2 Timoteo 4

1Nadid, Timoteo, tu atubang nu Diyos sakay ti Cristo Jesus a mághatul tu biyag sakay tu patay hide, tu kássole na para maghare, ay iyutus ku niko a, 2ipangaral mo u upos nu Diyos maski ánya a pagkakataun. Akitán mo u tolay hide, pagkagiyan sakay pabegsákkán u isip de tu pamamag-itan nu matiyaga mo a págtoldu nide. 3Dipo dumemát u panahun a awan dán sumaneg u tolay hide tu tama a adal; nan sunudán dilaay ay u kagustuwan de. Mággaehyukán hide ti mangtoldu nide tu gugusto dila a masaneg. 4Sakay awan di dán sanigan u tatahoden, nan paniwalaan diyay ay u bida hide a awan tatahoden. 5Kaya hiko, lagi ka a magpugád ti kada-odas, pagtiisan mo u hirap hide a dumemát niko. Gimitán mo u tungkulin nu essa a mángngaral tu Maganda a Baheta. Tupadán mo u tungkulin mo bilang tagapagserbi nu Diyos.

6Dipo awanák dán magmalay ti lutaán iye, adeniyák dán a matay dipo u biyag ko ay konna tu alay a áinumán a ibulak tu altar nu Panginoon Diyos. 7Ginimet ko u atanan a makaya ko para tupadán u tungkulin a intiwala nikán nu Diyos konna tu essa a mággayam a nagginan ti mahusay hanggan a natapos u karera. Nadid nagimet ku dán u tarabaho a inyatád nikán nu Diyos. Sakay nanatiliyák a tapat tu pánnampalataya ni Cristo. 8Nadid ay matanggap ku dán u kurona nu pagkamatuwid. U Panginoon a makatarungan a maghatul u mangkurona nikán tu káddemát nu aldew a pághatul. Bakán la a hikán nan pati be u atanan a nangmahal ni Jesu-Cristo a maguhay tu kássole Na a huway.

U Dimodyan a Bilin ni Pablo ni Timoteo

9Pilitán mo a makademát ka he a pagdaka. 10Dipo linakadinák dán ni Demas, mas minahal na u makamundu hide a bagay, immangay siya nadid ti Tesalonica. Ti Cresente ay immangay be ti Galacia, sakay ti Tito ay immangay dán ti Dalmacia.#4:10 Basaán tu Colosas 4:14, Filemon 24, 2 Corinto 8:23, Galacia 2:3, Tito 1:4. 11Ti Lukas dálla i nawahakay a kaguman ko nadid, ehyukán mo ti Markos sakay ikuyog mu he, dipo dakál u metulung na tu pagserbi ku he tu Panginoon.#4:11 Basaán tu Colosas 4:14, Gimet 12:12, 25, 13:13, 15:37-39, Colosas 4:10, Filemon 24. 12Pinaangay ko ti Tiquico ti Efeso.#4:12 Basaán tu Gimet 20:4, Efeso 6:21, 22; Colosas 4:7, 8. 13Káangay mu he ay tawidán pay u alikábkáb ko a newahak ko ni Carpo ti Troas. Páktawed mu ped be u libro ko hide, lalu dán u nalukot a sássulatan nu upos nu Diyos.#4:13 Basaán tu Gimet 20:6.

14Grabi't dukás u ginimet nikán ni Alejandro a mágpanday. U Panginoon dálla u bahala a magparusa nikuna tu ginimet na nikán. 15Magingat ka nikuna dipo matindi u págkontara na tu itáttoldu tam.#4:15 Basaán tu 1 Timoteo 1:20, Awit 62:12, Roma 2:6.

16Awan nikán ti nákkuyog tu purumero de nikán a pángbista. Pinabayanák de a atanan a mágge-essa. Patawadán nakwa hide nu Diyos. 17Pero awanák pinabayan nu Diyos, inataddinák na ti begsak isip tánni mepakapospos ko tu Hentil hide a mágsaneg tu upos na. Kaya naligtasák tu hatul nu kamatayan. 18U Panginoon u mángligtas nikán tu atanan a mágkadukás sakay ligtasák a iyangay na tu kahariyan na ti langet. Puriyán siya hanggan-hanggan! Amen.

Pangdimodyan a Pángngumusta

19Ikumustaák mo dálla tu magkabanga a di Priscila sakay ti Aquila, sakay tu pamilya ni Onesiforo.#4:19 Basaán tu Gimet 18:2, 2 Timoteo 1:16, 17. 20Nagwahak ti Erasto ti Corinto, sakay ti Trofimo ay inwahak ko ti Mileto dipo te saket.#4:20 Basaán tu Gimet 19:22, Roma 16:23, Gimet 20:4, 21:29. 21Pilitán mo a makademát he bagu a dumemát u amiyan. Mákkumusta niko di Eubulo, Pudente, Lino, Claudia sakay u mánnampalataya hide.

22Aguman ka nakwa nu Panginoon Diyos sakay pagpalaán na ka.

Currently Selected:

2 Timoteo 4: MBJC

Highlight

Compare

Copy