Santiagu 4
4
Diyan Mahalán u Kagustuwan nu Mundu
1Ánya u nagsapulan nu pamágdadema moy? Awan beman u mágkadukás a hilig u gusto a maghare tu puso moy? 2Tehhod kam a gusto a alapán pero awan moy maalap, kanya maskin mamuno kam basta maalap moy la u gusto moy. Dipo tu pagkasoh moy tu bakán moy a kao kanya pamágdademaan moy. Kanya awan moy maalap u gusto moy dipo awan kam magaged tu Diyos. 3Sakay maskin magaged kam tu Diyos ay awan nakam atádden dipo madukás u katoy tu isip moy sakay gusto moy la a masunud u mágkadukás moy hide a kagustuwan. 4Hikam a awan tapat tu Diyos! Awan moy beman tukoy a ni pahalagaan tam u bagay hide ti munduway ay kadima tam u Diyos? Kanya u ti deyaman a sumunud tu madukás a gimet nu tolay ti munduway ay kadima nu Diyos. 5Dyan moy isipán a awan ti seserbi u kinagi tu Kasulatan a, “Umád nu Banal a Ispirito a pinágyan nikitam nu Diyos a te kaagew tu págmahal tam.” 6U tatahoden ay tunay ti kadakál u kagbi nu Diyos nikitam kanya tulungan na kitam, konna tu nesulat tu Kasulatan, “Kadima nu Diyos u palalo hide pero kagbiyan na u mapagpakumbaba hide.”#4:6 Basaán tu Kawikaan 3:34.
7Kanya magpasakup kam tu Diyos, labanan moy ti Satanas tánni adeyuwan nakam. 8Umadene kam tu Diyos tánni umadene siya nikam. Kanya hikam a makasalanan hide, iyemang moy dán u pággagimet ti madukás, sakay u pabagu-bagu hide ti isip, diyan kamon magduwwa-duwwa ti isip a sumunud tu Diyos. 9Maglungkut kam ti husto, isanget moy u nagimet moy hide a kasalanan. U págtawa moy ay palitan moy dán ti págsanget sakay u kasayaan moy hide ay palitan moy ti pagkamalungkut. 10Magpakababa kam tu atubang nu Diyos tánni ilangkaw na kam.
Dyan Humatul tu Kapareho a Tolay
11Kákkapatkákka ko hide, dyan kam magupos ti madukás kontara tu kapareho moy a mánnampalataya, u magupos ti madukás sakay maghatul tu kapareho na ay kumontara sakay maghatul tu Kautusan nu Diyos. Ni konna hod ay bakán kamon a tagasunud nu Kautusan nan tagahatul dán. 12Eessa la u tagahatul sakay náng-atád tu Kautusan: U Diyos a te kapangyariyan a magligtas sakay magparusa. Ti deya ka a manghatul tu kapareho mo?
Dyan Magmadakál
13Mágsaneg kam nikán, hikam a magkagi a, “Nadid oni ilaw ay angay kame ti konna he a banuwan. Magsataon kame hod sakay magnegosyo tánni kumita kame ti dakal a pilak.” 14Dyan kitam magupos ti konna hina dipo awan tam tukoy ni ánya i mangyariyay ni ilaw tu biyag tam. U biyag tam ay kumán la a asok a bigla la a magbuo sakay awan la malay ay mawan dán. 15Nan konna he u dapat moy a kagiyán, “Ni kagustuwan nu Diyos a mabiyag kame palla ay iye o ni itod u gimitan me.” 16Pero nadid ay mágmadakál kamon sakay maghambug, madukás ina!
17Kanya ni tukoy nu essa a tolay u maganda pero awan na ginimet ay nagkasala siya.
Currently Selected:
Santiagu 4: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
