Hebreo 1
1
Nagupos u Diyos tu Pamamag-itan nu Anak na
1Tu itod a panahun ay nákpágguhon u Diyos tu ninuno tam hide tu iba-iba a pagkakataun sakay iba-iba a paraan tu pamamag-itan nu prupeta hide. 2Pero nadid a dimodyan a aldew, ay nákpágguhon siya nikitam tu pamamag-itan nu Anak na a tagapagmana tu atanan a bagay. Sakay tu pamamag-itan na ay ginimet nu Diyos u buo a mundu sakay tu atanan a katoy he. 3U Anak u mángpeta tu kaluwalhatian nu Diyos. Dipo ni ánya u Diyos ay konna bihod u Anak. Siya u mangalaga tu buu a mundu tu pamamag-itan nu upos na a makapangyariyan. Káttapos na a linisan u kasalanan tam hide, ay simmole siya ti langet sakay nággetnod tu kawanan nu makapangyariyan a Diyos.
Mas Dakila u Anak nan tu Anghel hide
4U anak u mas higit a dakila nan tu anghel na hide, konna tu ngahan a inyatád nikuna nu Diyos a mas dakila. 5Dipo maski nikan, ay awan ti maski ni essa a anghel u kinagiyan nu Diyos ti konna he,
“Hiko u anak ko!
Sapul nadid ay hikán dán u Ama mo.”
Sakay awan na be kinagi tu maskin deya a anghel a,
“Hikán u magin Ama na,
sakay siya u magin Anak ko.”
6Sakay nikuna paangayán dán nu Diyos u panganay na a anak ti munduway ay kinagi na,
“Dapat siya a sambaán nu atanan a anghel nu Diyos.”
7Tungkul be tu anghel hide ay kinagi na a,
“Ginimet na a pahás u anghel na hide,
sakay gehab ni apoy u magserbi hide nikuna.”
8Pero iye u kinagi na tungkul tu Anak na,
“U kahariyan mo, O Diyos, ay awan ti kahád,
u pághare mo ay tehhod a katarungan.
9Masaya ka tu maggimet ti maganda,
pero u masássuwayán ay sasala mo.
Kanya pinile ka nu Diyos a Diyos mo,
sakay inatádden na ka ti kasayaan
a higit tu kaguman mo hide.”
10Sakay kinagi na pa,
“Tu sapul ay hiko Panginoon u nanglalang tu mundu, sakay gimet nu kamát mo u langet.
11Iye hide ay mawan, Magin háppot hide a atanan a konna tu damit,
pero hiko ay awan mamawan.
12Isaddi mo hide a konna tu alikábkáb,
sakay konna hide tu damit a mapalitan.
Pero awan ka magbabagu
sakay hanggan-hanggan ka a mabiyag.”
13Maski nikan ay awan kinagi nu Diyos tu maskin deya a anghel a,
“Mággetnod ka ti kawanan kuwáy
mentaras a awan ko niko mapasuko u kadima mo hide.”
14Ni konna hod ay ánya u anghel hide? Ispirito hide a magserbi tu Diyos, sakay hide u utusan para tumulung tu maligtas hide.
Currently Selected:
Hebreo 1: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
