Pahayag 7

U 144,000 a Tinatakan ti Israel

1Káttapos ni iye ay netan ko u áppat a anghel a mágtaknág tu áppat a suluk ni munduway. Pugáddán de u pahás, tánni awan ti bumugso ti lutaáy, tu diget, oni tu ánya man a kayo. 2Sakay naketaák ti essa pa a anghel a naggábwat ti sikatan, tawed na u págmarka nu Diyos a biyag. Pinákhawan na u áppat a anghel a inatádden nu Diyos ti kapangyariyan a mangsida tu luta ay tu diget. 3Kinagi na, “Dyan moy palla sidaán u luta, u diget, sakay u kakayowan. Mentaras awan tam palla namarkaan u kidáp nu tagapagserbi hide nu Diyos.” 4Sakay nasaneg ko u bilang nu namarkaan-144,000 a gábwat tu sapulo ay ti duwwa a lahe ni Israel:

5tu lahe ni Juda ay 12,000, tu lahe ni Ruben ay 12,000, tu lahe ni Gad ay 12,000, 6tu lahe ni Aser ay 12,000, tu lahe ni Neftali ay 12,000, tu lahe ni Manases ay 12,000,

7tu lahe ni Simeon ay 12,000, tu lahe ni Levi ay 12,000, tu lahe ni Isacar ay 12,000,

8tu lahe ni Zabulon ay 12,000, tu lahe ni Jose ay 12,000, tu lahe ni Benjamin ay 12,000.

U Nagtagumpay hide tu Atanan nu Bansa

9Káttapos ni iye ay netan ko u tunay ti kakpal a tolay a maskin deya ay awan ti makabilang! Gábwat hide tu bawat bansa, lahe, banuwan, sakay bawat upos. Mágtaknág hide tu atubang nu trono sakay nu Tupa, a nakabadu ti mapudew sakay te táttawed a palaspas. 10Sakay kinagi de ti mabegsák, “U kaligtasan ay gábwat tu Diyos tam a mággetnod ti trono we, sakay konna bi hod tu Tupa!” 11Timmaknág u atanan a anghel tu palebut nu trono sakay u tagapangasiwa hide pate u áppat a linalang a biyag. Dummapa hide tu atubang nu trono sakay summamba tu Diyos. 12Kinagi de, “Amen! U Diyos tam ay karapat-dapat a puriyán, sambaán, pasalamatan sakay parangalan. Hod nikuna u kadakilaan, karunungan, kapangyariyan, sakay begsák. Puriyán siya hanggan-hanggan! Amen!”

13Tinanungák nu essa tu tagapangasiwa hide, “Deya i nakabaduwe hide ti mapudew, sakay hádya hide a naggábwat?” 14Timmábbegák, “Awan ku ben tukoy. Hiko i makatukuyay.” Kaya kinagi na nikán, “Hide u nagtagumpay tu mahigpit a hirap. Mapudew dán nadid u badu de kumán a linabaan tu dige nu Tupa. 15Kaya ina i dahilanay ni bakin katoy hide tu atubang nu trono nu Diyos, para magserbi nikuna aldew ay ti gibi tu templo. Sakay u mággetnod tu trono u magalaga nide. 16Awan dán hide magala-aláp oni mauwa-uwaw; awan dán hide makagkag tu aldew oni mapase tu ánya man a matindi a init. 17Dipo u Tupa a katoy tu bállog nu trono u magin tagapag-alaga de. Iyangay na hide tu bukal a makapangatád ti biyag; sakay pahidán nu Diyos u luwa tu mata de, dipo awan dán ti dahilan para malungkut hide.”

Currently Selected:

Pahayag 7: MBJC

Highlight

Copy

Compare