Colosas 1

1Mahal ko hide a kákkapatkákka, iye a sulat ay gábwat nikán a ti Pablo a apostol ni Cristo Jesus ayun tu kaluuben nu Diyos sakay gábwat be tu kapatkákka tam a ti Timoteo.

2Iye a sulat ay para tu taga-Colosas hide a pinile nu Diyos sakay tapat a kákkapatkákka me ni Cristo.

Nakwa ay atádden kam nu Diyos Ama ti kapayapaan, sakay pagpapala.

Dasal a te Pasalamat

3Pirme kame a magpasalamat tu Diyos a Ama nu Panginoon tam a ti Jesu-Cristo, kada ipagdasal mikam,#1:3 Basaán tu Efeso 1:16. 4dipo nabaheta me u pánnampalataya moy ni Cristo-Jesus sakay u págmahal moy tu atanan a pinile nu Diyos, 5dipo tu pag-asa a matanggap moy u nehanda para nikam ti langet. Natukuyan moy u tungkul ti pag-asaan iye nikuna a ibaheta nikam u upos nu tatahoden; iye u Maganda a Baheta a dimmemát nikam. 6Kimmalat iye ti buuwáy a mundu tán mangatád ti págpapala, konna tu nangyare nikam sapul nikuna a nasaneg moy sakay naintendiyan u tatahoden tungkul tu kagbi nu Diyos. 7Natukuyan moy iye ni Epafras, a tapat a alipin ni Cristo a mahal me a kaguman a tagapagserbi ni Cristo sakay siya u bilang bággi me nikuna nagtoldu siya nikam.#1:7 Basaán tu Colosas 4:12, Filemon 1:23. 8Sakay natukuyan me nikuna u tungkul tu págmahal moy a impagkaluub nikam nu Banal a Ispirito.

9Kaya sapul a nasaneg me iye, ay tulos-tulos me a idáddasal tu Diyos a nákwa ay ipakapos-pos na nikam ti husto u kaluuban na. Tu pamamag-itan nu karunungan sakay pággintendi a kaluub nu Banal a Ispirito.#1:9 Basaán tu Efeso 1:15-17. 10Para ti konna hod, mabiyag kam a karapat-dapat sakay makasaya tu Panginoon: sakay makagimet kam ti mágkaganda a gimet sakay lumawak u pákkatukoy moy tu Diyos. 11Idáddasal me be a pabegsákkán nakam nakwa tu tulung nu dakila na a kapangyariyan tánni makatággád kam sakay makapagtiis tu atanan a bagay ate kasayaan. 12Sakay pirme kam a magpasalamat tu Ama, dipo nebilang kam a karapat-dapat a mákbahagi tu mana a para tu pinile na hide a katoy tu demlag. 13Inligtas na kitam tu kapangyariyan nu kadiklámman sakay inyagton na kitam tu kahariyan nu pinakamamahal na a Anak.#1:13 Basaán tu Efeso 1:21, 2:2. 14Tu pamamag-itan nu Anak na, ay napalaya sakay napatawad kitamon tu kasalanan tam hide.#1:14 Basaán tu Efeso 1:7.

U Pagkatolay sakay Gawain ni Cristo

15U Diyos ay awan ketan pero ketan u Diyos ni Cristo. Siya u tehhod a kapangyariyan tu atanan a nilalang.#1:15 Basaán tu 2 Cor. 4:4. 16Dipo atanan a nilalang ti langet sakay ti lutaáy, ketan man oni awan, pate u ispirito hide a maghare, sakay tu mamahala hide, u mamuno hide, sakay u tehhod hide a kapangyariyan a ispiritwal ay nilalang nu Diyos tu pamamagitan na sakay para nikuna. 17Bagu pa a lalangán u atanan a bagay ay katoy dán ti Cristo, sakay tu pamamag-itan na u atanan a nilalang ay manatile tu kaayusan de. #1:17 Basaán tu Kawikaan 8:22-31. 18Ti Cristo u ulo nu mánnampalataya hide sakay hide u bággi na. Siya u pinaggábwatan nu biyag a awan ti kahád, dipo siya u kadipalonguwan a nabiyag a huway tánni siya u pinakadakila tu atanan.#1:18 Basaán tu Efeso 4:15. 19Dipo netakda dán nu Diyos a he dán tu anak na u atanan a pagka-Diyos na. 20Sakay tu pamamag-itan nu Anak na, ay ginusto nu Diyos a u atanan nu nilalang ti langet ay ti lutaáy ay mákpagkasundu nikuna. Iye ay tu pamamag-itan nu digi ni Cristo a nebuhus tu kákkatay na tu kudus.#1:20 Basaán tu Efeso 2:16.

21Tu itod, ay adeyo kam tu Diyos sakay nagin kadima na, dipo tu kadukássan a hod tu isip moy sakay siya be u gággimitán. 22Pero dipo tu kákkatay ni Cristo, ay inturing nakam a amigu na tánni makaatubang kam nikuna a banal, matuwid, sakay awan ti kapintasan. 23Pero kailangan a manatile kam a tapat sakay matatag tu pánnampalataya moy. Dyan moy pabayan a mawan u pag-asa a gábwat tu Maganda a Baheta a nasaneg moy. U Maganda a Baheta a iye ay nepangaral dán tu buo a mundu, sakay hikán ati Pablo ay naging tagapangaral ti iye.

Nagserbi ti Pablo tu Mánnampalataya hide

24Masayaák tu pághirap ko nadid dipo tukoy ko a para iye tu ikapiya moy. I pághirap ni bággi kuwáy nadid ay pángtulos-tulos tu pághirap ni Cristo para tu mánnampalataya hide a magebággi na. 25Nagin tagapagserbiyák na para tu mánnampalataya hide nikuna a piniliyák nu Diyos para ganap a mepahayag nikam u upos na.#1:25 Basaán tu Efeso 3:2. 26Iye a itoldu ko ay katupaden nu plano nu Diyos a nelihim tu nakalipas hide a makpal a taon sakay lahe, pero nehayag dán nadid tu pinile hide nu Diyos.#1:26 Basaán tu Efeso 3:9. 27Ginusto nu Diyos a ihayag tu atanan a tolay u dakila sakay makataka-takaan iye a planu na, a awan ti agum nan ti Cristo a katna nikam. Dipo nikuna ay nakasigudu kitam tu pag-asa tam a makaguman kitam tu kahariyan nu Diyos. 28Itona u dahilan ni bakin a ipáppangaral me ti Cristo tu katolayan. Ipakapos-pos me sakay táttolduwan me hide tu atanan a tukoy me tungkul ni Cristo para meatubang me u balang essa tu Diyos, a awan ti kapintasan dipo tu pákpagkaessa de ni Cristo. 29Iye u gustu ko a matupad kaya magpakahirapák a magtoldu tu pamamag-itan nu kapangyariyan ni Cristo a magahikad nikán.

Currently Selected:

Colosas 1: MBJC

Highlight

Compare

Copy