.

10Nikuna a patánnugán nu katállo a anghel u trumpeta na ay natákneg u tunay ti kadakál a biton ti langet a mágganga-gangat a kumán a simbuwan, sakay timmáppel tu katállo a parte nu konayan hide sakay tu bukal hide. 11U ngahan ni bitonan itod ay tuble. U katállo a parte nu dinom ay nadáttonan ti tuble kanya makpal a nágkatay a tolay nikuna mainom di itod.

12Nikuna patánnugán nu kaáppat a anghel u trumpeta na ay nasida u katállo a parte nu aldew, bulan, sakay u biton hide, kaya nawan u katállo a parte a demlag de. Dinumiham u katállo a parte nu aldew, sakay konna bi hod u katállo a parte nu gibi.

13Káttapos ni itod ay naketaák ti agila a magegbáh tu kalawakan sakay nasaneg ko a makán pákhawán, “Makaánteng i mangyariyay tu katoy hide ti munduway, ni patánnugán dán nu tállo pa a anghel u trumpeta de hide!”

Currently Selected:

Pahayag 8: MBJC

Highlight

Copy

Compare