Galacia 3

Kautusan oni Pánnampalataya

1Hikam a taga Galacia hide, awan kam ti tukoy! Deya i nakaalumayaay nikam? Malinaw a nepakapospos ko nikam ni kodya a natay ti Jesu-Cristo tu kudus! 2Saiye u gusto ko a itanung nikam: Tinanggap moy beman u Banal a Ispirito dipo tu kássunud moy tu Kautusan? Awan! Nan dipo simmampalataya kam tu nasaneg moy tungkul ni Cristo. 3Talaga a awan kam ti tukoy! Nagsapul kam a manampalataya tu pamamag-itan nu tulung nu Banal a Ispirito. Pero nadid ay akala moy wád day ni mapabegsák moy u pánnampalataya moy tu sadile moy la a begsák? 4Awan dán beman ti halaga nikam u bagay hide a pinagtiisan moy? Tehhod palla wad. 5Bakin inyatád nikam nu Diyos u Ispirito na? Bakin maggimet siya ti makataka-taka? Dipu beman tu kássunud moy tu Kautusan? Awan! Nan dipo tu pánnampalataya moy tu nasaneg moy tungkul tu Maganda a Baheta.

6Konna tu nangyare ni Abraham, “Simmampalataya siya tu Diyos, kanya inbilang siya nu Diyos a matuwid.”#3:6 Basaán tu Genesis 15:6, Roma 4:3. 7Ni konna hod ay maliwanag a u simmampalataya la hide tu Diyos u tunay a lahe ni Abraham.#3:7 Basaán tu Roma 4:16. 8Bagu pa iye a nangyare ay kinagi dán nu kasulatan a ituring nu Diyos a matuwid u Hentil hide tu pamamag-itan nu pánnampalataya de nikuna, sakay iye a Maganda a Baheta ay inpakapospos na ni Abraham, “Tu pamamag-itan mo ay pagpalaán nu Diyos u atanan a bansa.”#3:8 Basaán tu Genesis 12:3; 18:18, Gimet 3:25. 9Simmampalataya ti Abraham tu Diyos kanya pinagpala siya, kanya u atanan a manalig tu Diyos ay pagpalaán be a konna nikuna.

10Pero u tolay hide a umasa a maligtas tu kássunud tu Kautusan ay sinumpa. Dipo nakasulat, “Maparusaan u tolay hide a awan sumássunud tu atanan a nakasulat tu Libro nu Kautusan.”#3:10 Basaán tu Deuteronomio 27:26. 11Nadid, malinaw a awan ti tolay a meturing a matuwid tu atubang nu Diyos tu pamamag-itan nu kássunud tu Kautusan, dipo kinagi tu Kautusan, “U tolay a inturing nu Diyos a matuwid ay mabiyag dipo tu pánnampalataya na.”#3:11 Basaán tu Habacuc 2:4, Roma 1:17, Hebreo 10:38. 12Pero u kássunud tu Kautusan ay awan neayun tu pánnampalataya tu Diyos. Dipo nakasulat a, “U tolay a gusto a mabiyag tu pamamag-itan nu Kautusan ay kailangan a sumunud tu atanan a inyutus niiye.”#3:12 Basaán tu Levitico 18:5, Roma 10:5.

13Tinubus kitamon ni Cristo tu sumpa a gábwat tu Kautusan nikuna naghirap siya a konna tu essa a sinumpa dipo nikitam. Konna tu nakasulat tu Kasulatan a, “Sinumpa u bawat nebátten tu kayo.”#3:13 Basaán tu Deuteronomio 21:23. 14Tinubus kitam ni Cristo para u págpapala hide a inpananto nu Diyos ni Abraham ay matanggap be nu Hentil hide tu pamamag-itan ni Jesu-Cristo. Sakay tu pamamag-itan nu pánnampalataya tam nikuna ay matanggap tam u inpananto nu Diyos a Banal a Ispirito.

