2 Timoteo 3

U Dimodyan a Aldew

1Nadid, tandaan mo iye: tu dimodyan a aldew bagu sumole ti Cristo ay maghirap ti husto u atanan tolay. 2Káddemát ni panahunan ina ay magin makasadile u tolay hide, gusto diyay ay kaowan de u atanan a pilak, hambug hide. Mágkaseste hide, masássuwayan hide tu dáddakal de, awan hide ti utang a luub, nabusong hide dipo awan hide tumengge tu Diyos. 3Bakán la a iye, awan di dán tukoy a mahabag sakay magpatawad tu agum, mametmet, awan makapagpugád tu sadile sakay sasala de u atanan a maganda. 4Bakán la a ina, magin traidor hide, awan de isipán ni ánya u bunga nu gimitán de, mapagmataas hide, sakay u gugusto de ay u kagustuwan nu pilas bakán a u bagay hide a makasaya tu Diyos. 5Magkukunware hide a tehhod a pánnampalataya pero awan labe ketan tu biyag de u kapangyariyan nu Diyos. Adeyuwan mo u konna he hide a tolay.

6Dipo u agum nide ay maggimet hide ti madukás a paraan para makasáddáp hide tu bila-bilay nu bábbey hide a mahina ti pággisipan. Hidenye a bábbey ay putat ti kasalanan sakay mahilig hide tu kagustuwan nu pilas. Kanya alisto la hide a malinlang. 7Iye hide a bábbey ay gugusto de a matukuyan u ánya man a bigu a toldu pero maski nikan ay awan hide kumabeto tu tatahoden. 8Kumán hide adi Janes sakay ti Jambres#3:8 Janes sakay Jambres: Iye hide a lállake ay te anting-anting a nangkontara ni Moises tu palasyo ni Faraon. a kimmontara ni Moises, dipo kimmontara be hide tu tatahoden. Awan dán hide ti maisip a maganda kaya u pánnampalataya de ay awan tunay.#3:8 Basaán tu Exodo 7:11. 9Pero te kahád u gimet de a madukás dipo melantad tu atanan u kalokuwan de, konna tu nangyare di Janes sakay ti Jambres.

Pangdimodyan hide a Bilin

10Pero hiko Timoteo, ay tukoy-tukoy mo u atanan a itáttoldu ko, u kákkabiyag ko, u layunin ko ti biyag, u pánnampalataya ko, u págtiyaga ko, u págmahal ko, sakay u katapatan ko. 11Tukoy-tukoy mo u atanan a pággusig sakay hirap, a dinanas ko ti Antioquia, Iconio sakay ti Listra. Tiniis ko u hirap hide a iye pero inligtasák nu Panginoon tu atanan a iye. #3:11 Basaán tu Gimet 13:14-52, 14:1-20, 16:1-5. 12U atanan a masoh a mabiyag ti tama bilang essa a tagasunud ni Jesu-Cristo ay talaga a dumanas ti hirap. 13Pero u tolay hide a mágkadukás sakay mapagkunware ay lalo pa a magpakadukás. Tulos-tulos hide a maglinlang. Pero awan de tukoy a pate hide ay nalinlang be. 14Pero hiko, ay magtulos-tulos ka tu tatahoden hide a adal a natukuyan mo sakay nagtiwalaan, dipo tukoy mo ni kán deya mo iye a natukuyan. 15Sakay sapul pa a anak ka ay tukoy mo dán u Banal a Kasulatan. Iye u makapangatád niko ti karunungan para magkahod ka ti kaligtasan tu pamamag-itan nu pánnampalataya ni Cristo Jesus. 16U atanan a nakasulat a upos nu Diyos ay impesulat na tu pamamag-itan nu kapangyariyan na. Magamit iye tu págtoldu tu tatahoden, págsaway, págtuwid tu liwat a gimet, sakay mánggiya nikitam tu makadiyos a kákkabiyag. 17Tánni u tolay a magserbi tu Diyos ay awan dán ti kulang nan handa dán a maggimet tu atanan a mágkaganda a gimet.

Currently Selected:

2 Timoteo 3: MBJC

Highlight

Compare

Copy