Filemon 1

1Iye a sulat ay gábwat nikán a ti Pablo, a pumáppireso dipo tu pángpakapospos ko tu Panginoon tam a ti Jesu-Cristo. U kapátkákka tam a ti Timoteo u kaguman ku he. I sulat miyan iye ay para niko, Filemon, a mahal mi a kaguman tu gawain nu Panginoon. 2I sulatan iye ay para be tu kapatkákka tam a babbey a ti Apia, sakay ti Arquipo a kapareho tam a sundalo ni Cristo, Sakay para be tu mánnampalataya hide a mágsimba tu bilay mo.#1:2 Basaán tu Colosas 4:17. 3Pagpalaán kam nakwa sakay atádden nu Diyos a Ama tam sakay nu Panginoon tam a ti Jesu-Cristo ti kapayapaan.#1:3 Basaán tu Roma 1:7.

U Págmahal sakay Pánniwala ni Filemon

4Pirmiyák a magpasalamat tu Diyos kada ipagdasal taka,#1:4 Basaán tu Roma 1:8. 5dipo nabaheta ko a dakál u págmahal mo tu atanan a mánnampalataya hide, sakay nanalig ka ti husto tu Panginoon Jesus. 6I dasal ku la a mas lalo mu pa a ipakapospos tu agum u pánnampalataya mo. Tánni lumagu u pang-unawa mo tu atanan a mágkaganda a bagay a neatád nikitam dipo he nikitam ti Cristo. 7Dipo tu págmahal mo, kapatkákka a Filemon, ay nasayaák sakay napabegsákkák. Dipo be niko ay napabegsák u mánnampalataya hide.

U Pákkekakagbi ni Pablo ni Filemon

8Nadid, bilang apostol ni Cristo, ay maare taka a utusan tu dapat mo a gimitán; 9pero dipo mahal taka bilang kapátkákka ko, kaya mákkekakagbiyák dálla niko. Hikán ti Pablo, a matanda dan sakay nadid ay pumáppireso pa dipo ni Cristo Jesus. 10Mákpágguhunák niko para tu anak ko a ti Onesimo, siya u nagin anak ko ti pánnampalataya mentaras a hedák ti piresuwanáy.#1:10 Basaán tu Colosas 4:9. 11Tu itod ay awan ka ti pakinabang nikuna, pero nadid ay dakál dán u metulung na nikita a duwwa.

12Pasoliyán ku dán niko ti Onesimo, maski ni ikalungkut ku iye ti husto a kumán a u ipatawed ko niko ay i puso kuwáy. 13Gusto ko nakwa a mágyan pala siya nikán, mentaras a pumáppiresuwák dipo tu Maganda a Baheta. Tánni tu pamamag-itan ni Onesimo ay makatulung ka nikán. 14Pero awan ko itod gimitán ni awan ka ti pahintulut, dipo u gustu ko ay u kusang-luub a págtulung mo nikán bakán a napilitan kala.

15Palagay ko nehiwalay niko ti Onesimo ti sabadit a panahun tánni tu kássole na hina niko, ay makaguman mo dán siya hanggan-hanggan. 16Bakán dán a alipin nan essa dán a pinakamamahal a kapatkákka. Nepamahal dán siya nikán, pero mas lalo dán niko, bakán la a essa alipin nan kapatkákka mupa tu Panginoon.

17Kaya ni talaga a inturingák mo a tunay mo a kaguman tu págserbi, ay tanggapán mo ti Onesimo a konna tu págtanggap mo nikán. 18Ni tehhod siya a ginimet a madukás niko oni te utang siya, ay singihán mu dálla nikán. 19Hikán a ti Pablo i nángsulatay he, hikán i mangbayaday tu ányaman a utang ni Onesimo niko. Pero ni tuusán ay utang mu be nikán u pákkatenggi mo ni Cristo. 20Kaya kapátkákka, pagustuwanák mu pay ti kagiyán kuwáy alang-alang tu Panginoon. Pasayaánnák pay bilang kapatkákka mo ni Cristo.

21Nagsulaták niko dipo te tiwalaák a pagustuwanák mo ti kagiyán kuwáy. Tukoy ko a mas pa u gimitán mo nan tu impákkekagbi ko. 22Sakay pánghandaák mo be ti tulusan ko dipo umasaák a sanigan nu Diyos u dasal mo a makasoliyák hina para bisitaán taka.

U Pangdimodyan a Pákkumusta

23Kumusta kan, kagi ni Epafras a kaguman ko a pumáppireso dipo ni Jesu-Cristo.#1:23 Basaán tu Colosas 1:7; 4:12. 24Mákkumusta be di Markos, Aristarco, Demas sakay ti Lukas a kaguman ko tu gawain.#1:24 Basaán tu Gimet 12:12, 25, 13:13, 15:37-39; Colosas 14:10, 14; Gimet 19:29, 27:2, Colosas 4:10, 14; 2 Timoteo 4:10, 11.

25Págpalaán kam nakwa nu Panginoon tam a ti Jesu-Cristo.

Currently Selected:

Filemon 1: MBJC

Highlight

Compare

Copy