U Kautusan Sakay u Pananto

15Kákkapatkákka ko hide, iye u karaniwan a halimbawa. Ni napirmaan dán u essa a kasunduwan ay awan dán iye maare a mabagu nu maskin deya. Sakay awan dán be iye maare a dagdagan. 16U Diyos ay nagpananto ni Abraham, sakay tu apu na. Awan nesulat tu Kasulatan a, “Tu apo mo hide,” a u gusto na a kagiyan ay makpal a apo. Nan u nakasulat ay, “Essa tu apo mo hide,” a u gusto na a kagiyan ay eessa la a apo, awan ti agum nan ti Cristo.#3:16 Basaán tu Genesis 12:7. 17Sa iye u gusto ko a kagiyán: pinatatag nu Diyos u kasunduwan na ni Abraham sakay inpananto na a tupadán itod. Kaya i kasunduwanan itod ay awan maare a pawanan ti bisa nu Kautusan a dimmemát la kállipas nu áppat a datos ay ti tállo a pulo a taon. Nadid, itod a Kautusan ay awan maare a mangbagu tu inpananto nu Diyos.#3:17 Basaán tu Exodo 12:40. 18Dipo mara ni matanggap tam u págpapala tu pamamag-itan nu págsunud tam tu Kautusan ay bakán dán iye a u pananto na. Pero inpagkaluub nu Diyos u págpapala ni Abraham bilang pángtupad na tu panantu na.#3:18 Basaán tu Roma 11:6, Roma 4:14.

19Ni konna hod, bakin a neatád pa u Kautusan? Neatád iye para mepeta tu tolay a hide ay nagkasala tu atubang nu Diyos. Pero iye ay hanggan la a dumemát u impananto a apo ni Abraham. Neatád iye a Kautusan tu pamamag-itan nu anghel hide sakay tu tulung nu tagasuhog.#3:19 Basaán tu Roma 5:20. 20Pero i pangakuwan iye nu Diyos ni Abraham ay awan dán kailangan u tagasuhog dipo u Diyos a mismo u nákpagkasundu ni Abraham.

U Anak hide sakay u Alipin hide

21Gusto bemanay ni iye a kagiyán ay kontara tu pananto hide nu Diyos u Kautusan? Awan, dipo u Kautusan sakay u pananto ay awan magkapareho ti layunin. Bakán a u págsunud tu Kautusan u dahilan para u tolay ay meturing a matuwid kaya bakán a u Kautusan u makapangatad ti biyag a awan ti kahad.#3:21 Basaán tu Roma 8:2-4. 22Pero kinagi nu Kasulatan, u atanan a tolay ay alipin nu kasalanan sakay awan hide maligtas tu pamamag-itan nu págsunud tu Kautusan dipo bakán a itod u paraan para makaguman u tolay tu pananto nu Diyos nan u pánnampalataya la ni Jesu-Cristo. Kanya nadid u mánnampalataya la hide ni Jesu-Cristo u pagkaluuben tu impananto nu Diyos.#3:22 Basaán tu Roma 3:9-19, 11:32.

23Nikuna a awan tam palla tukoy u tungkul tu pánnampalataya ay maparusaan kitam nakwa dipo tu awan tam kássunud tu Kautusan. Sakay awan kitam ti pag-asa a maligtas hanggan a mehayag nikitam u tungkul tu pánnampalataya. 24Kanya ngane u Kautusan u itáttoldu nikitam hanggan tu káddemát ni Cristo, para matukuyan tam ani dumemát dán siya ay dapat kitam a sumampalataya nikuna dipo meturing kitam la a matuwid tu pamamag-itan nu pánnampalataya tam nikuna. 25Nadid, dipo summampalataya kitamon ni Cristo kaya awan kitamon dapat manalig tu Kautusan para meturing kitam nu Diyos a matuwid.

26Dipo tu pánnampalataya moy ni Jesu-Cristo ay nagin anak kam a atanan nu Diyos. 27U ugale ni Cristo u nesulot nikam a kumán a damit nikuna a mabawtismuwan kam nikuna. 28Awan dán ti pagkaibaan u Judio hide sakay u Griego hide, u alipin sakay u malaya hide, u lállake sakay u bábbey hide. Eessa kamon a atanan dipo tu pákpagkaessa moy ni Jesu-Cristo.#3:28 Basaán tu Roma 10:12. 29Ni sakup kamon ni Cristo ay lahe kamon ni Abraham sakay tagamana tu inpananto nu Diyos nikuna.#3:29 Basaán tu Roma 4:13.

Currently Selected:

Galacia 3: MBJC

Highlight

Compare

Copy